THESSALONIKATE I 4 - Thuhun Thah (BSI)

Gingtute gamtatdan diing leh misiangthou laah thu

¹ Huchi'n unaute, a tawppen in, na umdan diing uleh, Pathian na kipaahsahdan diing uh, ka kawmva kipan a na laah bangun na hauh semna diingun Lalpa Jesu minin ka hung ngen un, ka hung hasot uhi.

² Ajiahchu Lalpa Jesu jalin bangtobang thu ka hung piah uh na he uhi.

³ Bang jiahin ahiai i chih leh Pathian deihzawng, na sianthouna diing u’chu hi ahi, kingaih tawpsan un;

⁴ Mi chinin siangthou leh jahtaha a beel chiat uh kepdan na heet diing uh;

⁵ Pathian he lou Jentelte banga huuhna lama kipe lou in;

⁶ Hulam thu ah chu koima’n a val a gamta in a unau tungah sil gilou bawl sih heh; Lalpa chu hutobang silbawlte zousiah phulatu ahih jiahin, kei un zong ka hung hilh khawl un ka hung hesah zouta uhi.

⁷ Ajiahchu Pathian in sianglou diingin ahung kou sih a, hizongleh siangthou diingin ahung kou zaw hi.

⁸ Hujiahin a musit chu mihing musit ahi sih a, Pathian, a Hagau Siangthou hung pepa musit ahi zaw hi.

⁹ Hizongleh unau kilungsiatdan lam thu ah gelhsah na ngai sih uh; ajiahchu kilungsiattuah chiat diingin nanguh ngei Pathian hilhin na um uhi;

¹⁰ Makedonia gam pumpia unau um zousiah tungah huchu na bawl ngei uhi; hizongleh unaute, hung khang semsem diingin ka hung hasot uhi.

¹¹ Thu ka hung piah bang va kam tawm deuh a um a, na nna chiat uh kitoh a, huleh na khut ngei va nna toh diing tum in;

¹² Huchi'n polam mite lama kilawmtah a na um theihna diingun leh, bangmah taahsap na neih louhna diingun.

Misiangthou donna diing

¹³ Hizongleh unaute, midang kinepna himhim neiloute banga na lungkham louhna diingun ihmute tungtaang na heet louh uh ka deih sih hi.

¹⁴ Ajiahchu, Jesu a si a, a thou kiit chih i gintaat leh, Jesu a ihmute zong Pathian in amah toh ahung puikhawm diing hi.

¹⁵ Hichu Lalpa thu in na kawmvah ka soi uh ahi, eite Lalpa hung pai dong a hing a na um nalaite’n ihmute i makhelh sih diing hi.

¹⁶ Ajiahchu Lalpa ngei chu kikou aw toh, angel tungnungpen aw toh, huleh Pathian pengkuul ging toh vaan akipat hung kumsuh diing ahi a, huleh Khrist a site a thou masa diing uh;

¹⁷ Huzohchiangin ei hing a na um nalaite huihkhua ah Lalpa tuaah diingin amahuh toh meipi lahah laahtouh in i um diing a; huchi'n kumtuang in Lalpa kawmah i umta diing hi.

¹⁸ Huchihjiahin hi thutein kihamuantuah chiat un.