SILBAWLTE 27 - Thuhun Thah (BSI)

Paul Rome khua a, a sawl uh

¹ Huleh Italy gam a kuang a ka chiah diing uh thu suhpuuh ahih phetin, Paul leh mitaang dang kuate aha chu Augusta pawla mi sepaih zahoutu a min Julia kichi a kemsah va.

² Huleh, Asia gam tuipi geia khua umte tawn diing Adramitim kuang ah ka tuang va, ka kitawlta uhi; Thessalonika khua a um Makedonia gammi, Aristarkha ka tonpih uhi.

³ A jingni in Sidon ka tung uhi, Huleh, Julia in Paul a hoih bawl a, kisuhalh diingin a lawite kawmah a chiahsah hi.

⁴ Hu apatin kuang in ka chiah kiit va, huih a lehnun jiahin Cyprus gam liah lamah ka kitawl uhi.

⁵ Huleh Silisia gam leh Pamphilia gamzuul tuilianpi ka khen nungun, Lisia gam a Mira khopi ka tungva.

⁶ Hu ah sepaih zahoutu in Italy gam zu an diing Alexandria kuang a mu a; hu ah ahung tuangsah hi.

⁷ Huleh awl-awl in ni tampi ka kitawl va, hahsatahin Knida zawn ka gei haamhaam va, huihin ahung n an jiahin Salmoni zuanin Krit gam liah ah ka kitawl uhi;

⁸ Huleh, hahsataha paisuaahin, Kuangkhawlna kilawm a chih mun uh ka tungta va; hu kawmah La sia khua a um hi.

⁹ Huin ni tampi a bei taah jiah leh, kuang a pai a lauhuai jiahin, an ngawlni a beita ngal a, Paul in amahuh a thuhilh a,

¹⁰ A kawmvah, Pute, tua kuang a paina ah siatna leh manna nasatah tung diing ahi chih ka he a, thuampua leh kuang tung chauh ah hilouin, i hinna uh nasanin lauhuai ahi, a chi a.

¹¹ Ahihvangin sepaih zahoutu in Paul soi sangin kuang pu leh kuang neitu thu a gingta zaw hi.

¹² Huleh phalbi huna umna diing a kuang khawlna mun a kizen louh jiahin a tamzaw in, hu a kipana kitawldoh a, Phoenicia tun teitei a, hutaha phalbi sung um a sawmta va; Phoenicia chu Krit gam a kuang khawlmun khat ahi a, sim tumlam leh maal tumlam ngat tuaah ahi.

¹³ Huleh simlam huih awl-awl a ahung nun tahin, a deihzawng uh mu kisain kuang chu a suut va, Krit gam ning zuulzuul ah a kitawl uhi.

Huihpi leh guahpi a tuaah uh

¹⁴ Hizongleh tomkhat zohin hu apatin Euroklidon a chih uh huihpi haattah ahung nungsuhta hi.

¹⁵ Huleh, kuang ahung phukhata a, huih lam a nawt theih taah louh jiahin ka mawh hahta va, ahung laam lehlehta hi.

¹⁶ Huleh, Klauda a chih uh tuikual gam khat zuul ah ka tai va, hahsatahin kuang neu chu ka bitsah thei hamham uhi.

¹⁷ A kaihdoh zohun a panpihna khaute a zang va, kuang nuai lamah a vial va; huin azawleh sehneel lahah kileengluutkha inteh chih lauin, puanjahna bangkim a puuhsah va, huchi'n ahung mawh toh lehlehta hi.

¹⁸ Huleh tuikinawh in ahung vawh na sat jiahin, a jingni in kuang a thuampuate tui ah a paikhia uh;

¹⁹ Huleh a ni thumni in ka khut ngei un kuang van ka paikhia uhi.

²⁰ Huleh ni tampi, ni leh aahsi a kilang sih a, huleh huihpi nameiin ahung nuai sih a, hin diing mawngmawng ka kinem nawnta sih uhi.

²¹ Hizongleh sawttah an ne loua a um nungin, Paul a lahvah a ding a, Pute, Krit tuikual a ka thu man a, kuang suut louh a, hibang siatna leh manna tuaah louh diing hijen a.

²² Huleh tuin lungmuangtaha um diingin ka hung hasot ahi; ajiahchu na lahva kuamahin hinna a taan sih diing uh, kuang chu se diing ahi.

²³ Ajiahchu Amah a ka hih a, a na zong ka toh Pathian angel tujanin ka kawmah ahung tung a,

²⁴ Lau sin Paul; Kaisar ma ah na ding ngei diing ahi; huleh, ngai in, kuang a na tuanpihte zousiah zong Pathian in ahung piah na hita, ahung chi hi.

²⁵ Hujiahin pute, lungmuangtahin um un; Pathian ka gingta a, ahung hilh bangin a um diing hi.

²⁶ Hizongleh tuikual gam khat ah ahung sepdoh ngei diing hi, a chi a.

²⁷ Hizongleh Adria tui khang lian a huihin a dung a vaai a ahung muutleeng uh a jan sawmleli jan in, jankim lai diingin kuang mite in gam khat tung diing bangin a kiheta va;

²⁸ Huleh tui thuuhdan a teh va, laam sawmnih hiin a he va, huleh, themkhat kitawl gamla deuhin a teh kiit va, laam sawmlehngaa hiin a he uh.

²⁹ Huin suang lahah leengluutkha inteh chih a lau va, kuang meilam ah siihka li a khia va, khovaah a ngaahta uhi.

³⁰ Huleh kuang mite in chu kuang malama siihkate khia kipangin, kuang neu chu tui khang lian ah a khaikhia va, kuang chu taihsan a tum uhi.

³¹ Paul in sepaih zahoutu leh sepaihte kawmah, Hite kuang a a um zing louh uleh na bit sih diing uh, a chi a.

³² Huin, sepaihte in kuang neu khaute a saattan va a hahta uhi.

³³ Huleh, khovaah kuanin, Paul in a bawnun an ne diingin a sawl a, Tuni, an ngawl a na ngaah va, bangmah ne loua na umna uh ni sawmleli ni ahita.

³⁴ Hujiahin an ne diingin ka hung sawl ahi; hi chu na damna diing uh ahi; na lahva kuamah a samzang khat zong a mang sih diing, a chi a.

³⁵ Huleh hu thu a soizohin, tanghou a la a, a ma vah Pathian kawmah kipaahthu a soi a; huleh, a balkeeh zohin a nepanta hi.

³⁶ Huin amahuh zousiah lungmuangtahin a um va, huleh, an zong a neta uhi.

³⁷ Huleh kuang sunga um mi chu ka bawnun za nih leh sawmsagih leh guup ka hi uhi.

³⁸ Huleh an a neeh kham zohun, buh chu tui lahah a paai va, kuang a suzaangta uhi.

Kuang a kiseta: mituangteng a suaahta

³⁹ Huleh kho vaah phetin a gam chin a heta sih va; hizongleh, kuang khawlna piautaah nei khat a mu va huah chu ahihtheih leh kuang tawlluut a tum uhi.

⁴⁰ Huleh siihka haw chu a hahkhia va, tui khang lian ah a nusia va, kuangkhe kaanna a phel uh a, huleh, kuang puanjah chu huih seh zawngin a kaitou va, piau taah a zuanta uhi.

⁴¹ Huleh tuilianpi nih kisuhtuahna mun ah ka luutkha va, kuang chu lei a susahta uh; huin kuang malam chu a kiphutdetta a, hihliing zoh louhin a um a, a meilam chu tuikinawh a haat jiahin a keehta hi.

⁴² Huleh sepaihte in mitaangte chu tui liau gaalkai a taimang khat umkha unte a chi va thah a tumta uhi.

⁴³ Hizongleh sepaih zahoutu in Paul huhing a ut a, a siltup uh a khaam a; tuiliau siam photmah tui khang lian a tawmkhia a khomuala kai masa diing leh;

⁴⁴ Midang khenkhat kuang dang tungah, khenkhat kuang keehphel tung banga gaalkai diing thu a pia hi; Huchi'n, a bawnun khomualah bittahin a gaalkai vehta uhi.