SILBAWLTE 19 - Thuhun Thah (BSI)

Baptistu John nungjuite Ephesa khua ah

¹ Huleh hichi ahung hi a, Apollo Korinth khua a, a um kalin Paul chu khosah lam tuansuah zouin Ephesa khua ahung tung a; huleh nungjui kuate aha a mu a,

² Ama’n a kawmvah, Na gintaat tuung laiun Hagau Siangthou na tang viai? a chi a. Amahun a kawmah, Hagau Siangthou a um chih zong ka jakha ngei mawngmawng sih uh, a chi va.

³ Huin ama’n a kawmvah, Bang baptisma ah ahiai na tan uh? a chi a. Amahun, John baptisma ah, a chi uh.

⁴ Huleh Paul in, John inchu mi kawmah a nunga hung diing Khrist Jesu chu na gintaat diing uh ahi, chi'n, kisiihna baptisma in a baptis veu ahi, a chi hi.

⁵ Amahun hi thu a jah tahun, Lalpa Jesu min in baptisma a tangta uhi.

⁶ Huleh Paul in a tungvah a khut a ngah tahin, Hagau Siangthou a tungvah ahung tungta a; huleh, haam heetlouh in a haam va, thu a soita uhi.

⁷ Huleh a bawnun mi sawm leh nih(vel) ahi uhi.

Paul Ephesa khua ah

⁸ Huleh Paul chu kikhopna inn ah a luut a, ha thum sung diing haangsantahin thu a soi a, Pathian gam lam thu ah kinialpih in mi a zawlluut jel hi.

⁹ Hizongleh khenkhat a chihmoh va, a gingta ut sih va, mipi ma a hu lampi chu a soisiat tahun, amahuh a chiahsan a, nungjuite a puituam a, Tiranna skul ah nichinin a kihoulimpihta hi.

¹⁰ Huleh hichibangin kum nih sung a um a; huchi'n Asia gam a um zousiah Judate leh Grikte in zong Lalpa Jesu thu a zata uhi.

¹¹ Huleh Pathian in Paul khut in silmah limdang tahtahte a bawlsah a;

¹² Huchi'n a sa tung akipatin kisiaahna puante aha teenthuaahte aha bang damloute kawmah ahung tawi va, a natnate uh a dam jel a, huleh, a sung va kipat dawite zong a pawt jel uhi.

¹³ Huin Juda vaah vai, dawithu he kuate aha in, Paul in a thu a tangkoupih veu Jesu minin ka hung vau uhi, chi'n, dawipaaite tungah Lalpa Jesu min a lou veu vial va.

¹⁴ Huleh Judami, siampu lal khat, Skeva in hutobang bawl tapa sagih a nei hi.

¹⁵ Hizongleh dawi in chu a dawng a, Jesu ka he hi, Paul zong ka he hi; hizongleh, nanguh kuate na hi viai? a chi a.

¹⁶ Huin dawipaiin chu amahuh ahung boh a, a zou a, a nuaisiahta a, huchi'n hu inn apatin saguah leh liam in a taidohta uhi.

¹⁷ Huleh hi chu Ephesa khua a teeng zousiah, Judate leh Grikte kawmah zong a thangta a; huleh, a bawnun a lau va, Lalpa Jesu min a lianta hi.

¹⁸ Huleh a gingtate zong tamtah a hung va, a silbawlte uh thupha a tawi va, a kiphuangta uhi.

¹⁹ Mitphialdawi zang mi tampiin zong a lehkhabu uh ahung tawikhawm va, mi zousiah mitmuh in a haalta uh; huleh, a man a suut va, dangka saang sawmngaa a phasah uhi.

²⁰ Huchi'n loupitah mai in Lalpa thu chu a dalh a, a gualzou jel hi.

Paul siltup

²¹ Hu silte nungin, Paul in a lungsim in, Makedonia gam leh Akaia gam a totsuaah zoh chianga Jerusalem khua a chiah a tum a, Hutah a ka chiah zoh chiangin, Rome khua zong, ka va pha teitei diing, a chi a.

²² Huchi'n, amah natohsahte mi nih Timothi leh Erasta chu Makedonia gam ah a sawl a; hizongleh, amah chu Asia gam ah hun tomkhat a um tadih hi.

Ephesa khua a buaina

²³ Huleh hulai velin hu Lampi thu jiahin mi a buai nasatenta hi.

²⁴ Ajiahchu mi khat a min Demetria, dangka siih kheengtu, dangka siih a Diana lim bawltu in khutsiamte kawmah kilohna tampi a pe jel veu hi.

²⁵ Hu mi in amahuh a koukhawm a, a natoh banguh tongte toh; huin, a kawmvah, Pute, hi natohna hi i hauhna uh ahi, chih na he uhi.

²⁶ Hi Ephesa khua chauh ah hilouin, Asia gam pumpi ah zong, hi Paul in, khuta bawlte chu Pathian ahi sih uh, chi'n mi tampi a thuzoh a, a kiheisah zouta hi chih, nanguh ngei in na mu un na ja uhi;

²⁷ Huchi'n i kiveina uh man louh ahung suah diing lauhuai chauh zong ahi sih; pathiannu loupi Diana biahinn zong ahung kingai neu diing a, huleh Asia gam pumpi leh khovela mi’n a biah uh amahnu ngei zong a loupina suhsiatin ahung umkha diing chih a lauhuai ahi, a chi a.

²⁸ Huleh hu thute a jah tahun a lungthah mahmah va, Ephesa mite Diana a loupi hi, chi'n a kikou uhi.

²⁹ Huin a kho-pum in a buai vehta va; Gaia leh Aristarkha, Makedonia gam a mi, Paul in a khualzinna a, a tonpihte geel chu a man va, kituaahtahin etnop inn ah a tailuutpihta uhi.

³⁰ Huin Paul in mi laha luut a tup leh a nungjuite’n a phal sih va.

³¹ Huleh Asia gam a houtu pente laha Paul lawmte khenkhat in a kawmah mi a sawl va, etnop inn a luut hetlou diingin a houhou uhi.

³² Khenkhat thu khat in a kikou va, khenkhat thudang in a kikou va; kikhawmte chu a buai va; mi tamzaw in a kikhop nasan uh zong a he sih uhi.

³³ Huleh mipi lah apat Alexander a kaidoh va, Judate’n amah chu malam ah a sawn va. Huleh, Alexander in a khut in a jap a, mi zousiah kawmah a siamna thu soi a tum hi.

³⁴ Hizongleh amah Judami ahi chih a heet tahun, daahkal nih sung diing vel aw kituaahtahin, Ephesa mite Diana a loupi hi, chi'n a kikou kou uhi.

³⁵ Huleh khosung lehkhagialtuin mipi a daihsah zohin, Nanguh Ephesa khua a mite, Ephesite hi pathiannu Diana loupi leh, Jupiter apat hung kia milim bia ahi uh, chih he lou kua a um ei?

³⁶ Huchi'n hi thu nial gual ahih louh nungin, na sip khiinkhian diing uh ahi, kin hehuin bangmah na bawl diing uh ahi sih hi.

³⁷ Ajiahchu, hi na hung mi puite uh hi biahinn luhmi lah ahi sih va, i pathiannu soisete zong ahi sih uh.

³⁸ Demetria leh a tohpih khutsiam haw in mi kua tung aha a thubuai a neih uleh, thubuai soina inn honsa in a um hi, huleh gamoptute zong a um uhi; kiheeh u’heh.

³⁹ Hizongleh sil danga buaina nei na hih uleh daan banga kikhopna ah lep diing ahi.

⁴⁰ Tunia buaina jiahin i tungvah thu ahung um diing a lauhuai hi, i kikhopna san pen hi ahi chih diing laha um ngal sih a, a chi a.

⁴¹ Huleh ama’n huchia a soi zohin kikhawmte chu a tawpsahta hi.