SILBAWLTE 14 - Thuhun Thah (BSI)

Paul leh Barnaba Ikonium ah

¹ Huleh, Ikonium khua ah hichi ahung hia, Judate kikhopna inn ah a luutkhawm va, thu a soi va, huchi'n, Judate leh Grikte tamtah in zong a gingtata uhi.

² Hizongleh, gingta lou Judate’n Jentelte a chiilsia va, unaute a mudahsahta uhi.

³ Hujiahin, Lalpa ah haangsantaha thu soi in hu ah sawttah a um va, ama’n chu chiamtehnate leh sillamdangte a khut va bawlsah in, a hehpihthu a theisah jel hi.

⁴ Hizongleh khopi sunga mipite chu a kilangkhen va; khenkhat in Judate a gum va, khenkhat in sawllehte a gum uhi.

⁵ Huin, Jentelte leh Judate’n a houtute uh toh kithuaha sawllehte zumhuaitaha bawl leh suang a seh tum a sil a bawl tahun,

⁶ Amahun hichu ana he va, Likaonia gam a Listra leh Derbe khua ah, huleh a kiimvel gam ah a taimang uh;

⁷ Huleh hu ah chu tanchinpha a soita uhi.

Listra khua a zeng suhdam ahi

⁸ Huleh Listra khua ah keeng zoi kua aha mi khat a tou a, a pian tuung apat keengbaai mawng ahi a, keeng in a pai ngei sih hi;

⁹ Hu mi'n Paul thusoi a ngaikhia a; huleh Paul in a ensaal a, a damna diingin ginna a nei chih a he a,

¹⁰ Aw ngaihtahin, Na keeng in dingtang in, a chi a. Huin, amah chu a kitawm a, a keeng in a paita hi.

¹¹ Huleh mipite’n Paul silbawl chu a muh tahun ngaihtaha kikou in, Likaonia haam in, Pathiante chu mihing banga i kawmva hungsuh ahi uh, a chi va.

¹² Huleh amahun Barnaba chu, Jupiter a chi va, Paul chu thusoipen ahih jiahin, Merkuria, a chi uhi.

¹³ Huin khopi kot maaia um Jupiter siampupa’n chu bawngtalte leh paahvui kotpi bulah ahung tawi a, mipite toh amahuh geel biahna in thah a tumta hi.

¹⁴ Hizongleh sawllehte, Barnaba leh Paul in hichu a heet tahun, a puan uh a botkeeh va, mipi lahah a tawmluut va, a kikou va,

¹⁵ Pute, bang diinga hi silte bawl na hi viai? Keiuh zong nanguh toh thuaah kibang mihing ka hi uhi, huleh hi sil thulimloute na kiheisan va, vaan leh lei, tui khang lian huleh a sunga sil um zousiah bawlpa Pathian hing kawma na hung kihei theihna diingun tanchinpha ka hung tut uh ahi.

¹⁶ Hu Pathian in chu nidang laiin nam chin amahuh lampi chiat a, a chiah uh ana phal a.

¹⁷ Ahihvangin Amah heetsahna bawl louin ana umsah sih, huchi'n, silhoih a bawl jel a, vaan apatin guahtui leh gahpha bangkim ahung pia a, i lungtang (lungtangte) uh neeh diing leh kipaahna in a sudim zing hi, a chi va.

¹⁸ Huleh hi thute soi in, mipite’n amahuh biahna diing a gan a goh diing uh a khap zou hamham uhi.

¹⁹ Huleh Antiok leh Ikonium khua apat Judami kuate aha hu ah a hung va, mipite chu a heem zou va, huchi'n Paul chu suang in a sep va, si a, a gintaat jiahun khopi geilam ah a kaikhia uhi.

²⁰ Ahihvangin nungjuite a kiima a din laiun, ahung thou a, khopi sungah ahung luut kiitta a; huleh, a jingin Barnaba toh Derbe khua ah a chiahta uhi.

Antiok a a kiih uh

²¹ Huleh amahun hu khopi a tanchinpha a soi va, mi tampi a hilh zohun, Listra leh, Ikonium leh, Antiok khua ah a kiih kiitta uhi.

²² Gimna tampi thuaah in Pathian gam ah i luut diing mawng ahi, chi'n nungjuite lungsim a kipsah va, ginna a um zingzing diingin a hasot uhi.

²³ Huleh kouhtuam china upate a namdet va, an ngawl a, a haamtei zohun, amahuh chu a gintaat uh Lalpa kawmah a kemsahta uhi.

²⁴ Huleh Pisidia gam chu a tawnsuah va, Pamphilia gam a tungva.

²⁵ Huleh Perga khua a thu a soi zohun, Attalia khua ah a chiahsuh uhi;

²⁶ Huleh hu akipatin kuang in a chiah va, a natoh zohsa uh tong diing a unaute’n Pathian khotuahna kemsaha a pawtna uh Antiok khua chu ahung tungta uhi.

²⁷ Huleh ahung tunun, kouhtuamte chu a koukhawm va, Pathian in amahuh zang a sil a bawl zousiah leh Jentelte diing a ginna kotkhaah a honsahdante a hilh uhi.

²⁸ Huleh nungjuite toh sawttah a umkhawmta uhi.