ROMETE 7 - Thuhun Thah (BSI)

Sual tawpsan thu kiteenna umdan apat etsahna

¹ Unaute, daan in mi a damsung teng a tungah thu a neihkhum ahi chih na he sih viai mah? (daan he mite kawmah ka soi ahi).

² Ajiahchu numei pasal nei chu a pasal damsung siah daan a, a pasala kaanin a um ahi; hizongleh a pasal a sih inchu pasal lam thu ah daan a kipan hahkhiahin a um hi.

³ Huchi'n a pasal dam zing a midang a kiteenpih inchu aangkawmnu a kichi diing hi; hizongleh a pasal a sih inchu hu daan apatin a zalenta a; midang toh kiteeng zong leh aangkawmnu ahi sih diing uh.

⁴ Huchihjiahin, ka unaute, Pathian lama gah i suah theihna diing a, midang, misi laha kipana kaihthoha umpa ngei na kiteenpih theihna diingun, Khrist sapum jiahin nanguh zong daan lamah si na hung hita uhi.

⁵ Ajiahchu tahsa a i um laiin daan jiaha sualna utna hung suahdohte’n i tahsa hiangte ah sihna khop gah suang diingin a tong veu hi.

⁶ Hizongleh tuin chu ahung tupa laha si zouta in, daan a kipan hahkhiah in i umta uh; lehkhagelh lui bangphet hiloua, hagau thaha nna i toh theihna diingin.

Daan leh sualna

⁷ Ahihleh bang i soita diai? Daan chu sualna hi adiai? Hilou hial. Himahleh daan jiahin hilouleh sual kichi he lou diing hinga; ajiahchu daan in, Eeng sin, na chi sih leh een kichi he lou diing ka hi.

⁸ Hizongleh sualin thupiah jiaha hun lemtaang muin ka sungah eenna chinteng a umsah uh; daan louin sual chu si ahi ngal a.

⁹ Ajiahchu tumalam in kei daan louin kana hing a; hizongleh thupiah ahung um tahin sual ahung halhdoha, kei ka sita hi.

¹⁰ Huleh hinna diing a thupiah chu sihna diing ahung hita chih ka hung hedohta hi.

¹¹ Ajiahchu sualin thupiah jiaha hun lemtaang muin ahung heema, hukhu zangin ahung sulumta hi.

¹² Huchi ahihjiahin daan chu a siangthou hi, thupiah zong a siangthoua, a dih a, a hoih hi.

¹³ Ahihleh sil hoih kei diing a sihna hung hita adiai? Hilou hial. Hizongleh sual chu sual a, a kilat theihna diingin sualin sil hoih zangin keimah ah sihna ahung tongdoh hi; sual chu thupiah jiaha sual nasatah ahung hihtheihna diingin.

Mihing a umze nihte kikalhna

¹⁴ Bang jiahin ahiai i chih leh daan chu hagaulam sil ahi chih i he a; hizongleh kei chu sa mi, sual suaah a khotsa ka hi.

¹⁵ Ajiahchu sil ka bawl pen a ngaihna ka he sih: bang jiahin ahiai i chih leh sil ka bawl utpen chu ka bawl sih a; hizongleh ka ut louhpen ka bawl zoveu hi.

¹⁶ Ka bawl ut louhpen ka bawl ngalin chu daan a hoih chia jui ka hita diing hi.

¹⁷ Huchi'n a bawltu chu kei ka hita sih a, sual keimaha um bawl ahi zaw hi.

¹⁸ Bang jiahin ahiai i chih leh keimah ah (chih chu, ka tahsa ah,) sil hoih mawngmawng a teeng sih chih ka he hi; a bawl utna pen chu keimah ah a um a; hizongleh hu a hoih bawl theihna ka mu sih hi.

¹⁹ Ajiahchu silhoih ka bawl utpen ka bawl sih a; hizongleh sil hoihlou ka bawl ut louh pen ka bawlzaw veu hi.

²⁰ Ka ut louh pen ka bawl inchu, a bawltu keimah ka hita sih a, sual keimaha um bawl ahi zaw hi.

²¹ Huchi'n hi daan ka hung hedohta, silhoih ka bawl ut laiin giitlouhna ka kawmah ahung um veu ahi.

²² Ajiahchu ka lungsimtah inchu Pathian daan tungah ka kipaah hi.

²³ Hizongleh ka tahsa hiangte ah daan tuam khat a um chih ka he hi; hukhuin ka lungsim daan a dou a, huleh ka tahsa hiangte a um sualna daan kawmah suaah in ahung pui veu hi.

²⁴ Migenthei hina meijen ing e! Hi sihna sapum lah apat kua’n ahiai hung suahtasah diing?

²⁵ I Lalpa uh Jesu Khrist jalin Pathian kawmah kipaahthu ka soi hi. Huchi'n keimah tahin chu ka lungsim in Pathian daan ka tong a; hizongleh ka tahsa in chu sualna daan ka tong hi.