ROMETE 6 - Thuhun Thah (BSI)

Khrist toh kipumkhatna leh sualna kituah louhdan

¹ Ahihleh bang i soita diai? Hehpihna a pun semna diingin sual ah i um zing diing uh adiai?

² Um zing lou hial diing. Eiuh sual lama sisate bangchi’n sual ah i hing thei nalai lai diai?

³ Eiuh Jesu Khrist a baptis a um photmahte chu a sihna ah baptis in i um uh ahi chih he lou na hi viai mah?

⁴ Hujiahin Pa loupina in misi laha kipan Khrist a kaihthoh banga eihaw zong hinna thah a i hin theihna diingin a sihna ah baptisma in amah toh vui in i um uhi.

⁵ Ajiahchu a sihna kibatpiha amah toh i na kizop taah uleh, a thohkiitna kibatpihin zong i kizop diing uhi.

⁶ Hikhu he leh uchin, sualna sapum suhmangthaia a um theihna diingin, tu apat a sual natonga i um nawn louhna diingin i mihing lui uh amah toh kilhbehin a umta hi, chih.

⁷ Ajiahchu koipouh sita sa chu sual apatin a zalenta hi.

⁸ Huleh Khrist toh i sih taah a ahihleh, amah toh hin zong i hinkhawm diing uh ahi chih i gingta hi.

⁹ Khrist chu misi laha kipan kaihthoh in a um a, a si nawn sih diing chih he in; sihna in a tungah thu a nei nawnta sih hi.

¹⁰ Bang jiahin ahiai i chih leh a sihna chu sual lam thu ah khatvei si ahi a; hizongleh a hin ahihleh, Pathian lamah a hing ahi.

¹¹ Huchimahbangin nanguh zong sual lam thu ah sisa in kingai unla, hizongleh Pathian lamah chu i Lalpa uh Jesu Khrist jalin hingin kingai un.

¹² Hujiahin na sapum uh si thei ah, a utzawng na juih na diingun sual in vaihawm sih heh.

¹³ Na sapum hiangte uh zong dihtatlouhna vanzat diingin sual kawmah pephal sih un; ahihvangin misi laha kipana hing kiit bangin Pathian kawmah kipia unla, na sapum hiangte u’zong dihtatna vanzat diingin Pathian kawmah pe phal zaw un.

¹⁴ Ajiahchu sualin na tungvah thu a neita sih diing hi; bang jiahin ahiai i chih leh daan nuaia um na hi sih va, hehpihna nuaia um na hi zaw uhi.

Suaah umdan apat etsahna

¹⁵ Ahihleh bang chita diing? Daan nuaia um hilou a, hehpihna nuaia um i hih jiahin i sual diing uh ahi diai?

¹⁶ Sual hial lou diing Sihna diing a sual suaah hiin, dihtatna diing a thumanna suaah hitaleh, koi kawm pouh ah zong thumang diing a suaah a na kipiah unchu, a thu na manpa uh suaah na hi uh chih na he sih viai mah?

¹⁷ Hizongleh Pathian kawmah kipaahthu um heh, sual suaah ana himah zong leh uchin, nanguh hung kipia kihilhna thudan chu lungtang tahun na juita uhi.

¹⁸ Suala kipan hahdoha um in, dihtatna suaahte na hung hita uhi.

¹⁹ Na tahsa uh haat louh jiahin mihing daan in ka soi ahi; na sapum hiangte uh sianthou louhna leh giitlouhna kawma suaah diing a nana piah bangun, tuin na sapum hiangte uh sianthouna diingin dihtatna kawmah suaah diingin pia un.

²⁰ Ajiahchu sual suaahte na hih laiun dihtatnalam apat nana zalen uhi.

²¹ Ahihleh tua na sil zumpihte vah hulaiin gah bang ahiaileh na neih uh? Hu silte tawpna lah sihna ahi ngal a.

²² Hizongleh tuin sual apat zalensaha um a, Pathian suaahte na hung hih nungun, sianthouna khopin na gah uh na nei va, huleh a tawpna ah kumtuang hinna toh.

²³ Ajiahchu sual man sihna ahi a; hizongleh Pathian silthawnpiah chu i Lalpa uh Jesu Khrist jalin kumtuang hinna ahi.