ROMETE 2 - Thuhun Thah (BSI)

Jentel sahkhomite siamlouhna

¹ Hujiahin, Aw mihing, mi soisel haat koi hita zonglechin suanlam diing himhim nei lou na hi; ajiahchu midang na soiselna tah ah nangmah siamlouh na kitangsah ahi; nang a soiseltu’n zong hutobang silte na bawl thou jiahin.

² Hizongleh hutobang sil bawl veute tunga Pathian vaihawmna chu thutah dungjuiin ahi chih i he hi.

³ Huleh hutobang sil bawl veute soisel a nang lah hute mah bawl thou, Aw mihing, Pathian vaihawmna peel diing a kigingta na hiaimah?

⁴ Ahihlouhleh Pathian hoihna in kisiih diingin nang ahung pui chih he louin, a hoihna hauhdan leh jaidohdan leh thuaahtheihdante simmoh na hiaimah?

⁵ Hizongleh na lungtang khauh jiah leh, na kisiih nuam louh jiahin, Pathian lungthahna ni leh valhawmna dihtat hung kilat ni chianga diingin na tungah lungthahna na kikholkhawm ahi.

⁶ Ama’n chu mi chin a silbawl bang jelun a thuh kiit diing hi.

⁷ Sil hoih bawl a kuhkaltaha pang a, loupina leh paahtawina leh manthai theih louhna hawl mite kawmah kumtuang hinna a pe diing a;

⁸ Hizongleh soihah a, thutah jui loua, dihtatlouhna juizote tungah chu hehnate leh lungthahnate a um diing,

⁹ Thuaahgimna leh lungngaihna nasatah chu silgilou bawlte hagau tungah a um diing hi; Judate hagau tungah a um masa diing a, Grikte hagau tungah zong a um diing hi.

¹⁰ Hizongleh silhoih bawl photmahte kawmah chu loupinate, paahtawinate, huleh hamuanna te piah ahi diing; Judate kawmah piah masat ahi diing a, huleh Grikte kawmah zong piah ahi diing hi.

¹¹ Ajiahchu Pathian in mi deihsahtuam a nei sih hi.

¹² Koipouh daan nei lou a sil bawlsual chu daan louin a mangthai diing a; koipouh daan nei a sil bawlsual chu daan a vaihawmsah in a um diing hi;

¹³ (Ajiahchu daan ja mi hih chauh chu Pathian mitmuh in midih ahi sih a; hizongleh daan banga gamta chu midih ahi diing uhi.

¹⁴ Bang jiahin ahiai i chih leh daan nei lou Jentelte’n a pianpih lungtang va daan silte a bawlun, daan nei sih mahleh uh, hite chu daan in a kineihtawm jel uhi;

¹⁵ A lungtang vah daan silbawl gelh ahi chih a ensah va, huchu a sialepha heetna un a heetpih a, a lungsimte uh kinialin siam leh siamlouh a kitangsah lehleh uhi; )

¹⁶ Ka tanchinpha soi dungjui a Pathian in Jesu Khrist zanga mihingte thuguuh vai a hawmsah ni chiangin.

Judate siamlouh tanna

¹⁷ Ngai in, nang chu Judami kichi na hi a, daan na muang a, Pathian na suang a,

¹⁸ Huleh a deihzawng na he a, daan a hilhin na um a, silhoih zote na khen thei a;

¹⁹ Huleh nangmah ngei chu mittawte puitu leh miala umte diing a vaah hiin na kihe a,

²⁰ Daan a pilna leh thutah umdan na neih jiahin mingolte hilhtu hiin na kigingta hi.

²¹ Hujiahin nang, midangte hilhtu, nang leh nang kihilhlou na hiaimah? nang guuhtaat louh diing ahi chia thusoitu, na gu veu maw?

²² Nang, aangkawm louh diing ahi chi a hilhtu, aang na kawm veu maw? nang, milem kihdahpa, milem biahna inn a silte na gu veu maw?

²³ Nang, daan suang pa, na daan bohsiat jiahin Pathian na suminse veu maw?

²⁴ Bang jiahin ahiai i chih leh Pathian min chu nanguh jalin Jentelte lahah soisiatin a umta hi, chia gelh bangin.

²⁵ Ajiahchu daan juitu na hih inchu zehtan a phatuam ngei a; himahleh daan botsetu na hih inchu na zehtan chu tan louh bang ahung hita hi.

²⁶ Hujiahin zehtanlou mi’n daan thusehte a juih leh a zehtan louh chu tan banga ngaih ahi sih diai mah?

²⁷ Huleh piandan a zehtanlou mi’n daan a juihkim leh, nang, lehkhathu leh zehtan daan nei ngal a daan bohsetu chu ahung soisel sih diai mah?

²⁸ Ajiahchu a polaang chauh a Judami hi chu Judami tah ahi sih a, a kilang a tahsa chauh a zehtan zong zehtan ahi sih hi.

²⁹ Hizongleh a sungnung lam a Judami hi chu Judami tah ahi; huleh zehtan tah chu lungsim lam a tan ahi, lehkha thu mai a hilouin, hagau ah ahi; amah paahtaat loh chu mihing apat ahi sih a, Pathian apat ahi zaw hi.