ROMETE 15 - Thuhun Thah (BSI)

¹ Huchi'n ei a haatte’n eimah nopna diing hawl louin, a haatloute haat louhna i thuaahpih diing uh ahi.

² Mi chinin i innveengte khantouhna diing a, a hoihna diingun i sulungkim diing uhi.

³ Ajiahchu Khrist in zong amah nopna diing a ngaihtuah sih a, hizongleh, Ahung taite taina chu ka tungah a tuta hi, chia gelh bangin ahi zaw.

⁴ Ajiahchu malaia ana kigial photmah chu, Pathian lehkhathu a kuhkalna leh hamuanna jala eite’n kinepna i neihtheihna diing a eiuh kihilhna diing a gelh ahi.

⁵ Huchi'n kuhkalna leh hamuanna Pathian in Khrist Jesu mahbangin khat leh khat lungsim kibang nei in hung umsah hen;

⁶ Pathian; i Lalpa uh Jesu Khrist Pa ngei chu lungsim munkhat pua leh aw khat suah a na paahtawi theihna diingun.

⁷ Huchihjiahin Khrist in zong Pathian loupina diing a ahung kipaahpih mah bangin khat leh khat kipaahta chiat un.

⁸ Bang jiahin ahiai i chih leh, pulepate kawma thuchiamte sukip diingin Khrist chu Pathian thudih heetsahna diingin zehtante thunatongtu ahung hita hi chitu ka soi ahi.

⁹ A khotuahna jiaha Jentelte’n Pathian a paahtawi theihna diingun; Hikhu jiahin Jentelte lahah ka hung paahtawi diing a, na min phatin la ka sa diing hi, chih gelh bangin.

¹⁰ Huleh, Nanguh Jentelte, ka mite toh kipaah un, a chikiit a.

¹¹ Huleh, Nanguh Jentelte zousiah, Lalpa chu paahtawi un; mi zousiah in zong amah phat un, a chi kiit a.

¹² Huleh Isaiah in, Jesse zungjam a um diing a, Jentelte tunga vaihawm diing a hung diingpa a um diing; amah chu Jentelte’n a kineppih diing uh, a chikiit hi.

¹³ Hagau Siangthou silbawltheihna jiaha kinepna na hauh theihna diingun kinepna Pathian in ginna a kipaahna leh hamuanna chintengin hung sudim hen.

Paul in a natohna leh a khualzinna diing a soina

¹⁴ Huleh ka unaute, nanguh chu hoihna in na dim va, pilna kim nei in na kihasuantuah thei uh chih kei mahmah in zong ka he hi:

¹⁵ Ahihvangin unaute, Pathian in ahung piah hehpihna jiahin nanguh hung heetdoh sahna tobangin a kal lahlah ah haangsantahin ka gial ahi.

¹⁶ Jentelte kawmah Jesu Khrist thunatongtu ka hihtheihna diing leh, ka Jentel latte Hagau Siangthou a suhsiangthou ahih va, kipaahpih taah ahihtheihna diingun Pathian tanchinpha nna ka tong hi.

¹⁷ Hujiahin Pathian lam silte ah Jesu Khrist ah kiloupisahna diing ka nei ahi.

¹⁸ Ajiahchu Khrist in Jentelte thuawisah diing a thusoi leh natoha keimah zanga a silbawlte loungal bangmah ka soi ngam sih hi,

¹⁹ Chiamchihna leh silmahte in Pathian Hagau silbawltheihna in; huchi'n Jerusalem khua leh a kimvel gam a kipan Illirikam gam tanphain Khrist tanchinpha kimtahin ka soi zouta hi.

²⁰ Ahi, midang innbulphuhsa tunga inn bawl ka hih louhna diingin, tanchinpha chu Khrist min kilohnasa mun a soi louin;

²¹ Himahleh a tanchin soi ngei louhnate’n a mu diing a; a ja ngeiloute’n ahung he diing uh, chih gelh bangin soi ka tum zaw hi.

²² Hukhu jiahin na kawmva hung diing tampi vei daal in ka umta hi.

²³ Hizongleh tuin chu hi gam kimvel ah mun ka neita sih a, huleh kum tampi na kawmva hung nuamin zong ka umta hi.

²⁴ Spain gam a ka chiah hunhun chu na kawmvah ka hung diing hi; ajiahchu ka zinna a nanguh hung muh leh, nanguh hung kithuahpih chim phot leng, hu lam ka chiahna ah nangun na hung haah u’zong ka kinem hi.

²⁵ Hizongleh tuin chu misiangthoute natohsah diingin Jerusalem a chiah phot diing ka hi.

²⁶ Ajiahchu Makedonia leh Akaia gam a mite’n Jerusalem khua a misiangthoute laha tagahte a diing a sum thohkhawm pha a sata uhi.

²⁷ Ahi, lungkimtahin ahih uhi, huleh a leiba uh zong ahi mawng uhi. Ajiahchu Jentelte’n a hagaulam silte uh a kikoppih ngal unchu, tahsalam silte a amah uh a panpih ve uh chu ahih diing mawng uh ahi.

²⁸ Hujiahin hi ka bawl zoh a, gah zong chiantaha ka muhsah zoh chiangin nanguh hung tawnin Spain gam ah ka chiah diing hi.

²⁹ Huleh na kawmva ka hung chiangin Khrist tanchinpha vangpiahna kim toh ka hung diing chih ka he hi.

³⁰ Huchi'n unaute, Pathian kawma na hung haamteisahna vah chihtahzeta hung thuaahpih diingin Lalpa Jesu Khrist min leh Hagau Siangthou lungsiatna in ka hung ngen hi.

³¹ Judia gam a gingloute laha ka suahtaat theihna diing leh, Jerusalem khua a diing a ka natohna hi misiangthoute kipaahna zawng ahihtheihna diingin;

³² Pathian deihzawng bang a, kipaahtaha na kawmva ka hunga, i kisuhhalhkhawm chiat theihna diingun.

³³ Ha muanna Pathian na bawnva kawmah um hen. Amen.