ROMETE 13 - Thuhun Thah (BSI)

Khovel vaihawmtute thu man diing

¹ Mi chin a tunga vaihawmtute thuthu in um heh. Ajiahchu Pathian thu louin koimah vaihawm a um sih hi; vaihawmtu a umte chu Pathian guat ahi uhi.

² Hujiahin koipouh vaihawmtu nial chu Pathian silguat doudaal ahi uhi; huleh a doudaaltute’n amahuh tungah siamlouhtansahna a mu diing uhi.

³ Vaaihawmtute chu silhoih bawlte diingin lauhuai ahi sih va, hizongleh migiloute diingin lauhuai ahi uhi. Ahihleh vaihawmtu lau lou a um na ut ei? Sil hoih bawl in, huchi’n a paahtaat na loh diing hi.

⁴ Ajiahchu amah hi na hoihna diing a Pathian natongtu ahi. Hizongleh sil gilou na bawl inchu lau in; ajiahchu ama’n a namsaau a mawh tawi sih hi; amah chu Pathian natongtu, sil gilou bawlte tunga lungthahna phubalatu ahi.

⁵ Hujiahin lungthahna lau jiah chauh hilouin, na sialepha heetna jiahin zong vaihawmtu thuthu a na um diing mawng ahi.

⁶ Bang jiahin ahiai i chih leh hikhu jiahin leiman zong na pia uh ahi; amahuh chu hi sil ngei bawl diing a Pathian natongtu ahi uhi.

⁷ Hujiahin mi zousiah kawmah a tan diing lawm uh pia un; leiman piahna diingpa kawmah leiman pia unla; siah tawina diingpa kawmah siah tawi un; lau diingpa chu lau unla; zahbawl diing a umpa chu zahbawl un.

Unau kilungsiatna

⁸ Kilungsiattuahna loungal chu koimah bangmah ba sih un; ajiahchu amah midang lungsiatpa in daan a juikim veh ahi.

⁹ Bang jiahin ahiai i chih leh hi thute, aang na kawm louh diing ahi, Tual na thah louh diing ahi, Na guuh louh diing ahi; Heetpihtu dihloua na pan louh diing ahi, Na een louh diing ahi; chin leh, hulou thupiah dang mawngmawng a um leh, hute chu, Nangmah na kilungsiat banga na innveengte na lungsiat diing ahi, chihin a khaikhawm veh hi.

¹⁰ Lungsiatna in a innveengte a bawlse sih a; hujiahin lungsiatna chu daan juihkimna ahi.

Khrist hung kiitna ni diing a naizia leh hinkhua siangthou

¹¹ Huchiangleh zong i gintaat chiil lai sanga tu a i hutdamna a naizawh taah jiahin, tuin chu ihmu khanloh a hun mahmahta chin hun umdan na he uhi.

¹² Jan a bei dehdehta a, khua vaah diing ahita hi; hujiahin mial a silbawlte paai in vaah thuam in i kithuam diing uhi,

¹³ Suuna um bangin dihtahin i um diingun; huhel leh zukham buai a um louin, huuh leh kingaihhaat a um louin, huleh kihau leh kithangsiat a um louin.

¹⁴ Lalpa Jesu Khrist in kithuam unla, na tahsa uh utna supiching diingin bangmah kibawl sih un.