ROMETE 12 - Thuhun Thah (BSI)

Khristian hinkhua leh natohna

¹ Hujiahin unaute, Pathian kawma na sapum uh kithoihna hing leh, siangthou leh, pomtaah hi diing a kilaan diingin Pathian khotuahna jiahin ka hung ngen hi, huchu na natoh diing va kilawm him ahi.

² Hi khovel daan bangin um sih unla; himahleh Pathian deihzawng hoih leh, kipaahpih taah leh, hoih bukim bang ahiai chih na heetchian theihna diingun na lungsim uh a thah a um in hung limdang zawta un.

Hagau silpiahte zatdan dih

³ Bang jiahin ahiai i chih leh ka kawma hung kipia hehpihna jalin, na lahva mi koimah in a kingaihsang diing huntawh val a kingaisang lou in, himahleh Pathian in mi chin kawma ginna a piah hun bang jel a dihtaha ngaihtuah zaw diingin ka chi ahi.

⁴ Ajiahchu sapumkhat a hiang tampi i neih a, huleh hiang zousiah natoh a kibat veh louh bangmahin;

⁵ Eihaw tampi hizong lehang Khrist ah sapumkhat i hi a; khat leh khat i kihiangtuah chiat uhi.

⁶ I kawma hehpihna hung kipia dungjuiin silthawnpiah tuamtuam i nei chiat a, thusoi diing ahihleh i ginna u’toh kihunin i soi diing uh;

⁷ Thunatoh diing ahihleh i tong diing uh a; thuhilhtu in zong hilh jel heh.

⁸ Hasottu in zong hasot jel henla; sil petu in it hetlouin pia heh; vaihawmtu in taimatahin hawm heh; mi khotuahtu in kipaahtahin khotuah heh.

Khristian hinkhua zatdan diing

⁹ Lungsiatna chu heembawlna tel louin hi heh; Gilou photmah hua unla, hoihlam photmah tu tinten un.

¹⁰ Unau kilungsiatna in khat leh khat kilainattuah chiat unla; kizahbawlna lamah kideihsahtuah chiat un;

¹¹ Taimaah lamah thase sih unla; hagaulamah phatuamngai un; Lalpa nna tong in.

¹² Kinepna a kipaah zingin; gimthuaahna ah hahkat un; haamteina a kuhkal zingin;

¹³ Misiangthoute taahsapna awng huhsah unla; mikhualte kipaahpih zing un.

¹⁴ Ahung gawtte vangpiah un; vangpiah unla, haamsiat sih un.

¹⁵ Kipaahte kipaahpih unla, kapte kahpih un.

¹⁶ Khat leh khat ngaihtuah kibangin um un. Sil saang talua ngaihtuah sih unla, mi neu tata toh kilawizaw un. Kipilsah sih un.

¹⁷ Koimah giitlouh giitlouhin thuh sih un. Mi zousiah mitmuh ah sil kilawm bawl diing tum un.

¹⁸ Ahihtheih inchu, na thu va ahihtheih laisiah mi zousiah toh kituaahin um un.

¹⁹ Unau deihtahte, phuba kila sih un, himahleh lungthahna chu Pathian ot zaw un; ajiahchu hichibanga gelh ahi, Phubalaah mawngmawng keimah a ahi; keima’n ka thuh na diing, Lalpa’n a chi hi, chih.

²⁰ Hujiahin na meelma a gilkial leh neeh diing pia in; a dangtaah leh dawn diing pia in; ajiahchu huchibanga na bawl leh a lu tungah mei-am na sekhawm ahi diing hi.

²¹ Gilou zohin um sih unla, hoihna in gilou zou zaw un.