PHILEMON 1 - Thuhun Thah (BSI)

Chibaibuuhna leh kipaahthusoina

¹ Paul, Jesu Khrist mitaang leh, i unaupa uh Timothi in, ka deihtah uleh ka natohpih uh Philemon kawmah,

² Huleh ka deihtah uh Apphia leh ka sepaihpih uh Arkippa kawmah, huleh na inn a kouhtuam kikhawmte kawmah;

³ I Pa uh Pathian leh, Lalpa Jesu Khrist akipan hehpihna leh hamuanna na kawmvah um hen.

⁴ Ka haamteinate a na min lou zingzing in ka Pathian kawmah kipaahthu ka soi hi,

⁵ Lalpa Jesu lam leh misiangthoute zousiah lama lungsiatna leh ginna na neihdan ja in;

⁶ Na ginna kikoppihna chu Khrist Jesu a nangmah a um sil hoih chinteng heetkimna lama ahung phattuam theihna diingin.

⁷ Ajiahchu na lungsiatna ah nuamna leh hehnepna loupitah ka nei uhi, bang jiahin ahiai i chih leh nangmah jiahin misiangthoute lungtang a halhta hi, unaupa.

Onesima diinga ngetsahna

⁸ Hujiahin a kilawm hun bawl diing a thu hung piah chu Khrist ah kingam mahmah zong leng,

⁹ Lungsiatna jiahin keimah Paul, teehsepu leh, tu a zong Jesu Khrist mitaang in ka hung ngen zaw ahi.

¹⁰ Ka kol taanna a ka hinkhiah, ka tapa Onesima a diingin ka hung ngen hi;

¹¹ Amah chu tumalaiin nanga diingin a phatuam sih a, hizongleh tuin chu nang leh kei diingin a phatuamta hi;

¹² Amah chu ka hung sawl kiitta a; hujiahin, ka lungtang peetmah ahi a, kipaahtahin na pom in.

¹³ Amah chu ka tanchinpha kolbuhna a nangmah luang a na hung tohsah diingin ka kawma umdensah ka ut mahmah a;

¹⁴ Hizongleh na chitna chu chitsah teitei hilou a, na ut thua hih ahihzawh theihna diingin na thu louin bangmah ka bawl nuam sih hi.

¹⁵ Ajiahchu hun tomkhat sung nang ahung khen chu kumtuang a amah na neih zawh na diing zong ahi meithei hi;

¹⁶ Ahi’n tuin chu suaah bang a hilou in, suaah sang a hoih, unau deihtah bangin, kei diingin chu deihtuam ahi a, nang diing semin houh, tahsa ah leh Lalpa ah bangchi hih diahkhol a ta’imah?

¹⁷ Hujiahin na kithuahpih banga na hung geel leh, keimah ngei bangin na pom in.

¹⁸ Na tunga bawlkhial a neih a, bat bangmah a neih lezong keimah batin na koih in;

¹⁹ Keimah Paul in hikhu ka khut ngei a ka gelh ahi, keima’n ka ditsah diing hi; ahi’nchu kei kawmah bat na nei a, nangmah ngei zong na kiba chia ka soina ahi sih hi.

²⁰ Ahi, unaupa, nang a kuan a nuamna Lalpa ah hung neisah in; Khrist ah ka lungtang hung suhalh in.

²¹ Na thumanna a kimuang in leh, ka soi sanga loupizaw a na bawl diing gingta in na kawmah ka hung gial hi.

²² Bang hitaleh kei diingin zong tunna inn khat hung na ngaihtuahsah in; ajiahchu na haamteinate uh jalin na kawmva piah a ka um diing ka gingta hi.

²³ Khrist Jesu a ka koltaanpih Epaphra in chibai ahung buuh hi;

²⁴ Mark, Aristarkha, Dema, huleh Luka, ka natohpihte’n zong.

²⁵ I Lalpa uh Jesu Khrist hehpihna na hagau uh kawmah um hen. Amen.