PETER I 5 - Thuhun Thah (BSI)

Upate diinga hasotna

¹ Na lahva upa umte chu, kei na upa hihpih uleh, Khrist thuaahna heetpihtu leh, loupina hung kilang diing zong tanpihtu in ka hung hasot hi;

² Na lahva Pathian belaam pawl umte vaah un, hih louh theih louh ahihjiah hilou in, ut thu hizaw in, punna niin deih jiah hilou in, lungsim kipeihsa kawm hizaw in;

³ Pathian goutante tunga kisulal lou a, hizongleh pawlte etton diing a um zaw in.

⁴ Huchi'n Belaampu lianpen ahung kilat chiangin loupina lallukhuh mualtheilou na mu diing uhi.

⁵ Huchimahbangin nanguh khanglaite, upate nuaiah kituluut un. Ahi, na bawnun khat leh khat kithumangtuah chiat unla, kingaihngiamna in kithuam un; ajiahchu Pathian in mi kiliansahte a doudaal a, mi kingaingiamte chu hehpihna a pia hi.

Hasotna vaantaang

⁶ Hujiahin a huntaha nanguh ahung paahtawi theihna diingin Pathian khut haattah nuaiah kingaingiam un.

⁷ Ama’n ahung ngaihsah zing jiahin na lungkhamna zousiah uh a tungah nga un.

⁸ Pilvaang unla, kiveeng zingin um un; ajiahchu na khingpa uh diabol chu huumpibahnei hawh bangin a neeh theih diing hawl in a vaah lehleh hi;

⁹ Na unaute uh khovela umte tungah huchibang thuaahnatnate a tungve chih he in, amah chu ginna a kiptah a um in dou un.

¹⁰ Hizongleh Khrist Jesu mang a kumtuang loupina tang diing a eiuh hung koupa, hehpihna Pathian in, tomkhat sung na thuaah nungun nanguh ahung hoihbukimsah in, ahung sukip in, ahung suhaat in, ahung umdetsah diing hi.

¹¹ Amah kawmah kumtuang kumtuang in paahtawina leh lalna umta hen. Amen.

¹² Unaupa ginumtah a ka heet Silvana khut in nanguh hasotna leh, hichu Pathian hehpihna i dinna uh ahi chih hesah kawmin na kawmvah tomtakhat in ka hung gial ahi.

¹³ Nanguh toh teel khawm Babylon a um kouhtuamte’n chibai ahung buuh uhi; huchimahbangin ka ta Mark in zong ahung buuh hi.

¹⁴ Lungsiatna kitawp in khat leh khat chibai kibuuh un. Khrist Jesu a um nanguh zousiah kawmah hamuanna um hen. Amen.