PETER I 2 - Thuhun Thah (BSI)

¹ Huchihjiahin giitlouhna zousiahte, heembawlna zousiahte, lepchiahnate, kithangsiatnate, huleh kisoisiatna zousiahte tawpsan unla.

² Naungeeh suahthahte bangin na khantouh theihna diingun Pathian thu nawitui bangmah toh hal louh lunggulh un;

³ Lalpa chu mi hehpihsiam ahi chih na heetkhaah taah va ahihleh.

⁴ Amah, mite deih louh, hizongleh Pathian teel leh luul suangpi hing kawm a banga hung in,

⁵ Nanguh zong suang hingte bangin, Jesu Khrist jiaha Pathian deihzawng hagaulam kithoihna laan diing a siampu siangthou leh hagaulam inn a lamtouhna hi uhi.

⁶ Huchihjiahin Pathian lehkhathu ah zong, Ngai un, Zion ah a ning a suang poimohpen, teel, huleh luultah ka lem hi; amah gingta phot chu a mualphou sih diing hi, chih gelh ahi.

⁷ Hujiahin nanguh a gingtate diingin amah chu a luul ahi; a gingta loute diingin chu, inn lamtute suang deih louh, hu ngei chu a ning a suang poimohpen ahung hita hi,

⁸ Kipalna suang leh kipuuhna suangpi toh; ajiahchu a thuman louh jiahun thu ah a kipal uh; huchibang diinga guat him zong ahi uhi.

⁹ Hizongleh a vaahna limdangtah a luut diing a mial a kipana nanguh hung koudohpa paahtawina na suhlat theihna diingun nanguh chu chi teel, lal siampu, nam siangthou, Pathian mituamte na hi uhi;

¹⁰ Nidang laiin mi mawngmawng na hi sih va, hizongleh tuin chu Pathian mite na hita uh; khotuahna tangloute na hi va, hizongleh tuin chu khotuahna na muta uhi.

¹¹ Deih mahmahte, mikhual leh khualzin bang na hih jiahun hagau doudaal zing tahsa utnate tawpsan diingin ka hung ngen hi;

¹² Sil gilou bawlte bang a ahung soisiat chiang va, na natoh hoih uh a muhte uh jiaha veha a um ni chiang va Pathian a paahtawi theihna diingun, Jentelte lahah na gamtatdan uh kilawmtahin um un.

Khovel vaihawmtute nuai a kituhluut diing

¹³ Lalpa jiahin mihing daan siam photmah nuaiah kituluut un; lalpen ahihjiahin kumpipa kawmah aha,

¹⁴ Ahihlouhleh silgilou bawlte gawt diing leh, silhoih bawlte phat diing a Amah hung sawl ahihjiahin gamoptute kawmah zong.

¹⁵ Ajiahchu na silhoih bawl va mingolte ngolna na suhdaih uh Pathian deihzawng tah ahi.

¹⁶ Mi zalente bangin, huleh na zalenna u’chu giitlouhna khuhkhumna diing a zang louin, hizongleh Pathian suaahte bangin um un.

¹⁷ Mi zousiah zahbawl un. Unaupihte lungsiat un. Pathian lau un. Kumpipa zahbawl un.

Natohsahna umziatah chu

¹⁸ Suaahte, laudan siamin na pute uh kawmah kituluut un; a hoihte leh a jainemte kawm chauh ah hilou in, lungtang khauhte kawmah zong.

¹⁹ Ajiahchu Pathian lama sialepha heetna jiaha mi’n gimna leh dihloutaha bawlna a thuaah leh hichu paahtaat taah ahi.

²⁰ Bang jiahin ahiai i chileh na dihlouhna jiah va khuttum a suh na tuaah un kuhkaltahin thuaah mah leh u’chin paahtaat bang ahiai na loh uh? hizongleh silhoih na bawl un, hukhu jiahin thuaahloh unla, kuhkaltahin thuaah leh u’chin, hichu Pathian kipaahpih zawng ahi.

²¹ Huchibang hih diing a kouhna hi ngal va; ajiahchu Khrist in zong a khaap a na juih diing uh, etton diing hung nuutsiat in eiuh luang in ana thuaahta hi.

²² Ama’n chu sual mawngmawng a bawl sih a, huleh a kam ah zong heemthu a kimu sih hi.

²³ Vau a, a um laiin a vauthuh sih a; a thuaah laiin zong a tai sih; hizongleh dihtattaha ngaihtuahpa kawmah a kikemsah zaw hi;

²⁴ Eiuh sual lama si a, hizongleh dihtatna lama i hin theihna diingin ama’n amah sapum ah i sualnate sing dawnah a pua a; amah kivuah hualte ah suhdam in na umta uhi.

²⁵ Ajiahchu belaam bangin nana lammangta uh a; hizongleh tuin chu Belaampu leh na hagau uh veengtu kawmah na hung kih kiitta uhi.