MATTHAI 27 - Thuhun Thah (BSI)

Jesu Romemi Pilat, gamoptu ma ah

¹ Jingkal ahung hihin, siampu lalte leh vaantaang upate zousiah Jesu thahna diingin a kihoukhawm va;

² Huin amah chu a kaan va, a pui va, gamoptu Pontia Pilat kawmah a pekheta uhi.

Juda sihna

³ Huin Juda a mansahtu in Jesu siamlouh a tangsah uh chih a heet in a kisiih a, hu dangka sawmthum chu siampu lalte leh upate kawmah ahung tawi kiit a,

⁴ Mikhial lou sisan ka matsah chu ka sual ahi, a chi a. Huleh amahun, Hu kei uh diingin bang a khawh diai? nang na lohloh kilohta in, a chi va.

⁵ Huin ama’n dangka chu Pathian biahinn sungah a sepluut a, a pawt a, chiah in ava kikhailum hi.

⁶ Huleh siampu lalte’n dangka chu a la va, Sisan man ahih jiahin hichu thohlawm bawm a koih a siang sih hi, a chi va.

⁷ Huleh a kihoukhawm va, mikhual vuina diingin hu sum in beelkhengtu mun a leita uh.

⁸ Hujiahin hu mun chu tutanin, Sisan mun a chi uhi.

⁹ Huchi'n zawlnei Jeremiah thusoi, Israel tate laha koite aha in ana sahsa uh, amah man diing dangka sawmthum chu a la va;

¹⁰ Huleh Lalpa hung chiam bangin, beelkhengtu mun man diingin a pia uh, a chih chu hung taangtung ahita hi.

Jesu Pilat ma ah

¹¹ Huin Jesu chu gamoptu ma ah a ding a, huleh gamoptu’n, Judate Kumpipa na hi maw? chi'n a dong a, Huin Jesu’n a kawmah, Hi e, a chi a.

¹² Huleh siampu lalte leh upate’n amah a heeh laiun bangmahin a dawng sih hi.

¹³ Huin Pilat in a kawmah, Ahung heehna zoujai uh jalou na hi maw? a chi a.

¹⁴ Huleh ama’n kamkhat in zong a dawng sih a; huphetin gamoptu’n thum ah a sa mahmah hi.

¹⁵ Huleh gual vaah ni chianga gamoptu’n suangkul taang khat, mipite’n a teel penpen uh a hahsah veu ahi a.

¹⁶ Hulaiin Barabba a chih uh, gilou a kithangtah suangkul taang khat a um a.

¹⁷ Hujiahin amahuh ahung kikhop tahun, Pilat in a kawmvah, Koi zaw ahiai ka hung hahdohsah na deih uh? Barabba ahiai? Jesu Khrist kichi? a chi a.

¹⁸ Ajiahchu thangsiat jiaha a matsah uh ahi chih ama’n a he hi.

¹⁹ Huleh vaihawmna touphah a, a tou laiin, a ji in a kawmah mi a sawl a, Hu mi dih tungah bangmah bawl sin; ajiahchu amah jiahin tu ni’n ka mang in sil tampi ka thuaah hi, a va chisah hi.

Barabba a nget uh

²⁰ Hizongleh siampu lalte leh upate’n Barabba chu ngen a, Jesu chu sulum diingin mipite a heem va.

²¹ Gamoptu’n a dawng a, a kawmvah, Nihte laha koi zaw hung hahkhe leng chi na hi viai? a chi a. Amahun, Barabba, a chi va.

²² Pilat in a kawmvah, Ahihleh Jesu Khrist kichi hi bang ka lohta diai? a chi a. Amahun a bawnun a kawmah, Kros ah kilhbeh in um heh, a chi va.

²³ Huin gamoptu’n, Bang diingin eimaw? Bang bawlsual a nei ei? a chi a Amahun a bawnun, Kros ah kilhbeh in um heh, chi'n a kikou saan uhi.

²⁴ Pilat in bangmah loh theih louh leh, buaina semsem hi diing ahi chih a muh tahin, tui a la a, mipi ma a, a khut sil in, Hi mi dih sisan ah mohna bei ka hi; nangun na lohloh kiloh un, a chi a.

²⁵ Huin mipi zousiah in a dawng va, A sisan phuba chu keiuh tung leh ka tate uh tungah tu heh, a chi va.

²⁶ Huin ama’n Barabba chu a kawmvah a hahkhiahsahta a; huleh Jesu chu a jep zohin kilhbeh diingin a pedohta hi.

Jesu kilhbeha a umna

²⁷ Huin gamoptu sepaihte’n Jesu chu innpi ah a puiluut va, a kawmah sepaih hon a bawnin a khawm va.

²⁸ Huleh amah puan a hawhkhiahsah va, puansandup a silhsah uhi.

²⁹ Huleh linglukhuh a phan va, a khuhsah va, a khut jiatlam ah sialluang a tawisah va; huleh a ma ah a khupdin va, Chibai, Judate Kumpipa! chi'n chiamnuih bawlna in a nei uhi.

³⁰ Huleh a tungah chil a siat va, sialluang chu laahsah in a lu a jepna uhi.

³¹ Huleh amah chiamnuih bawlna a neih zoh un, puansandup chu a hawhkhiahsah va, kilhbeh diingin a puita uhi.

³² Huleh ahung pawtdoh uleh, Cyrene mi, a min Simon kichi mi khat a mu va; amah chu a kros paw diingin a man uhi.

³³ Huleh Golgotha kichi mun ahung tun un, huchu luguh mun chihna ahi.

³⁴ Amah chu uain thuuh, silkha toh kihal dawn diingin a pia va: ama’n huchu a chiam a, a dawn nuamta sih hi.

³⁵ Huleh amah chu kros ah a kilh va, huleh aaisaan in a puante chu a kihawm va; zawlnei in, Ka puante chu a kihawm va, ka puannaah tungah aai a saan uh, chia ana soi a taangtunna diingin.

³⁶ Huleh huah a tou va, amah chu a veengta uhi.

³⁷ Huleh a heehna; Hichu JUDATE KUMPIPA Jesu ahi, chia gelh a lu tungah a taah uhi.

³⁸ Huleh amah toh suamhaat mi nih zong a kilhbeh va, a jiatlam ah khat, a veilam ah khat.

³⁹ Huleh mi vaahleh phot in a lu uh thing in, a elhou va,

⁴⁰ Nang, Pathian biahinn susia a ni thum sunga bawl kiitpa, nang leh nang kihunkheta’n Pathian Tapa na hih leh kros dawn apat hung kumkhia in, a chi va.

⁴¹ Hubangmahin siampu lalte’n zong elhou in, lehkhagialtute leh upate toh,

⁴² Ama’n midang a hundam a; amah leh amah laha kihundam thei sih. Israelte Kumpipa ahihleh kros dawn apat hung kumta henla, huchileh ka gingta mei diing uh.

⁴³ Ama’n Pathian a muang vele; Amah deih ahihleh tuin hunkheta hen; Pathian Tapa ka hi, a chi ngal a, a chi va.

⁴⁴ Hu suamhaatte, amah toh a kilhbehte un zong huchimahin a elhou uhi.

Jesu sihna

⁴⁵ Huleh pung guupna apatin pung kuaahna tandongin leitung pumpi ahung mialta a.

⁴⁶ Huleh pung kuaahna diing velin, Jesu chu aw ngaihtahin a kikou a, Eli, Eli, lamasabakthani? a chi a. Huchu, Ka Pathian, ka Pathian, bang diinga hung taisan na hitai? chihna ahi.

⁴⁷ Amah kawma ding khenkhatte’n huchu a jah un, Hipa’n Elijah a kou ahi, a chi va.

⁴⁸ Huleh a lahva mi khat a taipah a, spanji a la a, uain thuuh ah a diah a, sialluang mongah a taah a, a dawn diingin a petou hi.

⁴⁹ A dangte’n chu, Huchisah in; amah hundam diingin Elijah ahung naimah i en diing uh, a chi va.

⁵⁰ Jesu chu aw ngaihtahin a kikou kiit a, a hagau a hahta hi.

⁵¹ Huleh ngai in, Pathian biahinn puanjah chu a tunglam apatin a nuailam tanin keeh nih ahung kisuaha; huleh ziil ahung liing a, suangpite ahung pawhkeeh a,

⁵² Huleh haante ahung kihong a; misiangthou ihmusate sapum tampi kaihthoh in a umta uh,

⁵³ Huleh amah thohkiit nungin haante apat hung pawtdohin khopi siangthou ah a luut va, huleh mi tampi kawmah a kilaah uhi.

⁵⁴ Huin sepaih zahoutu leh a kawma Jesu veenga umte’n ziilling leh sil hung umte a muh un nasatahin a lauta va, Hichu Pathian Tapa ahi ngei mei, a chi va.

⁵⁵ Huleh Galili gam apata a natohsah jel kawma Jesu hung jui numei tamtah hu munah a um va, gamlatah apatin a en zing va;

⁵⁶ Hute lahah chu Mari Magdalene, Jakob leh Jose nu Mari, huleh Zebedi tate nu chu a um uhi.

Jesu vui a, a umna

⁵⁷ Nitaahlam ahung hihin, Jesu nungjui hive, Arimathia khua a um, a min Joseph, mihausa khat a hung a,

⁵⁸ Amah chu Pilat kawmah a va chiaha, Jesu luang a ngen a. Huin Pilat in luang chu piah diingin thu a pia a.

⁵⁹ Huleh Joseph in a luang chu a la a, puannem siangtahin a tuam a,

⁶⁰ Huin a haan thah, suang a khuaah hawmah a sial a; huleh haan kot ah suang lianpi khat a liihluut a, a chiahta hi.

⁶¹ Huleh Mari Magdalene leh Mari dang huah, haan mazawnah tou in a um uhi.

Haan chiamchih a, a veen uh

⁶² Huleh a jingin, huchu kiginni jingni ahi a, siampu lalte leh Pharisaite Pilat kawmah a hungkhawm va,

⁶³ Pu, hu miheemhaatpa’n a dam laia, Ni thum nungin ka thou kiit diing a chih ka he zing uhi.

⁶⁴ Hujiahin haan chu ni thum tan hoihtaha veen diingin thu pia in, huchilou inchu jan chiangin a nungjuite hungin amah a va gu diing va, mipi lahah, Misi laha kipatin a thou kiitta hi, a chikha diing uhi; huchileh khelhna masa sangin khelhna nunung a sezawkha diing hi, a chi va.

⁶⁵ Pilat in a kawmvah, Veengtu mi na nei uh ahi sih maw: chiah unla na theihpa tawp un veeng hoihsahta un, a chi a.

⁶⁶ Huchi’n a chiah va, haan chu a enchian va, a suang a chiamchih va, veengtu a koihta uhi.