MATTHAI 25 - Thuhun Thah (BSI)

Nungaah siangthou sawmte tehkhinthu

¹ Hu hun chiangin vaan lalgam chu nungaah siangthou sawm, a thaumei uh keng a, mouneitu dawn diing a pawtkhete toh teh ahi diing.

² Huleh a lahvah mi ngaa a pil va, ngaa a ngol uhi.

³ Hu a ngolte’n chu a thaumei uh a keng va, thautui a kengtel sih uhi;

⁴ Hizongleh a pilte’n chu a thaumei u’toh a uum ah a tui zong a kengtel uhi.

⁵ Mouneitu chu ahung vaigeih jiahin a bawnun a lusu va ana ihmu vehta uhi.

⁶ Huleh jan khang laiin, Ngai in, mouneitu a hung hi, a dawn diingin pawtdoh un; chia kikou ging a umta a.

⁷ Hu tahin hu nungaahte chu a thou veh va, a thaumei uh a deta va.

⁸ Huleh a ngolte’n a pilte kawmah, Na thautui uh hung hawm un; ka thaumeite uh mit diing ahita hi, a chi va.

⁹ Hizongleh a pilte’n a dawng va, Keiuh leh nanguh diing a kidaih sih diing hi; a zuahte kawmah va chiah unla va kilei un, a chi va.

¹⁰ Huleh amahuh a lei diing a a va chiah kal un mouneitu chu a hungta a; huleh kigingsa a na umte chu amah toh moulopna inn ah a luut khawmta va; huin kot chu a kikhaahta hi.

¹¹ Hu nungin hu nungaah dangte zong a hung va, Lalpa, Lalpa, kot hung hon in, a chi va.

¹² Hizongleh ama’n a dawng a, Chihtahzetin ka hung hilh ahi, nanguh ka hung thei sih, a chi a.

¹³ Hujiahin kiging un, ajiahchu mihing Tapa hung diing ni leh a hun na he ngal sih uhi.

Talent tehkhinthu

¹⁴ Vaangam chu mi khat in a suaahte koukhawm a, a thuampuate a khut va kemsah a, khual gamlataha jinmang bang ahi.

¹⁵ Huleh ama’n a suaah khat kawmah talent ngaa, a suaah dang khat kawmah talent nih, huleh a suaah dang khat kawmah talent khat a pia a; amahun ahihtheih hun diing chiat un a pia a, amah chu a jinta hi.

¹⁶ Huin talent ngaa tangpa chu kuanin a va sumdawng a, talent ngaa dang a muhbeh a.

¹⁷ Huleh huchimah bangin talent nih tangpa’n zong talent nih dang a muhbeh a.

¹⁸ Hizongleh talent khat tangpa chu a chiah a, lei a tou a, a pu dangka chu a phuumta hi.

¹⁹ Hun sawttah nungin hu suaahte pu chu ahung tungta a, amahuh toh sum a sutuaahta a.

²⁰ Huchi'n talent ngaa tangpa a hung a, talent ngaa dang ahung tawi beh a, Pu, nang talent ngaa na hung kemsah a; en in talent ngaa dang ka muhbeh hi, a chi a.

²¹ A pu in a kawmah, Suaah hoih leh ginum, na bawl hoih hi; sil tawmtakhat tungah na ginum a, sil tampi tungah thuneitu in ka hung koih diing hi; na pu kipaahna ah luut in, a chi a.

²² Talent nih tangpa zong a hung a; Pu, nang talent nih na hung kemsah a; en in, talent nih dang ka muhbeh hi, a chi a.

²³ A pu in a kawmah, Suaah hoih leh ginum, na bawl hoih hi, sil tawmtakhat tungah na ginum a, sil tampi tungah thuneitu in ka hung koih diing hi; na pu kipaahna ah luut in, a chi a.

²⁴ Huin talent khat tangpa chu a hung a, Pu, mi kheltah na hi a, na tuh louhna ah na aat a, na theh louhna ah zong na khawm jel chih ka hung he hi;

²⁵ Hujiahin ka hung lau a, va chiah in na talent chu lei nuaiah ka va phuum a; en in, hi-ah nang a mah na kimuh kiitta hi, a chi a.

²⁶ A pu in a dawng a, a kawmah, Nang suaah gilou leh zawmthopa, ka tuh louhna ah ka aat a, ka theh louhna ah ka lakhawm veu hi chih na he maw?

²⁷ Huchi a hihnung, ka dangka chu sumdawngte kawma na va koih diing a, huchia ka hung chianga ka sum chu a pung toh ka muh kiit diing ahi.

²⁸ Hujiahin a talent chu laahsah unla, talent sawm neitu kawmah pia un.

²⁹ Ajiahchu koipouh a nei chu piah beh ahi diing a, tampi ahung nei diing; hizongleh koipouh a nei lou chu a neih sun zong laahsah ahi diing hi.

³⁰ Huleh suaah phatuamlou chu polam mial ah paaikhia un; huah chu kah leh hagawi a um diing hi, a chi hi.

Vaihawmna ni

³¹ Mihing Tapa chu angel siangthou zousiah toh a loupina a, a hung chiangin amah chu a loupina laltouphah tungah a tou diing hi;

³² Huleh a ma ah nam zousiah a khawm diing a, huleh ama’n amahuh haw chu belaampu in keel lah apata belaamte a khenkhiah bangin a khen diing.

³³ Belaamte chu a jiatlamah a koih diing a, keelte chu a veilamah a koih diing.

³⁴ Huchiangin Kumpipa in chu a jiatlamate kawmah, Nanguh ka Pa deihsahte, hung unla, khovel siam chiil apata nanguh diing a kibawl gam chu luah un;

³⁵ Bang jiahin ahiai i chih leh ka gil a kialin an na hung pia va; ka dang a taahin dawn diing na hung pia va; mikhual ka hihin na hung zintun va;

³⁶ Saguah a ka um in puan na hung silhsah va; damlou a ka um in na hung veh va; suangkul a ka taan in ka kawmah na hung uh, a chi diing.

³⁷ Huchiangin midihtatte’n, Lalpa, bangchihin aha gilkiala ka hung muh va, an ka hung piah uh? dangtaah a ka hung muh va, tui ka hung piah uh.

³⁸ Bangchihin ahiai mikhual a ka hung muh va ka hung na zintun uh? Saguah a ka hung na muh va puan ka hung silhsah uh?

³⁹ Bangchihin ahiai china aha, ahihlouhleh suangkul a na taan aha ka hung muh va, na kawma ka hung uh? chi'n a dong diing uhi.

⁴⁰ Huleh Kumpipa in chu a dawng diing a, a kawmvah, Chihtahzetin ka hung hilh ahi, Hi ka unaute laha neupen khat tunga na bawl uh chu ka tunga bawl na hi uh, a chi diing.

⁴¹ Huzohchiangin a veilama umte kawmah, Nanguh haamsethuaahte, ka kawm apat chiahmang unla, kumtuang mei, diabol leh a sawllehte diing a a bawl vah luutta un;

⁴² Ajiahchu ka gilkial in an na hung pe sih va; ka dangtaahin dawn diing na hung pe sih va;

⁴³ Mikhual ka hih in na hung zintun sih va; saguah ka hih in puan na hung silhsah sih va; ka chinat leh suangkul a ka taan in na hung veh sih uhi, a chi diing.

⁴⁴ Huchiangleh amahun zong a dawng diing va, Lalpa kei un bangchihin ahiai gilkial aha, dangtaah aha, mikhual aha, saguah aha, damlou aha, suangkul taang aha a ka hung muh va, na nna ka hung tohsah louh uh, a chi diing uh.

⁴⁵ Huchiangin ama’n a dawng diing a, Chihtahzetin ka hung hilh ahi, Hite laha neupen khat tunga na bawl louh uh chu, ka tunga bawl lou na hi uhi, a chi diing.

⁴⁶ Huleh hute chu kumtuang gawtmun ah a chiahta diing va; hizongleh midihtatte chu kumtuang hinna ah a chiahta diing uh, a chi hi.