MATTHAI 24 - Thuhun Thah (BSI)

Jesu’n Pathian biahinn suhsiata a um diing leh hun tawpna diing a soilawh

¹ Huleh Jesu chu Pathian biahinn apat pawt in a chiahta a; huleh Pathian biahinn kibawl daante ensah diingin a nungjuite a kawmah a hung va.

² Huleh Jesu’n a kawmvah, Hi sil zousiah na mu sih uh maw? Chihtahzetin ka hung hilh ahi, Suang suhchip louha kithuap mawngmawng hitah ah a um sih diing, a chi a.

³ Huleh Olive taang tunga a tou laiin, nungjuite a kawmah aguuhin a hung va, hi silte bangchihchiangin ahung um diai? huleh na hung kiitna diing leh khovel tawpna diing chiamchihna bang adiai? hung hilh in, a chi va.

⁴ Huin Jesu’n a dawng a, a kawmvah, Mi koimah in ahung heem louhna diingin pilvaang un.

⁵ Ajiahchu mi tampi in, Khrist ka hi, Huchi'n ka min in ahung diing va; mi tampi a heem zou diing uhi.

⁶ Huleh kidou leh kidou thuthangte na ja diing va; na lungdon louhna diingun pilvaang un; ajiahchu hi silte zousiah hung um diing mawng ahi a, hizongleh a tawpna ahi nai sih diing.

⁷ Nam tuam leh nam tuam, gam tuam leh gam tuam a kidou diing va; huleh mun tuamtuam ah kial bang a tung diing, hii bang a leeng diing a, ziil bang a liing diing hi.

⁸ Hite zousiah chu gentheihna kipatna ahi.

⁹ Hu hun chiangin nanguh chu suhgim diingin ahung mansah diing va, ahung that diing uh; huleh ka min jiahin nam zousiah huat na hi diing uh.

¹⁰ Huleh mi tampi a puuh diing va, khat leh khat a kimansah diing va, khat leh khat a kimudah diing uh.

¹¹ Huleh zawlnei tahlou tampi ahung pawt diing va, mi tampi a heem zou diing uh.

¹² Huleh sualna a pun diing jiahin mi tampite lungsiatna chu ahung daai diing.

¹³ Hizongleh a tawp donga thuaah zou, hu mi chu hutdamin a um diing.

¹⁴ Huleh hi lalgam Tanchinpha chu nam zousiah heetsahna diingin khovel pumpi ah soi in a um diing; huzohchiangin a tawpna chu ahung tung diing hi.

Gimthuaahna thupi hungum diing

¹⁵ Hujiahin sumangbangtu kihdahhuai, zawlnei Daniel in ana soi chu mun siangthou a ding na muh chiangun (a sim phot in hesiam uheh).

¹⁶ Huchih hun chiangin Judia gam a umte taang ah tai uh heh;

¹⁷ Inn tunga um chu a inn sungah bang aha ladoh diingin hung kumsuh sih heh;

¹⁸ Lou a um zong a puante la diingin hung kiih sih heh.

¹⁹ Huleh, hu ni chiangin gaaite leh naungeeh neite tung a gih hi!

²⁰ Hizongleh na tai hun uh phalbi lai ahih louh a, khawlni zong ahihlouhna diingin haamtei un.

²¹ Ajiahchu hu hun chiangleh gimthuaahna nasatah um diing ahi, hutobanga gimthuaahna loupi chu khovel siam chiil apat tutanin a um ngei sih a, um zong a um nawn sih diing hi.

²² Huleh hu nite chu suhtom hilou hileh mihing mawngmawng hing in a suaahta sih diing; hizongleh teelte jiahin hu nite chu suhtom ahi diing hi.

²³ Hu hun chiangleh koipouh in na kawmvah, En in, hi-ah Khrist a um, ahihlouhleh, huah a um chi zongleh tahsang sih un.

²⁴ Ajiahchu Khrist tahlou leh zawlnei tahlou ahung pawt diing a, chiamchihna leh silmah loupitahtah ahung ensah diing uhi; huah chu ahihtheihleh teelte ngei zong ahung heem diing uhi.

²⁵ Ngai un, a ma in ka hung hilh lawhta ahi.

²⁶ Hujiahin, na kawmva, Ngai un, gamdai ah a um, ahung chih uleh chiahdoh sih un; ngai un, pindan sunggil ah a um, ahung chih uleh tahsang sih un.

Kumpipa hungkiitna diing

²⁷ Ajiahchu chu nisuaahna lama kawl ahung phet a ni tumnalam tana a salhvaah bangin, mihing Tapa hung kiitna zong huchimah bang diing ahi.

²⁸ Saluang umna photah musanete zong a umkhawm diing hi.

²⁹ Hu gimthuaahna nite zohtahleh ni chu suhmial in a um diing a, ha chu a vaah nawn sih diing a, vaan apatin aahsite ahung ke diing, huleh vaan silbawltheihna chu suhliing ahi diing hi.

³⁰ Hu hun chiangin vaan ah mihing Tapa chiamchihna chu ahung kilang diing a; hutahchiangleh lei tunga jat zousiah in a suun diing uh, huleh mihing Tapa chu silbawltheihna leh gualzohna loupi toh vaan mei tunga hung a mu diing uhi.

³¹ Huleh ama’n a angelte chu pengkuul ging nasatah toh a sawlkhe diing a, huleh amahun a teelte chu lei ning li akipan, vaan tawp akipan a lehlam tawp tanphain a khawm diing uhi.

Kiven zing a kuuldan

³² Huchi'n theipi kungah tehkhinthu zil un; a ka ahung meen a, a nah ahung sel chiangin nipi a naita chih na he uhi;

³³ Huchimahbangin nangun zong hi silte na muh chiangun, a naita a, kotbul mahmah ah a umta chih he un.

³⁴ Chihtahzetin ka hung hilh ahi, Hi silte a tunkim masiah tulai khang thahte a mang sih diing uhi.

³⁵ Vaan leh lei a mang diing a, hizongleh ka thu a mang sih diing hi.

³⁶ Hizongleh hu ni diing leh a hun diing chu Pa chauh loungal koimah in, vaan a angelte’n zong a he sih uhi.

³⁷ Hizongleh Noah damlai bangin, mihing Tapa hung kiitna zong ahi diing hi.

³⁸ Ajiahchu tuijiin tun matengin, Noah kuang a, a luut ni tanin, a ne un a dawn va, ji leh pasal in a kinei uh.

³⁹ Huleh tuijiin a tun a, a bawnva a laahmang masiah bangmah a he sih uhi; mihing Tapa hung kiitna zong huchibangmah ahi diing hi.

⁴⁰ Hu hunchiangin lou ah mi nih a um diing va; khat chu laahmangin a um diing a, khat chu nuutsiatin a um diing.

⁴¹ Numei nih buhgawina ah buh gawtin a um diing va; khat chu laahmang in a um diing a, khat chu nuutsiatin a um diing hi.

⁴² Hujiahin kiging un, na Lalpa uh bangchih huna ahung diing chih na heet louh jiahun.

Suaah hoih leh hoihlou tehkhinthu

⁴³ Hizongleh hichu he un, inn neitu in guta hung diing hun he leh, a veeng diing a, a inn a luhsah sih diing hi.

⁴⁴ Hujiahin kiging zingin um un; ajiahchu na ngaihtuah louh laitah va mihing Tapa chu hung diing ahi.

⁴⁵ Ahihleh a pu in a hunchin a, a tan diing uh hawmsah diing a a innkuanpihte tunga houtu a, a koih suaah muanhuai chu koi ahiai?

⁴⁶ A pu hung chiangin huchibanga bawl ahung muh, hu suaah chu a hampha hi.

⁴⁷ Chihtahzetin ka hung hilh ahi, Ama’n amah chu a neih zousiah tungah houtu in a siam diing hi.

⁴⁸ Hizongleh suaah gilou in a lungsim in, Ka pu chu hung baih lou diing ahi, chi'n,

⁴⁹ A suaah hihpihte na vua in, zukham ankhamte kawmah ne in na dawnta leh,

⁵⁰ Hu suaahpa pu chu, a gintaat louh ni, a kiveen louh laitahin a hung diing a,

⁵¹ Huleh amah chu tum nih suah in, milepchiahte tan bang a tangsah diing a; huah chu kah leh hagawi a um diing hi.