MATTHAI 23 - Thuhun Thah (BSI)

Jesu’n Lehkhagialtute leh Pharisaite a demna

¹ Huin Jesu’n mipite leh a nungjuite kawmah thu a soi a,

² Lehkhagialtute leh Pharisaite chu Mosi touphah ah a tou uhi;

³ Hujiahin juih diing chi a ahung hilh photmah uh jui unla, bawl jel un; hizongleh amahuh silbawl bang chu bawl sih un; amahun a soi va, a bawl tuan sih uhi.

⁴ Vangih puaah hah tahtah a siam va, mi liangkou ah a suan va; amahun lah a khutzung khat un zong a khoih nuam sih uh.

⁵ Amahun a bawl zousiah uh chu mi muh diing a bawl ahi uh; a sil buh uleh khipte uh a sulian va, a puan mongte uh a tualsah uh;

⁶ Huleh ankuang luinate ah mun saangpen, huleh kikhopna inn ah touna hoihpen bang a deih uh,

⁷ Huleh dawlmun a mi’n chibai a buuh uh bang, Rabbi, Rabbi, chia a kouh uh bang a ut uhi.

⁸ Hizongleh nanguh chu Rabbi chihin um sih un; ajiahchu na Houtupa uh khat a um, Khrist ngei chu; huleh nanguh na bawnun unau na hi uhi.

⁹ Huleh leitung ah koimah pa chi sih un; ajiahchu na Pa uh khat ahi a, vaan a um chu.

¹⁰ Houtute chihin um sih un, ajiahchu na Houtu uh khat a um, Khrist chu.

¹¹ Na lahva loupipen chu na suaah un a um diing ahi.

¹² Huleh koipouh a kiliansah chu suhneu ahi diing a; huleh koipouh kingaineu chu tawisangin a um diing hi.

Jesu’n Lehkhagialtute leh Pharisaite siamlouh a tan

¹³ Hizongleh nanguh lehkhagialtu leh Pharisai lepchiahte aw, na tunguh a gih hi! vaan lalgam lampi mite na khaahsah va; nanguh lah na luut ngal sih va, mi a luut diingte lah na luutsah sih uhi.

¹⁴ Nanguh lehkhagialtu leh Pharisai lepchiahte aw, na tunguh a gih hi! ajiahchu meithaite inn na negam va, mi heemna’n sawtpipi na haamtei uh; hujiahin siamlouhtanna liansem na mu diing uhi.

¹⁵ Nanguh lehkhagialtu leh Pharisai lepchiahte aw, na tunguh a gih hi! ajiahchu mi khat Juda phungkai a siam diingin zong tui khang lian leh gam ah na chiah kiimvel va, huleh huchi na siam zoh chiangun amah chu nanguh sanga a lehnih a gawtmun mi diingin na siam veu uhi.

¹⁶ Nanguh mittaw ma puite, Koipouh Pathian biahinn loua kichiam chu bangmah ahi sih a, hizongleh koipouh Pathian biahinn a sana loua kichiamin chu a taangtun diing ahi, chite haw, na tunguh a gih hi.

¹⁷ Nanguh mingol leh mittawte; sana leh sana siangthousah Pathian biahinn a khoi loupizaw ahiai?

¹⁸ Huleh koipouh maitaam lou a kichiam chu, bangmah ahi sih; hizongleh a tunga um silpiah lou a kichiam in a taangtun diing ahi, na chi uh.

¹⁹ Nanguh mingol leh mittawte; silpiah leh silpiah susiang maitaam chu khoi loupizaw ahiai?

²⁰ Huchi'n koipouh maitaam lou a kichiam phot in, maitaam leh a tunga um zousiah lou in a kichiam ahi.

²¹ Huleh koipouh Pathian biahinn lou a kichiam chu, Pathian biahinn leh a sunga um zousiah lou in a kichiam ahi.

²² Huleh vaan lou a kichiam phot chu, Pathian laltouphah leh a tunga toupa lou a kichiam ahi.

²³ Nanguh lehkhagialtu leh Pharisai lepchiahte aw, na tunguh a gih hi! ajiahchu nangun pudina leh mohuri huleh jira bang sawmakhat na pia va, huleh daanthu poimohzaw thukhen dihna bang, zahngaihna bang huleh ginumna bang na thudon sih uhi; hite chu ahi na bawl ngei diing uh a dangte zong bawl lou tuanlouin.

²⁴ Nanguh puitu mittawte, thousi hisiang a sangawngsaau valh veute haw.

²⁵ Nanguh lehkhagialtu leh Pharisai lepchiahte aw, na tunguh a gih hi! ajiahchu nangun nou leh kuang polam na susiang va, hizongleh a sung lah leepguuhna leh kisumlouhna in a dim ngal a.

²⁶ Nang Pharisai mittaw, nou leh kuang sunglam susiang masa in, huchi'n a polam zong ahung siang thei diing hi.

²⁷ Nanguh lehkhagialtu leh Pharisai lepchiahte aw, na tunguh a gih hi! ajiahchu nanguh hi haan kinuh vaam, a polam mawitaha kilang a, a sunglam lah misi guh leh silniinte a dim bang na hi uhi.

²⁸ Hutobangmahin nanguh zong polama mihing mitmuh in, dihtat bangin na lang va, hizongleh na sunglam uh chu lepchiahna leh giitlouhna in a dim hi.

²⁹ Nanguh lehkhagialtu leh Pharisai lepchiahte aw, na tunguh a gih hi! ajiahchu zawlneite haan na bawl va, huleh midihtat haante zong na jem uh,

³⁰ Huleh, Ka pu leh pate uh damlaia na um hile ung, zawlneite sisan a suahna vah tel lou diing hi ve ung, na chi uhi.

³¹ Huchi'n zawlneite thatte tate na hi uh chih na kihesah uhi.

³² Na pi leh pute uh tehna daan sudim ngal mei un.

³³ Nanguh guulte, nanguh guul haahte, bangchi'n ahiai gawtmun siamlouhtanna na pelh theih diing uh?

³⁴ Hujiahin, ngai un, na kawmvah zawlneite, mipilte, huleh lehkhagialtute ka hung sawl ahi; a lahva khenkhat na that diing va kros ah na kilhbeh diing uh; huleh khenkhatte chu na kikhopna inn vah na jep diing va, huleh khochin ah na sawi jel diing uh;

³⁵ Huchi'n midihtat Abel sisan kisuah apat, Pathian biahinn leh maitaam kikal a Barakia tapa Zakaria na thah va a sisan suah tanphain, leitung a midihtatte sisan kisuah zousiah na tungvah ahung tung thei diing hi.

³⁶ Chihtahzetin ka hung hilh ahi, hi silte zousiah tulai khang thahte tungah ahung tung diing hi.

Jesu’n Jerusalem a kahkhumna

³⁷ Aw, Jerusalem, Jerusalem, zawlneite thattu, na kawma kisawlte suang a na seplumtu, aahpi in a noute aha nuaia a opkhum banga ke'n zong na tate bangzatvei opkhum ahiai ka tup taah, hizongleh na ut sih uhi.

³⁸ Ngai un, na inn uh a hawm a nuutsiat in a umta hi.

³⁹ Ka hung hilh ahi, Lalpa min a hung chu a hampha hi, na chih masangsiah uh, tukal na hung mu nawn sih diing uhi, a chi.