MATTHAI 20 - Thuhun Thah (BSI)

Grep huan a natongte tehkhinthu

¹ Ajiahchu vaan lalgam hi inn neitu a grep huan a natong dinga mi chial dinga jingkal a pawt bang ahi.

² Huleh ama’n natongtute toh ni khat a makhai khat loh diing a, a kilem tahun, a grep huan ah a sawlta a.

³ Huleh amah chu daah thumna velin a pawtdoh a, midang dawlmun a ding meimeite a mu a,

⁴ Huleh a kawmvah, Nanguh zong grep huan ah va kuan un, a kilawmhun ka hung pe ding, a chi a. Huin amahuh chu a chiahta va.

⁵ Huleh daah guupna leh daah kuaahna vel dingin a va pawt kiit a, huchi bangmahin a bawl kiit a.

⁶ Huleh daah sawm leh daah sawmlekhatna velin a va pawt kiit a, a kawmvah, Bang diinga ding meimei na hi viai? a chi a.

⁷ Amahun a kawmah, Koima'n ahung goih louh jiahin, a chi va. Ama’n a kawmvah, Nanguh zong grep huan ah va kuan un; a kilawm bangjel na mu diing uh, a chi a.

⁸ Huin nitaahlam ahung hihin, grep huan neitu’n a sumkolpa kawmah, Natongtute kou inla, a nunungpen apatin a masapen tanin a loh uh pia in, a chi a.

⁹ Huin daah sawmna leh daah sawmlekhatna vela a goihte a hung uleh, makhai khat chiat a muta va.

¹⁰ Huin a masate a hung un muh tamdeuh a kinem va; hizongleh amahun zong makhai khat chiat mah a muta va.

¹¹ Huleh hichu a kilaahzoh un inn neitu tungah a phunta va,

¹² Hi a nunungte’n daah khat sung chauh a tong va, keiuh nisa hahlai thuaah a tonggimte toh kibangin na bawlta, chi'n.

¹³ Hizongleh ama’n chu a lahva khat a dawng a, Lawm, na tungah bangmah ka sukhial sih hi; makhai khat loh diing a kihoutuaah hilou i'maw?

¹⁴ Nang a chu kilaah inla chiahta in; hi a nunungpen kawmah zong nang ka hung piah zaatmah ka pe ut hi.

¹⁵ Ka neihsa ka utut a ka bawltheih hilou amaw? Ka hoih jiahin na thangsia ahi maw? a chi a.

¹⁶ Hutobangin a nunung chu a masa diing a, huleh a masa chu a nunung diing hi; ajiahchu tampi kouh ahi a, hizongleh tawmtakhat teel ahi; a chi hi.

Jesu’n a sih diing a soilawh thumveina

¹⁷ Huleh Jesu Jerusalem khua a, a chiahtouh laiin nungjui sawmlehnihte lampi ah a puituam a, a kawmvah,

¹⁸ Ngai un, Jerusalem zu an in i chiah tou uh ahi; mihing Tapa chu siampu lalte leh lehkhagialtute khutah matsah in a um diing a, huleh amahun si diingin siamlouh a tangsah diing uhi,

¹⁹ Huleh amah chu chiamnuih bawlna diing leh, jep diing leh, kros a khetbeh diingin Jentelte khut ah a pedoh diing uhi; huleh ni thum ni in a thou kiit diing, a chi hi.

Khovel loupina ngetna

²⁰ Huin Zebedi tate nu chu, a tapate toh hung in amah ahung bia va, bang sil aha a ngen a.

²¹ Huin ama’n a kawmah, Bang ahiai na deih? a chi a. Amahnu’n a kawmah, Na lalgam a hi ka tapate geel khat na jiat a, khat na vei a, a tou theihna diing uh thu pia in, a chi a.

²² Hizongleh Jesu’n a dawng a, Na nget uh na he sih uhi. Nangun ka nou dawn diing na dawn thei viai? huleh ka baptisma tan diing na tang thei diing viai? a chi a. Amahun a kawmah, Thei e, a chi va.

²³ Huin ama’n a kawmvah, Ka dawn diing nou chu na dawn ngei diing va, ka baptisma tan diing zong na tang ngei diing uhi; hizongleh ka jiatlam leh ka veilam a tousah diing thu chu keimah piah diing ahi sih hi, ka Pa’n a bawlsahte kawmah piah ahi diing, a chi a.

²⁴ Huleh sawmte’n hichu ana jah un, unau nihte tungah a lungthahta uhi.

Loupina dihtah

²⁵ Hizongleh Jesu'n amahuh chu a kawmah a kou a, Jentelte vaihawmte chu a tungvah a lal mahmah va, huleh milian milalte'n a tungvah thu a nei mahmah uhi chih na he uhi.

²⁶ Hizongleh nanguh lahah chu huchi ahi sih diing; koi hitaleh na lahva let uh chu na natong un a um diing ahi.

²⁷ Huleh na lahva houtupen a pan ut chu na suaah un a pang diing ahi;

²⁸ Mihing Tapa hilhial zong natohsaha um dinga a hung louha, natong diing leh mi tampi tatna diing a a hinna pe diing a a hung zawh mah bangin, a chi hi.

Mittaw nih in mit vaahna a muh thu

²⁹ Huleh Jeriko khua apat a pawt un, mipi nasatah in amah a jui va.

³⁰ Huleh ngai in mittaw nih lam geia toute’n, Jesu lampi ah a chiah hi chih a jah tahun Aw Lalpa, David Tapa, ka tungvah zahngai in, chi'n a kikou va.

³¹ Huleh mipite’n a daihna diingun a tai va; hizongleh amahuh chu, Aw Lalpa, David Tapa, ka tungvah zahngai in, chi’n a kikou semsem uhi.

³² Huin Jesu a ding a, amahuh a kou a, Na tungvah bang bawlleng na ut viai? a chi a.

³³ Amahun a kawmah, Lalpa mit vaah ka ut uh, a chi va.

³⁴ Huin Jesu’n a hehpih mahmah a, a mit uh a khoih a; huchi'n a mutheipah ngal va, huleh amah a juita uhi.