MATTHAI 18 - Thuhun Thah (BSI)

Kingaihngiamna a heet diing

¹ Hulai tahin nungjuite Jesu kawmah a hung va, vaan lalgam ah koi a lianpen diai? a chi va.

² Huin Jesu’n naupang neu khat a kawmah a kou a, amah chu a lahvah a dingsah a,

³ Chihtahzetin ka hung hilh ahi, Na lamleet va, naupang neute bang na hung hih louh uleh, vaan lalgam ah na luut het sih diing uh.

⁴ Hujiahin koipouh hi Naupang neu banga kingaingiam chu, hu mi ngei chu vaan gam ah a lianpen diing.

⁵ Huleh koipouh hitobang naupang khat keimah min a kipaahpih chu kei hung kipaahpih ahi.

Midangte daal louh diing

⁶ Hizongleh koipouh keimah hung gingta mi neute laha khat zong puuhsah chu a ngawng ah suang sumheeh lianpi awhsah in tui khang lian thuuhtah ah kheluut leuh amah diingin a hoihzaw hi.

⁷ Puuhnate jiahin khovel tung a gih hi! puuhnate chu hung um diing mawng ahi a; hizongleh puuhna umsahtu tung a gih hi!

⁸ Huleh na khut aha na keeng aha in ahung suhpuuh leh, saattan inla paaimang in; khut nih aha keeng nih aha nei a kumtuang mei a paih a um sangin, piangsual a, ahihlouhleh keengbaai a hinna a luut nang a diingin a hoihzaw hi.

⁹ Huleh na mit in ahung suhpuuh leh kheikhia inla, paaimang in; mit nih nei a gawtmun mei a paih a na um sangin, mit khat nei a hinna a luut nang a diingin a hoihzaw hi.

¹⁰ Hi mineute laha khat zong simmoh lou diingin pilvaang un; ajiahchu a angelte un vaan a um ka Pa meel a en zing uhi, chih ka hung hilh ahi.

¹¹ Mihing Tapa chu beimangte hundam diinga hung ahi ngal a.

Belaam mang tehkhinthu

¹² Bang na chi ngaih viai? Mi khat in belaam zakhat nei henla, a lahva khat vaahmang taleh, sawmkuaah leh kuaahte chu nusia in, taang a chiah in, a vaahmang pen va hawl lou diing ahiai mah?

¹³ Huleh va mu kiitta henla hileh, chihtahzetin ka hung hilh ahi, sawmkuaah leh kuaah vaahmang loute tungah sangin, hu belaam pen tungah a kipaahzaw diing hi.

¹⁴ Huchimah bangin hi mineute laha khat zong a manthai diing hi na Pa uh vaan a um deihlam ahi sih hi.

Silsual bawlte ngaihtuahdan diing

¹⁵ Huleh na unau na tunga a tatleeh leh, chiah inla nang leh amah chauh heet in a khelhna chu va hilh in; ama'n na thu a ngaih leh na unau na zou ahi ding.

¹⁶ Hizongleh a ngaihkhiah louh inchu, heetpihtu nih aha, thum aha kama thu a kichetna diingin, mi khat aha nih aha tonpih in.

¹⁷ Huleh amahuh a ngaihkhiah nuam louha ahihleh, kouhtuamte kawmah tut in; huleh kouhtuamte thu zong a ngaihkhiah saam louh inchu amah chu nang a diingin ginglou leh siahdongmi bang hi heh.

¹⁸ Chihtahzetin ka hung hilh ahi, Leitung a na kaan photmah u’chu vaan a zong kaan ahi diing a; huleh leitung a na phel photmah uh vaan ah phel ahi diing hi.

Kituaaha haamteina

¹⁹ Huleh na kawmvah ka soi kiit hi, Leitung a na lahva mi nih a sil nget diing va a kithutuah uleh ka Pa vaan a um bawlsah in a um diing uhi.

²⁰ Ajiahchu mi nih aha, thum aha ka min a, a kikhopna photvah a lahvah ka um jel ahi, a chi hi.

Ngaihdamna natoh leh kipaahnadan he lou suaah tehkhinthu

²¹ Huin Peter a kawmah a hung a, Lalpa, ka unau in bangzat vei ahiai ka tunga a khelh leh ka ngaihdam diing? Sagih vei tanin ahi diai? a chi a.

²² Jesu’n a kawmah, Sagih vei chiang ka hung chi sih hi; sagih vei mun sawmsagih tanchiang ka hung chi zaw ahi.

²³ Hujiahin vaan lalgam chu kumpipa koi aha a suaahte kawma sum hisaap suhfel tum toh tehkhin ahi.

²⁴ Ahung suhfel pat a ahihleh, mi khat talent saangsawm ba a kawmah ahung pui va.

²⁵ Hizongleh ama’n piah diing a neih louh tahin a pu in chu amah, a ji leh a tate toh, huleh a neih zousiah toh zuah a dit diing thu a pia a.

²⁶ Hujiahin suaahpa’n chu khupboh in a bia a, Pu, ka tungah thuaahthei tadih inla, a bawn in ka hung dit diing, a chi a.

²⁷ Huin hu suaahpa pu in amah chu a hehpihta mahmah a, a hah a, a bat a ngaidamta hi.

²⁸ Hizongleh hu suaahpa chu a pawt a, a suaah hihpihte laha khat amah sum zakhat ba chu a va mu a, amah chu a man a, Na bat hung pia in chi'n a lawl a meeh a.

²⁹ Huchi'n a suaah hihpihpa chu a keeng bulaha puuh a, Ka tungah thuaahthei tadih in, ka hung dit veh diing, chi'n a ngen a.

³⁰ Ahihvangin amah a ut sih a; a bat a dit zoh masiah suangkul ah ava khumta a.

³¹ A suaah hihpihte'n a silbawl chu a muh un, a lunghimoh mahmah va, huleh a hung va, sil umtan zousiah a pu uh ahung hilhta uhi.

³² Huphetin a pu in amah chu a kou a, a kawmah, Aw suaah giloupa, na hung nget ngutngut jiaha na bat zousiah hung ngaidam hi’nga;

³³ Ke’n nang ka hung hehpih banga nang zong na suaah hihpihpa na hehpih sam diing hilou maw? a chi a.

³⁴ Huin a pu chu a thangtawmta a, a bat zousiah a ditzoh masiah migawtte kawmah a peta hi.

³⁵ Nanguh koipouh in na lungtang tah va na unaute a tatleehna uh na ngaihdamlouh uleh, Vaan a um ka Pa’n zong huchibangin na tungvah a bawl ve diing ahi, a chi hi.