MATTHAI 17 - Thuhun Thah (BSI)

Jesu meelkilimdanna

¹ Huleh ni guup nungin Jesu’n Peter toh, Jakob toh, huleh a unaupa John toh a tonpih a, a tuamin taang saang tung khat ah a puitou a,

² A ma vah a meel ahung limdangta a; a maai ni bangin ahung taang a, a puansilhte chu vaah bangin ahung vaam hi.

³ Huleh, ngai in, Mosi leh Elijah a kawmva hung kilaah in amah toh a kihou uhi.

⁴ Huin Peter in Jesu a houpih a, a kawmah, Lalpa, ei a diingin hitaha um a hoih hi; na ut leh hi-ah bawh thum i bawl diing a, nang a diingin khat, Mosi diingin khat, Elijah diingin khat, a chi a.

⁵ A soi laitahin, ngai in, mei vaahtahin amahuh ahung khuhta a; huleh, ngai in, hu mei lah apatin aw khat in, Hichu ka Tapa deihtah ahi, amah ah ka kipaah mahmah hi; amah thu ngai un, a chi a.

⁶ Huleh nungjuite’n huchu a jah un, bohkhup in a puuh va, a lau mahmah uhi.

⁷ Huin Jesu a hung a, amahuh a khoih a, Thou unla, huleh lau sih un, a chi a.

⁸ Huleh a daahdoh uleh, Jesu chauh lou chu, koimah dang a mu sih uhi.

⁹ Huleh taang apata ahung kumsuh un, Jesu’n amahuh thu a pia a, Mihing Tapa misi lah apat a thoh kiit masangsiah hi na sil muh uh koimah hilh sih un, a chi a.

¹⁰ Huin a nungjuite'n a kawmah, Ahihleh bang diinga lehkhagialtute'n, Elijah hung masa diing ahi, chi ahi viai? chi'n a dong va.

¹¹ Huleh Jesu’n a dawng a, Elijah chu a hung masa ngei diing a, silbangkim a bawlthah diing.

¹² Hizongleh ka hung hilh ahi, Elijah chu a hung zouta, amah a he sih va, a tungah a utut un a hih zouta uhi. Huchimahbangin mihing Tapa in zong a lahvah a thuaah saam diing, a chi a.

¹³ Huin nungjuite'n Baptistu John thu a kawmva soi ahi chih ahung heta uhi.

Pasal naupang dawimat suhdamna

¹⁴ Huleh mipi lah ahung tunun, koi aha mi khat a kawmah a hung a, a ma a khupdin in,

¹⁵ Lalpa, ka tapa tungah zahngai in; amah hi lungap vei ahi a, a gim mahmah hi; khatveivei chiah mei ah, huleh khatveivei chiah tui ah a puuh veu mei hi.

¹⁶ Huleh na nungjuite kawmah ka hung pui a, a sudam thei sih uhi, a chi a.

¹⁷ Jesu’n a dawng a, Ginna nei lou leh khang thah chihmoh haw, bangtan ahiai ka hung umpih diing, bangtan ahiai ka hung thuaah zoh diing? amah chu hi-ah ka kawmah hung pui un, a chi a.

¹⁸ Huin Jesu’n dawi chu a vau a; a sunga kipatin a pawtta a; huleh naupang chu hu hun ngeiin a damta hi.

¹⁹ Huin nungjuite chu a tuamin Jesu kawmah a hung va, Bang diinga kei un nohdoh thei lou ka hi viai? a chi va.

²⁰ Huin Jesu’n a kawmvah, Na gintaat louh jiahun ahi; chihtahzetin ka hung hilh ahi, Ankamtang khat bang ginna na neih uleh, hi taang kawmah, Hi apatin hu lamah kituan in, na chi diing va, a kituan mai diing; nanguh diingin sil bawltheih louh mawngmawng a um sih diing.

²¹ Bang hitaleh hichibang zaw haamteina leh angawlna loungalin a pawtdoh sih hi, a chi hi.

Jesu’n a sih diing thu a soilawh nihveina

²² Huleh Galili a, a um laiun, Jesu’n a kawmvah, Mihing Tapa chu mite khuta matsah in a um diing hi;

²³ Huleh amah chu a that diing va, huleh a ni thum ni’n kaihthoh in a um diing, a chi a. Huchi'n a lungkham mahmahta uhi.

²⁴ Huleh Kepernaum ahung tunun, Pathian biahinn sum dongte Peter kawmah a hung va, Na houtupa un biahinn siah pe veu saam lou ahi maw? a chi va.

²⁵ Ama’n chu, Pe veu e, a chi a. Huleh Peter chu inn sunga ava luut leh Jesu’n a kawmah, Simon, bang na chi ngaih ei? Lei a lalte’n siah hiin, sum siah hitaleh koite lahah ahiai a laah jel uh? a tate uh lahah ahiai, mi tuam lahah? chi'n ana soikhalh a.

²⁶ Peter in a kawmah, Mi tuam lahah, a chi a. Jesu’n a kawmah, Huchi ahihleh tate awl a ve maw.

²⁷ Hitamahleh, nang tuipiah va chiah inla, ngakuai vakhai inla, nga na khaidoh masatpen la in; huleh a kam keeh lechin dangka tengkhat na mu diing; huchu la inla, kei leh nang a dingin a kawmvah pia in, huchilou inzaw i sulunghimohkha diing, a chi hi.