MATTHAI 15 - Thuhun Thah (BSI)

Jesu’n lehkhagialtute leh Pharisaite a taina

¹ Huin Jerusalem khua a um lehkhagialtute leh Pharisaite Jesu kawmah a hung va,

² Bang diinga na nungjuite upate thugousiah a taleeh veu ahi viai? chih chu, an a neeh chiangun a khut uh a sil ngei sih uhi, a chi va.

³ Hizongleh ama’n a dawng a, a kawmvah, Nangun zong bang diinga na thugousiah jiah va Pathian thupiah a taleeh na hi viai?

⁴ Pathian in, Na nu leh na pa zah in, huleh, A nu leh a pa aha housia chu si jiang heh, a chi ngal a.

⁵ Hizongleh nangun chu, Koipouh a nu aha a pa aha kawma, Keimah na hung phattuampihna diing photmah, Pathian kawma piah ahita, chi photmah in;

⁶ A nu leh a pa a jah diing ahi sih a, a zalen diing hi, na chi va. Huchibangin na thugousiah jiahun Pathian thupiah bangmahlou na suaahsahta uhi.

⁷ Nanguh milepchiahte aw, Isai in, na tungtaang thu uh ana soilawh kha ngeel hi.

⁸ Hi mite’n a kam un ahung naih va, a muuh un ahung zahbawl uh; hizongleh a lungtang un ahung gamlaat uhi.

⁹ Abang abang hileh amahun a thuhilhna va mihing thupiah a hilh jiahun, ahung be thawn uhi, ana chih chu, a chi a.

¹⁰ Huin ama’n mipite a kou a, a kawmvah, Ngai unla, hesiam un;

¹¹ Kam a luut in mi a suniin sih; hizongleh kam a pawt in, hu ngei in mi a suniin hi, a chi a.

¹² Huin a nungjuite a hung va, a kawmah, Pharisaite’n hi thu a jah va a lunghih louh uh na he ei? a chi va.

¹³ Hizongleh ama’n a dawng a, Kung chin ka Pa vaan a um suan louh chu bohkhiah in a um diing.

¹⁴ Hite haw ngaihsah sih un; amahuh chu mittaw lamkaite ahi uhi. Mittaw in mittaw mah a pui inchu, kokhuuh ah a kekhawm diing uh, a chi a.

¹⁵ Huin Peter in a dawng a, a kawmah, Hi tehkhinthu ka kawmvah hung hilh chianta’n, a chi a.

¹⁶ Huin Jesu’n, Tutana nanguh zong heetsiamna beia um na hi u'maw?

¹⁷ Kam a luut photmah gil sungah a luut a, huleh dailenna ah paihkhiah in a um chih, na theisiam nai sih u'maw?

¹⁸ Hizongleh kama pawtte chu lungtang a kipana hung pawt ahi a, hute’n chu mi a suniin hi.

¹⁹ Ajiahchu lungtang a kipatin ngaihtuahna giloute, tualthahnate, aangkawmnate, kingaihnate, guuhtaatnate, a tahlou heetpihnate, soisiatnate ahung pawt veu hi.

²⁰ Hute chu ahi mihing suniin; khut sil louha an neeh in mi a suniin sih, a chi hi.

Jentel numei tanu suhdamna

²¹ Huin Jesu hu apatin a pawt a, Tura leh Sidon gam lamah a chiahta a.

²² Huleh, ngai in, hu gam mah apatin Kana an numei khat ahung pawt a, kikou in a kawmah, Aw Lalpa, David Tapa, ka tungah zahngai in, ka tanu dawimatin a gim mahmah hi, a chi a.

²³ Hizongleh ama’n chu kam khat in zong a dawng sih hi. Huin a nungjuite a hung va, a kawmah, Amahnu hi sawlmang in; i nungah a kikoukou ngal a, a chi va.

²⁴ Ama’n a dawng a, Israel nam belaam mangte kawm loungal ah sawl ka hi sih, a chi a.

²⁵ Huin numeinu a hung a, Lalpa, hung panpih in, chi’n a bia a.

²⁶ Hizongleh ama’n a dawng a, tate tanghou laahsah a uite kawma piah a kilawm sih, a chi a.

²⁷ Huin amahnu’n, Lalpa, hihzaw ahi a, hizongleh uite’n zong a pu uh dohkaan apat tanghou them kia a ne saam uhi, a chi a.

²⁸ Huin Jesu’n a kawmah, Numei, na ginna thupi hina mai e; na deih bangtahin na tungah um heh, a chi a. Huchi’n a tanu chu hu hun ngei in a damta hi.

Mi tampi suhdam in a um uh

²⁹ Huleh Jesu chu hu apatin a chiah a, Galili tuipi kawm ahung tung a; huin taang ah a chiahtou a, huah a touta a.

³⁰ Huleh mipi nasatah, keengbaite, mittawte, haamthei loute, piangsualte, leh midang tampi hung pui in, a kawmah a hung va, amahuh chu Jesu keengbul ah a koih va, ama’n ana sudam chiat a.

³¹ Huchia haamtheiloute hung haama, piangsualte hung hoiha, keengbaite keeng a hung pai leh, mittawte’n hung mu theita uh, chih a muh un, mipite’n thum ah a sa va; huchi'n Israelte Pathian chu a paahtawita uhi.

Saangli vaahna

³² Huin Jesu’n a nungjuite a kawmah a kou a, Mipite tuin ka kawmah ni thum a umta va, neeh diing bangmah a neih louh jiahun, ka hehpih mahmah hi; huleh amahuh angawl in ka chiahsah nuam sih hi, huchilouin zaw lamkal ah a sawlsam kha diing uh, a chi a.

³³ Huin a nungjuite’n a kawmah, Mipi hizah tate vaahna thamzet tanghou hu zaatpi gamdai ah khoi apatin i mu diai? a chi va.

³⁴ Huin Jesu’n a kawmvah, tanghou beu bangzah na nei viai? a chi a. Huin amahun, Beu sagih leh nga neu tawmtakhat, a chi va.

³⁵ Huin ama’n mipi chu tual a tou diingin thu a pia a.

³⁶ Huin tanghou beu sagih leh ngate chu a la a, kipaahthu a soi a, a balkeeh a, nungjuite kawmah a pia a, huleh nungjuite’n mipite kawmah a pia uhi.

³⁷ Huleh a bawnun a ne va, a vah chiatta uh; huleh a neeh val uh anneng chu bawm sagih a luaahdim uhi.

³⁸ Huleh a nete chu numei naupang sim louhin, piching saang li ahi uhi.

³⁹ Huin mipite chu a sawlmang a, kuang ah a tuang a, Magdala gam lamah a hungta hi.