MATTHAI 14 - Thuhun Thah (BSI)

Baptistu John sihna

¹ Hu hunlaiin kumpipa Herod in Jesu thu kithang ana ja a,

² A suaahte kawmah, Hichu Baptistu John ahi; amah chu misi lah apat a thoudoh kiitta a; hujiahin silmah bawltheihnate’n amah a kilangin nna hung tawng ahita ve, a chi a.

³ Ajiahchu Herod in a unaupa Philip ji Herodia jiahin, John chu mansah in ana kaan a, suangkul ah ana khumta hi.

⁴ John in a kawma, Amahnu na neih a siang sih, a chihsah jiahin.

⁵ Huleh ama’n amah chu thah ut mahleh, mipite a lau a, amahun John chu zawlnei hia a ngaih jiahun.

⁶ Hizongleh Herod pian ni ahung tun in, Herodia tanu chu a ma vah a laam a, Herod chu a kipaahsahta a.

⁷ Huchi ahih jiahin amahnu chu a nget photmah pe diing a kihaahsial in thu a chiamta hi.

⁸ Huleh amahnu’n chu a nu thufuih in, Baptistu John lutang kuang khat in hi-ah hung pia’n, a chi a.

⁹ Huin kumpipa chu a lungdongta a; ahihvangin a kihaahsialna leh a ankuang uumpihte haw jiahin, piah diingin thu a pia a.

¹⁰ Huleh mi a sawl a, suangkul sunga John lu a va tansahta a.

¹¹ Huleh a lutang chu kuang khat in ahung dom va, naupangnu chu a pia va, huleh ama’n a nu kawmah ahung tawita hi.

¹² Huin a nungjuite a hung va, a luang chu a la va, a vui va, huleh a chiah va, Jesu a va hilhta uhi.

¹³ Jesu’n hu thu a jah in, hu apatin kuang a kitawl in gamgaw lamah a chiah tuamta hi; Huleh mipi’n a jah tahun, khopi a kipan a keeng va chiah in a juita va.

¹⁴ Huleh Jesu ahung paikhiah in, mipi nasatah a mu a, a hehpih mahmah a, a damloute uh a suhdamsah hi.

Saang ngaa vaahna

¹⁵ Huleh nitaahlam ahung hihin, a nungjuite a kawmah a hung va, Hi mun gamgaw ahi a, huleh ni la a vaigeita a; khuate a chiah a, neeh diing a va lei theihna diingun mipite sawlkheta in, a chi va.

¹⁶ Huleh Jesu’n a kawmvah, A chiahmang uh a ngai sih; nangun neeh diing pia un, a chi a.

¹⁷ Huin amahun a kawmah, Hiah tanghou ngaa leh nga nih chauh i nei uhi, a chi va.

¹⁸ Ama’n Hiah ka kawmah hung tawi un, a chi a.

¹⁹ Huin mipite chu hampa tunga tou diingin thu a pia a, tanghou beu ngaa leh nga nih chu a la a, vaan lam en in, vang a pia a, a balkeeh a, tanghou te chu a nungjuite a pia a, huin nungjuite’n mipite kawmah a pia uh.

²⁰ Huleh a bawnun a ne va, a vah chiatta va; a neeh val nenguh bawm sawmlehnih a luaahdim uhi.

²¹ Huleh a nete chu numei leh naupang sim louhin piching saang ngaa vel ahi uhi.

Tuitungah Jesu keeng in a pai

²² Huleh mipite a sawlmang kal a, ana chiah a, gaal lehlam a, ana kai masa diingin a nungjuite kuang ah a tuangsah teitei a.

²³ Huleh mipite chu a sawlmang zohin, haamtei diingin taang ah a tuamin a chiahtou a; huleh nitaahlam ahung hihin, huah a tangin a umta a.

²⁴ Hizongleh kuang chu tuipi lailung ah a um a, huih a lehnun jiahin tuikinawh in a seep lehleh a.

²⁵ Huleh khovaah kuan laiin, Jesu chu tuipi tunga keeng a pai in a kawmlam uh ahung zu an a.

²⁶ Huleh nungjuite’n amah chu tuipi tunga keeng a, a pai a muh un, Siha ahi chi'n, a buaita va; lauin a kikouta uhi.

²⁷ Hizongleh Jesu’n amahuh ahung houpihpah a, Hamuangtahin um un; Keimah ka hi; lau sih un, a chi a.

²⁸ Huin Peter in a dawng a, Lalpa, nang na hihleh, tui tunga na kawma hungna diing thu hung pia in, a chi a.

²⁹ Huin ama’n, Hung in, a chi a. Huin Peter chu kuang apatin a kum a, Jesu kawma chiah diingin, tui tungah keeng in a paita a.

³⁰ Hizongleh huih nung chu a muh in, a lau a; huleh tum diingin a kisa a, Lalpa, hung hundam in, chi’n a kikouta a.

³¹ Huin Jesu’n a zampah a, a man a, Nang ginna tawmpa, bang diinga ginglel na hiai? a chi a.

³² Huleh amahuh kuang sunga a tuan tahun huih chu a sipta hi.

³³ Huin kuang a umte’n, Pathian Tapa tahzet na hi, chi'n amah a bia uhi.

³⁴ Huleh a gaalkai uleh Genesaret gam ahung tungta va.

³⁵ Hu mun a mite’n amah thu a heet tahun, hu kiima gam chinah mi a sawl va, damlou zousiah a kawmah ahung pui va;

³⁶ Huleh a puanmong beeh khoih theih a ngen va; huchi’n a khoih photmah a dam jel uhi.