MATTHAI 11 - Thuhun Thah (BSI)

¹ Huleh hichi ahung hi a, Jesu’n a nungjui sawmlenihte thu a piah zohin, hu apatin khuate a thuhilh diing leh thusoi diingin a chiahta hi.

² Huin John in suangkul sung apat Khrist natohte ana jah in, amah nungjuite nih a sawl a,

³ A kawmah, A hung diingpa na hiai mah, ahihlouhleh a dang khat ngaah diing ka hi viai mah? a va chisah a.

⁴ Jesu’n a dawng a, a kawmvah, Chiah unla, na jah uleh na muh uh John va hilh un;

⁵ Mittawte mit ahung vaahta a, keengbaite a chiah theita va, phaahte ahung siangthouta va, bilngongte’n khua a ja theita va, misite kaihthoh in a umta va, huleh migentheite’n tanchinpha soi a dongta uhi.

⁶ Huleh koipouh keimah a lunghihlouhna mu lou chu a hampha hi, a chi a.

⁷ Huin amahuh a chiah tahun, Jesu’n mipi kawmah John thu a soi panta a, Bang en diing a gamdai a chiahdoh na hi viai? sialluang huih muut liing maw?

⁸ Ahihlouhleh, bang en diing a chiahdoh na hi viai? Puannem silh mi khat maw? ngai in puannem silhte chu kumpite inn ah ahi a um uh

⁹ Ahihlouhleh bang en diing a chiahdoh na hi viai? zawlnei en diingin maw? ahi, ka hung hilh ahi, zawlnei sanga zong loupizaw ahi.

¹⁰ Ajiahchu, "Ngai in, ka thangkou na ma ah ka sawl a, ama’n na ma ah na lampi a bawl diing hi, chia a thu kigial chu amah ahi".

¹¹ Chihtahzetin ka hung hilh ahi, Numei sunga piang lahah Baptistu John sanga lianzaw a piang nai sih; ahihvangin vaan lalgam a mi neupen zong amah sangin a lianzaw hi.

¹² Huleh Baptistu John um apat tutanin vaan lalgam in pawngbawlna a thuaah zing ahi, huleh pawngbawlte’n haat thuin a la veu uhi

¹³ Ajiahchu zawlneite zousiah leh daan thu in John hung um tanphain ana soilawhta ahi.

¹⁴ Huleh nangun na pom nuam uleh, hichu Elijah hung diingpa khu ahi.

¹⁵ Koipouh jahna diing a bil nei in ja heh.

¹⁶ Hizongleh tulai khang thahte hi bangtoh ka tehkaah diai? hichu naupang dawlmun a tou a, a lawmte kou a,

¹⁷ Theile hung muutsah unga lah, laam lou u’china, huleh kap unga lah, na hung dahpih sih uh, chite bang ahi uh.

¹⁸ Ajiahchu John a hung a, ne in a dawn sih a, Dawi nei ahi, a chi va.

¹⁹ Mihing Tapa a hung a, a ne in a dawn a, En un, an haipa, uain haipa, siahdongte leh misualte lawmpa, a chi uh, hizongleh pilna chu a natohte’n a siamtan hi, a chi hi.

Ginglou khopite tunggihna

²⁰ Huleh a kisiih louh jiahun, a sil loupi bawltamna pen khuate chu a taita a:

²¹ Korazin, na tung gih e! Bethsaida, na tung gih e! ajiahchu nanguh a sil loupi kibawlte Tura leh Sidon khua a kibawl hileh, saiippuan silh a vut khuh in a kisiihta diing uhi.

²² Hizongleh ka hung hilh ahi, Vaihawm ni chiangin nanguh thuaah diing sangin Tura leh Sidon kho thuaah diing a dan a um zaw diing.

²³ Huleh nang Kepernaum, vaan tana tawisanga um chu, misi kho tana paihkhiah in ahi na um diing; ajiahchu nangmah a sil loupi kibawlte Sodom khua a kibawl hileh, tuni tanin a um nalai diing hi.

²⁴ Hizongleh ka hung hilh ahi, Vaihawm ni chiangin nang thuaah diing sangin Sodom kho thuaah diing chu a dan a um zaw diing hi," a chi hi.

²⁵ Huchihlaiin Jesu’n a dawng a, Aw, Pa, vaan leh lei Lalpa, nang mipil leh misiamte kawmah hi thute na iim a, naupangte kawma na phuan jiahin ka hung phat ahi.

²⁶ Ahi, Pa, huchibang chu nang ngaihin a hoih ahi.

Jesu mi kouhna

²⁷ Ka pa’n sil zousiah ka kawmah ahung pekheta hi; huleh, Pa lou in koima’n Tapa chu a he sih uh; huleh Tapa leh, Tapa’n a kawma a phuan nuamnate chihlouh in koima'n Pa a he sih hi.

²⁸ Nanguh tonggim leh puaahgih pote zousiah ka kawmah hung un, keima’n khawldamna ka hung pe diing hi.

²⁹ Ka ngawngkol pua unla, ka kawmah zil un, ajiahchu jainemtah leh lungtang a kingaingiamtah ka hi; huchi’n na hagau diingun khawldamna na mu diing uhi.

³⁰ Ajiahchu ka ngawngkol a nuam a, ka puaah zong a zang hi, a chi hi.