MATTHAI 1 - Thuhun Thah (BSI)

Jesu pianna khanggui

¹ Abraham tapa, David tapa, Jesu Khrist khanggui thu bu.

² Abraham in Isaak a hing a; Isaak in Jakob a hing a; Jakob in Juda leh a sanggamte a hing a;

³ Huleh Juda in Tamar lahah Phares leh Zara a hing a; Phares in Esrom a hing a; Esrom in Aram a hing a;

⁴ Huleh Aram in Aminadab a hing a; Aminadab in Naasson a hing a; Naasson in Salmon a hing a;

⁵ Huleh Salmon in Rahab lahah Boaz a hing a; Boaz in Ruth lahah Obed a hing a; Obed in Jesse a hing a;

⁶ Jesse in kumpipa David a hing a, Kumpipa David in Uria ji lahah Solomon a hing a.

⁷ Huleh Solomon in Rehoboam a hing a; Rehoboam in Abia a hing a; Abia in Asa a hing a;

⁸ Huleh Asa in Jehosaphat a hing a; Jehosaphat in Joram a hing a; Joram in Ujia a hing a;

⁹ Huleh Ujia in Joatham a hing a; Joatham in Achaz a hing a; Achaz in Ezekia a hing a;

¹⁰ Huleh Ezekia in Manasseh a hing a; Manasseh in Amon a hing a; Amon in Josia a hing a;

¹¹ Huleh Josia in Babylon gama a puimang laiun Jekonia leh a sanggamte a hing a;

¹² Huleh Babylon lama a puimang nungun Jekonia in Salathiel a hing a; Salathiel in Zerubbabel a hing a;

¹³ Huleh Zerubbabel in Abiud a hing a; Abiud in Eliakim a hing a; Eliakim in Azor a hing a;

¹⁴ Huleh Azor in Sadok a hing a; Sadok in Akim a hing a; Akim in Eliud a hing a;

¹⁵ Huleh Eliud in Eleazar a hing a; Eleazar in Matthan a hing a; Matthan in Jakob a hing a;

¹⁶ Huleh Jakob in Mari pasal Joseph a hing a; hu Mari apatin Khrist kichi Jesu chu ahung piangta hi.

¹⁷ Huchi'n khang zousiah chu Abraham apat David chiang khang sawmleli; huleh David apat Babylon gam a, a puimang chiang uh khang sawmleli; huleh Babylon gama, a puimang vapat Khrist chiang khang sawmleli ahi.

Jesu pianna

¹⁸ Huchi'n Jesu Khrist hung piandan chu hichi ahi; A nu Mari chu Joseph toh a kikhaam laiun, a umkhawm ma un, Hagau Siangthou apat gaai chih a kihedohta a.

¹⁹ Huin a pasal Joseph chu midihtah ahi a, zapi heet a um diing ut louin a guuha khul a tumta a.

²⁰ Hizongleh ama’n hi thute a ngaihtuah laiin, a mang in Lalpa angel a kawmah ahung kilaah a, "Joseph, nang David tapa, na ji Mari kiteenpih diing lau sin; ajiahchu a naupaai hi Hagau Siangthou apat ahi.

²¹ Tapa ahung nei diing a, a min Jesu na sa diing hi ajiahchu Ama’n a mite a sualna vapat a hundam diing hi," a chi hi.

²² "Huleh hi sil zousiah chu Lalpa’n zawlnei kama ana soite a taangtunna diing a hung um ahi.

²³ Ngai un, nungaah siangthou a gaai diing a, tapa a nei diing a, a min Immanuel a chi diing uh, huchu i kawmah Pathian a um chihna ahi."

²⁴ Huin Joseph chu ihmu a thou a, Lalpa angel in thu a piah bangin a bawl a, a ji chu a kiteenpihta hi.

²⁵ Hizongleh amahnu in a tapa masapen ahung neihkhiah masiah a luppih sih; huleh a min Jesu a sata hi.