MARK 9 - Thuhun Thah (BSI)

Taang a meel kihendangna

¹ Huin ama’n a kawmvah, Chihtahzetin ka hung hilh ahi, Hi muna dingte khenkhat chu Pathian gam silbawltheihna toh hung tung a muh masiah uh sihna chiam lou diing a um uh, a chi a.

² Huleh ni guup nungin Jesu’n Peter toh, Jakob toh, John a pui a, a tuam in taang saang tung khat ah amahuh chauh a puitou a; huleh a ma vah a meel ahung kihengdangta hi.

³ Huchi'n a puansilh chu leitung a puansawp koimah in huchibanga a sawp ngou theih louh diing khopin, vuuh bang mai in a ngou in a ngou a,

⁴ Huleh Elijah leh Mosi a kawmah ahung kilang va; Jesu toh a kihou khawm uh.

⁵ Huin Peter in a houpih a, a kawmah, Houtupa, ei uh diingin hitaha um a hoih hi; buuh thum i bawl diing a; khat nang a diingin, khat Mosi a diingin, huleh khat Elijah a diingin, a chi a.

⁶ Ajiahchu, a lau mahmah jiahun a soi diing pen zong a he sih hi.

⁷ Huin meilum lom khat in amahuh ahung liah a; huleh meilum laha kipanin aw ahung ging a, Hichu ka Tapa deihtah ahi; a thu ngai un, a chi a.

⁸ Huleh kintah a, a kiimvel uh a etpah uleh, Jesu chih louh a kawmvah midang koimah a muta sih uhi.

⁹ Huleh taang apat ahung kumsuh laiun, mihing Tapa misi laha kipan a thohkiit masiah a sil muhte uh koimah hilh lou diingin a khap chat hi.

¹⁰ Huleh hu thu chu a lungsim vah a vom zing va, Misi lah apat a thohkiit chih pen bang chihna hi diing a diai? chi'n a kidong uh.

¹¹ Huleh amahun, Bang diinga lehkhagialtute’n Elijah hung masa diing ahi chi ahi viai, chi'n amah a dong va.

¹² Huleh ama’n a dawng a a kawmvah, Elijah chu hung masa a, sil zousiah a bawl hoih diing mawng ahi; ahihleh mihing Tapa in sil tampi a thuaah diing a, huleh deih louhin a um ngei diing ahi, chia a tanchin bangchidana kigial a diai?

¹³ Hizongleh ka hung hilh ahi, Hu Elijah chu a hung zouta a, huleh a tanchin a gelh bang ngei un a tungah a utut uh a bawlta uhi, a chi a.

Pasal naupang dawimat haamthei lou suhdamna

¹⁴ Huleh amah a nungjuite kawma ahung tunin, a kiim va mipi nasatah leh lehkhagialtute’n amahuh ana nial uh a mu a;

¹⁵ Huleh mipi zousiah in amah a muh tahun limdang a sa mahmah va, a kawma tai in chibai a va buuh uh.

¹⁶ Huin ama’n lehkhagialtute kawmah, Amah u’toh bang kinial na hi viai? chi'n a dong a.

¹⁷ Huin mipi laha khat in a dawng a a kawmah, Houtupa, ka tapa haam thei lou dawi paai na kawmah ka hung pui hi;

¹⁸ A matna mun phot ah a heeh puuh jel a; huchi'n a chilphuan bua in, a ha bang a gawi a, a gawng deuhdeuh hi; huchi'n na nungjuite kawma hung nohdohsah un ka chih leh a bawl thei sih uh, a chi a.

¹⁹ Huin ama’n amah a dawng a, Aw ginna nei lou khang thahte, na kawm va bangtan ahiai ka um diing? bangtan ahiai ka hung thuaahtheih diing? amah chu ka kawmah hung pui un, a chi a.

²⁰ Huleh amah chu a kawmah ahung pui va; huleh dawi in amah chu a muh tahin naupang chu nasatahin a soisapah a; huchi'n tualah a puuh a, chilphuan bo zengzungin a kitaal lehleh hi.

²¹ Huleh ama’n a pa kawmah, Hichibang ahung hihna bangtan ahitai? chi'n a dong a. Huin ama’n, A naupan laia kipanin ahita.

²² Huchi'n amah hihlum diingin khatvei chiangin mei laiah leh tui lahah a sawn luut veu a; hizongleh nangin bang aha na bawl theih leh hung hehpih inla, hung panpih in, a chi a.

²³ Jesu’n a kawmah, Na gintaat theih phot leh a gingtate diingin sil zousiah ahithei hi, a chi a.

²⁴ Huin naupangpa pa chu a kikoupah a; huleh mithi luang pum in, Lalpa, ka gingta hi, ka ginlahna hung panpih in, a chi a.

²⁵ Huin Jesu’n mipi hung taikhawm a muh tahin dawiniin chu a tai a, a kawmah, Nang haamtheih louhna leh bilngonna dawi, thu ka hung pia hi, a sung apat hung pawt inla, luut kiit nawn sin, a chi a.

²⁶ Huin dawi chu a kikou a, nasatahin a soisa a, hu zohin ahung pawtta a; huleh naupang chu mi tampite’n, A si ahi, a chih diing khop un ahung umta hi.

²⁷ Hizongleh Jesu’n amah chu a khut in a tu a, a phong a, huleh ahung thouta hi.

²⁸ Huleh inn sunga ahung luut in a nungjuite’n, Bang diinga kei un nohdoh thei lou ka hi viai? chi'n a guuhdot va.

²⁹ Huleh ama’n a kawmvah, Hitobangte hi haamteina leh angawl na loungal in a pawt thei sih hi, a chi hi.

A sih diing leh thohkiit diing soilawhna nihveina

³⁰ Huleh hu a kipanin a chiahdoh va, Galili gam a tawnpeh va; huleh koimah heet diing a ut sih hi.

³¹ Ajiahchu a nungjuite thu a hilh a, a kawmvah, Mihing Tapa chu mite khut ah a kipedohta, huchi'n a that diing va, huleh a sih nung ni thum ni in a thou kiit diing, a chi a.

³² Hizongleh amahun a thusoi chu a hesiam sih va, dong laha dong ngam sih uhi.

Mi lianpen hih diing thu a kinialna

³³ Huleh amah chu Kapernaum khua ahung tung a, inn sunga a um laiin a kawmvah, Lampi a hu na kinialna uh bang ahiai? chi'n a dong a.

³⁴ Hizongleh amahuh chu a sipkeei uh; ajiahchu lampi ah koi ahiai lianpen diing, chi'n ahung kinial zouta uhi.

³⁵ Huin amah chu a tou a, sawmlenihte a kou a, a kawmvah, Mi koipouh a masapen hih ut chu a nunungpen ahi diing a, huleh mi zousiah natong in a um diing ahi, a chi a.

³⁶ Huin ama’n naupang neutakhat a kai a, a lailung vah a dingsah a; huleh a pom zohin a kawmvah,

³⁷ Mi koipouh ka mina hitobang naupang neutakhat sang chu kei hung sang ahi; huleh mi koipouh kei hung sang chu, kei hung sang hilouin ahung sawlpa sang ahi zaw hi, a chi hi.

Jesu’n kituambawlna a taina

³⁸ Huleh John in, Houtupa, mi khat na min a dawite nohdoh ka mu va, kei uh ahung zui sih a; huleh keiuh ahung zuih louh jiahin ka khapta uhi, chi'n amah a dawng a.

³⁹ Hizongleh Jesu’n, Khap sih un; ajiahchu ka min a sil loupi bawl ngal a, kei hung soise meimei thei mi a um sih hi,

⁴⁰ Ajiahchu koi hitaleh ei hung dou lou chu ei lam a pang ahi.

⁴¹ Mi koipouh ka min a hih jiah va, ka min a tuisih nou khat dawn diing a hung pia inchu, chihtahzetin ka hung hilh ahi, a kipaahman muh diing a taan hial sih diing hi.

Jesu’n gawtmun lauhuaizia a hilhna

⁴² Huleh koipouh kei hung gingta hi naupang neutatate laha khat zong supuuh chu, a ngawngah sumheeh suang lianpi ki-ohsah henla, tui khang lian ah kipaailuut leh amah diingin a hoihzaw diing hi.

⁴³ Huleh na khut in ahung suhpuuh leh tankhia in; khut nih nei a gawtmun mei mit thei lou a na chiah sangin, khut beia hinna a luut nang a diingin a hoihzaw hi.

⁴⁴ A than uh a sih louhna leh, mei kuang a mit louhna ah.

⁴⁵ Huleh na keeng in ahung suhpuuh leh tankhia in; keeng nih nei a gawtmun mei mit thei loua chiah sangin, keengbaai a hinna a luut nanga diingin a hoihzaw hi;

⁴⁶ A than uh a sih louhna leh, mei kuang a mit louhna ah.

⁴⁷ Huleh na mit in ahung suhpuuh leh khei khia in; mit lang nih nei a gawtmun mei kuang a paih a na um sangin mit langkhat nei a Pathian gam a luut nang a diingin a hoihzaw hi.

⁴⁸ A than uh a sih louhna leh, mei kuang a mit louhna ah.

⁴⁹ Ajiahchu michin mei kuang a soh-al in a um diing a, kithoihna chinteng chia soh-al in a um diing hi.

⁵⁰ Chi chu a hoih a; hizongleh chi in a alna mangsah taleh bangchi'n na alsah kiitta diviai? Nanguh ngeiah chi kineih unla, huleh khat leh khat kilem in um un, a chi hi.