MARK 7 - Thuhun Thah (BSI)

Jesu’n Pharisaite a taina

¹ Huin Jerusalem khua a kipan a hung Pharisaite leh lehkhagialtu koite aha a kawmah a hung va.

² Huleh amahun, a nungjuite khenkhat in khut niin pum a, chihchu khut sil lou a an a neeh uh a muh un, dih a sa sih va.

³ Ajiahchu Pharisaite leh Judate zousiah in upate thugousiah a juih zing jiahun, a khut uh hoihtah a sil louin an a ne ngei sih uhi.

⁴ Huleh dawl mun apat ahung chiangun, kisilzet louin an a ne sih uhi. Huleh thudang tampi juih diing a a muh uh a um a, hute chu noute, beelte, sumbeelte sil bang ahi.

⁵ Huin Pharisaite leh lehkhagialtute’n, Bang diinga na nungjuite’n upate thugousiah banga um lou a, khut silou a an ne ahi viai? chi'n amah a dong va.

⁶ Huin ama’n a dawng a, a kawmvah, Isaiah in nanguh milepchiahte thu ana soilawh dihten hi, Hi mite’n a muuh un ahung paahtawi va, hizongleh a lungtang uh kei apatin a gamla hi.

⁷ Bang hitaleh a thuhilhna va mihing thupiahte a hilh jiahun, ahung biah u’chu a thawn ahi, chih gelh bangin.

⁸ Ajiahchu nangun Pathian thupiah paampaih in, mihing thugousiah na tu uh; beelte leh noute sil bang; huleh a dang tampi huchibang silte na hawl uhi, a chi a.

⁹ Huleh ama’n a kawmvah, Na thugousiah uh na juih theihna diingun Pathian thupiah tangtahin na paampaih uhi.

¹⁰ Ajiahchu Mosi in, Na pa leh na nu zahbawl in; koipouh a pa aha, a nu aha housia chu si jiang heh, a chi a.

¹¹ Hizongleh nangun, Mi'n a pa aha, a nu aha kawma, Ka vanga na phattuamna diing uh Korban ahita, a chih inchu, (huchu Pathian kawma piah chihna ahi), amah chu a zalen diing, na chi uh.

¹² Huleh amah chu a pa aha, a nu aha diing a bangmah a bawlsah na phal sih uh;

¹³ Na thugousiah uh mi na piahsawn un Pathian thu bangmahlou na suahsah uhi; huleh huchi bang sil tampi na hawl uhi, a chi a.

¹⁴ Huin ama’n mipi zousiah a kawmah a kou a, a kawmvah, Na bawnun ka thu ngaikhia unla, hesiam un;

¹⁵ Mihing polam apat a, a sunga luut a, amah subuah thei bangmah a um sih; hizongleh amah apat a hung pawt silte, hute ngei chu mihing subuah ahi zaw hi.

¹⁶ Mi koipouh jahna diing a bil nei in ja heh, a chi a.

¹⁷ Huleh ama’n mipi nusia a innsung a, a luut zohin, a nungjuite’n hu tehkhinthu amah a dongchianta va.

¹⁸ Huin ama’n a kawmvah, Nanguh zong huchi lawm a heetsiam na bei na hi uh maw? Bang sil hitaleh polam a kipan a mihing sunga luut in amah a subuah thei sih;

¹⁹ Ajiahchu a lungtang sunga luut lou a, a gil sunga luut zaw a, neeh chinteng susiang a dailenna a pawtkhemei ahi chih he lou na hi viai mah? a chi a.

²⁰ Huleh ama’n, Mihing sunga kipan a hung pawt, hu ngei in mihing a subuah hi;

²¹ Ajiahchu sunglam a, mihing lungtang a kipanin, ngaihtuahna giloute, aangkawmnate, thanghuainate, tualthahnate,

²² Guuhtaatnate, huaihamnate, giitlouhnate, heemhaatnate, bevennate, kimitsiipnate, soisiatnate, kiletsahnate, leh ngolhuainate bang ahung pawt veu hi;

²³ Hi sil gilou zousiah chu sunglam apat hung pawt in mihingte a subuah veu hi, a chi hi.

Jentel numei tanu suhdamna

²⁴ Huin a thoua, hu a kipanin Tura leh Sidon gam kual sungah a chiahta a, inn khat ah a luut a, koimah heet diing a deih sih a; hizongleh a kiphual zou sih hi.

²⁵ Huchi'n numei khat, a tanu naupang khat dawiniin paai ahi a, a tanchin ana ja a, huleh a hung a, a keeng bulaha bohkhup a.

²⁶ Hu numeinu chu Grik mi ahi a, nam lam thu ah Sirophoniki mi ahi; amahnu in a tanu sunga dawi nohdohsah diingin a ngen hi.

²⁷ Hizongleh Jesu’n amahnu kawmah, Tate hung vah phot u’heh; tate tanghou laahsah a uite kawma piah a kilawm sih, a chi a.

²⁸ Huin amahnu in a dawng a, a kawmah, Hih zaw ahi, Lalpa, ahihvangin dohkaan nuaia uite’n zong tate anneng kia a ne veu uhi, a chi a.

²⁹ Huin ama’n amahnu kawmah, Na thusoi jiahin chiahta in; dawi chu na tanu sunga kipanin a pawtta hi, a chi a.

³⁰ Huleh amahnu a inn ahung tunin dawi chu a na pawtdohta a, a tanu, lupna a lum ahung muta hi.

Mi bilngong leh haamthei lou suhdamna

³¹ Huleh Tura leh Sidon gam kual sung apat pawt kiit in, Dekapoli gam lai tawnsuah peh in Galili diil ahung tungta a:

³² Huleh mi bilngong, haam zong haamchian thei lou khat a kawmah ahung pui va; a tunga a khut nga diingin a ngen va.

³³ Huin ama’n mipi lah apatin amah a puituam a, a khutzung in a bil sungte a khoih a, huin chil a siat a, huleh a lei a khoih a;

³⁴ Huin vaan lam en in a haaihuai a, a kawmah, Ephphatha, a chi a, huchu, Kihong in, chihna ahi.

³⁵ Huin a bilte ahung vang a, a leigui a kiphel a, huleh siangtahin a haam theita hi.

³⁶ Huleh ama’n koimah hilh lou diingin amah uh a khap a; hizongleh a khap nah pouh leh a soi phuang zaw sem uhi.

³⁷ Huleh soi theih louh khopin thumah a sa va, Ama’n sil zousiah a bawl hoih ta; bilngong lah khua a jasah a, huleh haamthei lou laha haamsahta, a chi uhi.