MARK 15 - Thuhun Thah (BSI)

Jesu Rome gamoptu Pilat ma a, a dinna

¹ Huleh jingkal ahung hihin, siampu lalte chu upate toh, lehkhagialtute toh, huleh vaihawmtute zousiah toh a kihoukhawm va, huleh Jesu chu a kaan va, a pui va, Pilat kawmah a pedohta uhi.

² Huin Pilat in, Judate Kumpipa na hi maw? chi'n a dong a. Huin ama’n a dawng a, a kawmah, Na chikha hi, a chi a.

³ Huleh siampu lalte’n thu tampiin a heeh va; hizongleh ama’n bangmah in a dawng sih.

⁴ Huin Pilat in a dong kiit a, Bangma a dawng lou maw? en in, ahung heehna zoujaite uh, a chi hi.

⁵ Hizongleh Jesu’n bangmah in a dawng tuan sih a; huchi'n Pilat in limdang a sa mahmah hi.

⁶ Huleh kuut ni chiangin a nget penpen uh suangkul taang khat ama’n a hahdohsah veudan ahi a.

⁷ Huleh a min Barabba kichi, a helna lama tualthat, a helpihte toh koltaang khawmkhat a um a.

⁸ Huleh mipi chu ngaihtaha kikou in, amahuh diing a a bawlsah veu banga bawl diingin a ngen va.

⁹ Hizongleh Pilat in a dawng a, a kawmvah, Judate Kumpipa hung hahdohsah leng na ut viai? a chi a.

¹⁰ Ajiahchu siampu lalte’n’ thangsiatna jiahin amah a pedoh uh ahi chih a he hi.

¹¹ Hizongleh siampu lalte’n chu, Barabba hung hahdohsah zaw in, chia ngen diingin mipite a chiilta uhi.

¹² Huin Pilat in a dawng a, a kawmvah, Ahihleh Judate Kumpipa na chih pa uh hi bang loh leng chi na hi viai? a chi kiit a.

¹³ Huin amahun, Kros ah kilhbehin, chi'n a kikou kiit va.

¹⁴ Huin Pilat in a kawmvah, Bang jiahin e, bang bawl sual a nei a ahiai? a chi a. Huin amahuh chu, Kros ah kilhbeh in, chi'n a kihahkou sem uhi.

¹⁵ Huchi'n Pilat in mipi suhlungkim a ut a, Barabba a hahdohsah a, huleh Jesu chu a jep zohin kros a kilhbeh diingin a peta hi.

Sepaihte’n Jesu a simmohbawlna uh

¹⁶ Huin sepaihte’n amah chu innpi sung, Praitorium a chih vah a pui va, huleh sepaih zousiah a kou khawm va.

¹⁷ Huleh amah chu puansandup a silhsah va, linglukhuh a phan va, a khuhsahta uhi.

¹⁸ Huleh, Chibai, Judate Kumpipa, chi'n chibai a buuh uhi.

¹⁹ Huleh a lu sialluang in a vua va, chil a siatkhum va, huleh khupdin in a bia uhi.

²⁰ Huleh chiamnuih bawlna a, a zat zohun, puan sandup chu a hawhkhia va, amah puan a silhsah kiit va, kros a kilhbeh diingin a puita uhi.

Jesu kilhbehna

²¹ Huleh mi pailai khat, gam lama kipana hung, Cyrene gam mi Simon, Alexander leh Rufa pa chu a kros po diingin amah va.

²² Huleh amah chu Golgotha munah a pui va, huchu, Luguh mun, chihna ahi.

²³ Huleh uain murrah toh kihal dawn diingin a pia va; hizongleh ama’n a sang sih hi.

²⁴ Huleh kros a, a kilhbeh zohun, a tan diing chiat uh heetna diing a aai saan in, a puansilhte chu a kihawmta uhi.

²⁵ Huleh amah a kilhbeh hun u’chu daah thumna ahi.

²⁶ Huleh a heehna uh heetsahna, a tungah, Judate Kumpipa, chi'n a kigial hi.

²⁷ Huleh amah toh miguta nih a kilhbeh va; khat a jiatlam ah, huleh khat a veilam ah.

²⁸ Huchi'n Pathian lehkhathu, Amah chu mi tasualte toh simkhawm ahi, chih chu a taangtungta hi.

²⁹ Huleh mi chiahleh vaahleh zousiah in a lu uh thingkawm in, Ehei, nang Pathian biahinn susia a ni thum a sadoh kiitpa,

³⁰ Nangmah kihuhing inla, huleh kros apat hung kumkhia in, chi'n a elhou uhi.

³¹ Huchibang mahin siampu lalte’n zong a elhou va, lehkhagialtute toh amah leh amahuh kihou in, Ama’n midang a huhinga, amah a kihuhing thei sih.

³² Israelte Kumpipa Khrist chu tuin kros apat hung kumkhia heh, i muh a, huleh i gintaat theihna diingun, a chi va. Huleh kros a, a kilhbehkhawmte un zong amah a housia uhi.

Jesu sihna

³³ Huleh daah guupna ahung hihin, gam pumpi tungah sim ahung zing a, daah kuaahna ahih mateng khua a mialta hi.

³⁴ Huleh daah kuaahna ah Jesu chu aw ngaihtahin a kikou a, Eloi, Eloi, lamasabakthani? chi'n. Huchu, Ka Pathian, ka Pathian, bang diinga hung taisan na hiai? chihna ahi.

³⁵ Huleh a kawma dingte khenkhat in hu a jah un, Ngai un, Elijah a kou hi, a chi va.

³⁶ Huleh mi khat a tai a, spanji khat uain thuuh a diah dimin, sialluang chiang dawnah a taah a, dawn diingin a pia a, Ngaihsah sih un; amah lakhe diingin Elijah ahung ngeel eimah i en diing uh, a chi uhi.

³⁷ Huin Jesu chu aw ngaihtahin a kikou a, a hagau a hahta hi.

³⁸ Huleh Pathian biahinn puanjah chu a tunglam a kipan a nuailam tandongin keeh nih ahung kisuahta hi.

³⁹ Huleh a mazawn a ding sepaih zahoutu in, hutobanga a kikoudoh leh a hagau hah a muh in, Hipa hi Pathian Tapa ahitahzet mai, a chi a.

⁴⁰ Hutah ah numeite zong gamlatah apat en in a um va; hute lahah, Mari Magdalene, Jakob neuzaw leh Jose nu Mari, huleh Salomi a tel uhi.

⁴¹ (Amah u’chu Galili gam a a um laia, amah jui a, a natohsahte zong ahi uh). Huleh numei dang tampi Jerusalem a amah toh kitonpute zong a um uhi.

⁴² Huleh nitaahlam ahung hihin, kiginni ahih jiahin, huchu khawlni ma a ni ahi a.

⁴³ Joseph, Arimathai khua a mi, vaihawmtu zahumtah, Pathian gam ngaah zing a um, a hung a, haangsan tahin Pilat kawmah a luut a, Jesu luang chu a va ngenta a.

⁴⁴ Huleh Pilat in a huchi sihpah chu thumah a sa mahmah a; huchi'n sepaih zahoutu kou in a kawmah, A sihna a sawt tai mah, chi'n a dong a.

⁴⁵ Huleh sepaih zahoutu apat a heetchian phetin a luang chu Joseph a peta hi.

⁴⁶ Huin ama’n puannem a lei a, amah chu a lakhia a, puannem in a tuam a, suang hawtkuaah haan khat ah a sialta a, huleh suang khat haankot ah a liihkhumta hi.

⁴⁷ Huleh Mari Magdalene leh Jose nu Mari in a sialna a en uhi.