MARK 12 - Thuhun Thah (BSI)

Grephuan tehkhinthu

¹ Huleh ama’n a kawmvah tehkhinthu in thu a soi panta a. Mi koi aha in grephuan a bawl a, daai in a uum kimvel a, greptui suuhna kokhuuh a lai a, innsaang khat a lam a; louhoute kawmah hohloh diingin a pia a, huleh khual gamlapi ah a chiahta hi.

² Huleh a gah loh hunin, hu an a gah a tan diing chu lou houte kawm apat va la diingin louhoute kawmah suaah khat a sawl hi.

³ Huleh amahpa chu ana man va, a vua va, khutguaahin a sawl kiitta uh.

⁴ Huin ama’n suaah dang khat a sawl kiit a; amah chu suang in ana sep va, a lutang ana suliam va, zumhuaitah a na bawl in a sawlmangta uhi.

⁵ Huin ama’n a dang khat a sawl kiit a; amah chu ana that va, huleh a dangte tampi zong khenkhat a vua va, khenkhat a that uhi.

⁶ Huleh ama’n tapa deihtah khat a neih nahlai jiahin, Ka tapa chu a zahtaat diing uh, chi'n a nunungpen in amah zong a kawmvah a sawlta hi.

⁷ Hizongleh hu louhoute’n, Hichu a gouluah diingpa ahi; hungun, i that diing uh, huchi'n a gouluah diing chu ei a ahi mei diing, a chi va.

⁸ Huchi'n amah chu a man va, a that va, huleh grephuan polamah a paaita uhi,

⁹ Hujiahin grephuan neitu in bang a lohta diai? Amah chu ahung diing a, louhoute chu a sumangthai diing a, huleh grephuan chu mi dangte kawmah a pe diing hi.

¹⁰ Hi Pathian lehkhabu thu, Inn bawlte’n a suang deih louh u’chu a ning a suang poimohpen ahung hita hi.

¹¹ Hichu Lalpa bawl ahi a, huleh i mitmuh un a limdang hi, chih na simkha sih viai mah? a chi a.

¹² Huin hu tehkhinthu chu amahuh dem a, a soi ahi chih a heet jiahun amah chu mat a tum va, hizongleh mite a lau uhi; huchi'n amah chu a nusia va, a chiahta uhi.

Kaisar kawma siah tawi thu a dotna

¹³ Huleh amahun a thusoite a man diingin, Pharisaite hunkhop leh Herod pawlte hunkhop a kawmah a sawl va.

¹⁴ Huleh amahun ahung tunun, a kawmah, Houtupa, nang hi midihtah na hi a, mi koimah na giing sih hi; ajiahchu mi maaizahtuam na nei sih a, dihtahin Pathian lampi thu na hilh jel, chih ka he uh; Kaisar kawma siah tawi dih ahiai, dihlou?

¹⁵ Pe diing ka hi viai, ahihlouhleh pe lou diing ka hi viai? a chi va. Hizongleh ama’n a lepchiahdan uh a he a, a kawmvah, Bang diinga hung ze-et na hi viai? makhai khat hung tawi un, ka en diing, a chi a.

¹⁶ Huin ahung tawi va. Huleh ama’n a kawmvah, Hi koi lim leh koi min ahiai? a chi a. Huleh amahun, Kaisar a, a chi uh.

¹⁷ Huin Jesu’n a dawng a a kawmvah, Kaisar silte chu Kaisar kawmah pia unla, Pathian silte chu Pathian kawmah pia un, a chi a. Huin amahun limdang a sa mahmah uhi.

Thohkiitna thu a dotna

¹⁸ Huleh Sadukaite, misi thohkiitna a um sih chitute a kawmah ahung va,

¹⁹ Houtupa, Mosi in, Mi khat a unaupa sita henla, a ji ta nei louin nuse leh, a unaupa in a ji a luah diing a, a unaupa diingin chi a haahsah diing ahi, chih ahung gelhsah hi.

²⁰ Tuin unau pasal sagih a umta a, a upapen in ji a nei a, huleh chi haah nei louin a si hi.

²¹ Huin a nihna in amahnu a nei a, chi haah nei lou mahin a si jel a; huleh a thumnapa zong huchimahbangin.

²² Huchi'n a sagih un a kiteenpih chiat va, chi haah nei louin a sivehta uh; huleh a tawp ah numeinu zong a sita hi.

²³ Ahihleh misi lah apat thohkiit nia ahung thohkiit chiangun a lah va koi pen ji a hita diai le? a sagih un a kiteenpihkha chiat ngal va, chi'n a dong va.

²⁴ Jesu’n amahuh a dawng a a kawmvah, Pathian lehkhathu leh Pathian silbawltheihna na heet zawh saang uh a um louh jiahtah a bawl khial hilou na hi uh maw?

²⁵ Misi laha kipan a thohkiit chiangun, a kiteeng nawn sih diing va, teeng zong a kiteengsah nawn sih diing uh; vaan a um angelte bang ahita diing uhi.

²⁶ Huleh misite kaihthoh a, a um diing uh thu, Mosi lehkhabu ah, loubawh laha Pathian in, Kei Abraham Pathian, Isaak Pathian, huleh Jakob Pathian ka hi, chi a, a houpihdan sim lou na hi viai mah?

²⁷ Amah chu misi Pathian ahi sih a, mihing Pathian ahi zaw hi; hujiahin na he khial mahmah uhi, a chi hi.

Thupiah lianpen

²⁸ Huleh lehkhagialtute laha khat a hung a, a kinial uh a ja a, Jesu’n amahuh dihtahin a dawng chih a he a, a kawmah, Thupiah zousiah laha lianpen khoikhu ahiai? chi'n a dong a.

²⁹ Huin Jesu’n a dawng a, Thupiah zousiah laha lianpen chu, Aw Israel, ngai un; Lalpa i Pathian u’chu Lalpa khat ahi;

³⁰ Huleh Lalpa na Pathian chu, na lungtang zousiah a, na hinna zousiah a, na lungsim zousiah a, huleh na haatna zousiah a na lungsiat diing ahi, chih ahi: hichu thupiah masapen ahi.

³¹ Huleh a nihna chu hi ahi, Nangmah na kilungsiat bang a na innveengte na lungsiat diing ahi. Hite sanga lianzaw thupiah mawngmawng a um sih hi, a chi a.

³² Huin lehkhagialtupa’n a kawmah, Ahi, Houtupa, na soi dih ngei mei; Pathian khat chauh a um a, amah chih louh a dang a um sih;

³³ Amah chu lungtang zousiah a, heetsiamna zousiah a, hinna zousiah a, huleh haatna zousiah a lungsiat a, huleh eimah i kilungsiat banga i veengte lungsiat chu haaltum sillat leh kithoihna zousiah sangin a hoihzaw hi, a chi a.

³⁴ Huleh ama’n piltaha, a dawn Jesu’n a muh in a kawmah, Pathian gam apat na gamla sih hi, a chi a. Hunungsiah chu koima’n thu mawngmawng a dong ngamta sih uhi.

Khrist David tapa hihdan dotna

³⁵ Huleh Jesu’n Pathian biahinn a thu a hilh laiin, amahuh a houpih a, Lehkhagialtute’n, Khrist chu David tapa ahi, bangchidan a, a chih uh a hiai?

³⁶ Amah David ngei in Hagau Siangthou in, Lalpa’n ka Lalpa kawmah, Na meelmate na keeng ngahna a ka bawl masiah ka jiatlamah tou in, a chih, a chi ngal a.

³⁷ Hujiahin David ngei in amah chu Lalpa a chih ahi; khoi a kipan a, a ta hi a ta diai le? a chi a. Huleh mipi vaantaang in kipaahtahin a thu a ngaikhia uhi.

³⁸ Huin ama’n a thuhilhna ah a kawmvah, Lehkhagialtute lahah kiveeng un, amahuh chu puantual silh a vaah, huleh dawl muna chibai buuh bang a ut uh.

³⁹ Huleh kikhopna inn a touphah hoihpen leh, gual vaahna a mun hoihpen bang a ngaina biih uhi.

⁴⁰ Meithaite innsung a negam va, huleh a heem in sawtpipi a haamtei uh; hite’n chu siamlouh tana lian sem a mu diing uhi, a chi hi.

Meithainu thohlawm piah

⁴¹ Huleh Jesu chu sumkholna zawnah a tou a, mipite’n sumkholna a, a sum khiahdan uh a en a; huleh mi hausa tamtahte’n tampipi a khia uh.

⁴² Huleh meithainu zawngtah khat a hung a, sumeng dangka nih a khia a; huchu paihsa khat toh kibang ahi.

⁴³ Huin ama’n a nungjuite a kou a, a kawmvah, Chihtahzetin ka hung hilh ahi, sumkholna bawma sum khete zousiah sangin, hi meithainu zawng tahin a khe tampen hi.

⁴⁴ Ajiahchu amahuh zousiah in a neih val uh a khia uh ahi a; hizongleh hi meithainu in chu a neih zousiah, a kitunhingna diing teng a khe veh ahi, a chi hi.