LUKE 9 - Thuhun Thah (BSI)

Sawlleh sawmlenihte natohna

¹ Huzohin ama’n a nungjui sawmlenihte a koukhawm a, dawi zousiah tunga silbawltheihna leh thuneihna, huleh natnate suhdamtheihna a pia a.

² Amah u’chu Pathian gam thu soi diing leh damloute sudam diingin a sawlkheta hi.

³ Huleh ama’n a kawmvah, Na zinna diingun chiang aha, sakhau aha, tanghou aha, sum aha bangmah keng sih un; puannaah zong thuaah nih nei sih un.

⁴ Na luutna inn vah tungden unla, huleh hua kipanin kipankhia un.

⁵ Huleh ahung kipaahpih lou photmah chu hu khopia kipan a na chiahdoh chiangun amahuh heetsahna diingin na keengpeeh va leivui tatkhia un, a chi a.

⁶ Huin a chiahta va, tanchinpha soi kawm leh mun china mite sudam in akhua akhua ah a chiahta uhi.

Herod lungjinna

⁷ Huchi'n kumpipa Herod in a silbawl zousiah ana za a; a lungjingta a, ajiahchu khenkhat in John ahung hing kiit ahita a chi va.

⁸ Khenkhat in, Elijah ahung kilaah ahita, a chi va, huleh midangte’n, Malai zawlneite khat hung thou kiit ahita a chi uh.

⁹ Huleh Herod in, John laha lu tanta ing a; hizongleh hichilawma a thu ka jah hi koi ahitai? a chi a. Huchi'n amah chu muh a utta hi.

Mipi saang ngaa vaahna

¹⁰ Huleh sawllehte’n a hung kiit un a silbawl zousiah uh amah a hilh va. Huin Jesu’n amahuh a pui a, Bethsaida kichi khopi a gamgaw mun khatah a chiahtuampih a.

¹¹ Mipite’n huchu a heet tahun amah a juita va; huleh ama’n amahuh ana kipaahpih a, a kawmvah Pathian gam thu a hilh a, suhdam ngaite a sudam hi.

¹² Huleh ni tumkuan ahung hihin sawmlenihte chu a hung va, a kawmah, I kimvela khopi leh khoneute a chiah a giahna leh neeh diing hawl diingin mipite sawlkhia in; ajiahchu hi-ah gamgaw mun a um i hi, a chi va,

¹³ Hizongleh ama’n a kawmvah, Nangun a neeh diinguh pia un, a chi a. Amahun, Mipi hizaat zoujai neeh diing i va leisah louhleh tanghou ngaa leh nga nih chauh loungal bangmah i nei sih uh, a chi va.

¹⁴ Ajiahchu amahuh mi saang ngaa vel ahi uh. Huin ama’n a nungjuite kawmah, Sawmngaa jelin a honhon in tousah un, a chi a.

¹⁵ Huleh amahun hichi’n a bawl va, a bawnun a tousahta va.

¹⁶ Huin ama’n hu tanghou ngaate leh nga nihte chu a la a, vaanlam entouin a vangpiah a, a balkeeh a, a nungjuite kawmah mipite ma a lui diingin a pia a.

¹⁷ Huleh a ne va, a vah chiatta uh; huleh a khawnmawh uh a neng bawm sawmlenih a luaahdim uhi.

Peter in Khrist a phuanna

¹⁸ Huleh hichi ahung hi a, amah ngena a haamtei laiin a nungjuite a kawmah a um va; ama’n a kawmvah, Mipite’n kei koi ahi ahung chi viai? chi'n a dong a.

¹⁹ Amahun a dawng va, Baptistu John ahi, ahung chi uh; hizongleh khenkhat in, Elijah ahi ahung chi va, huleh a dangte’n, zawlnei malai ate laha khat hung thou kiit ahi, ahung chi uh, a chi va.

²⁰ Ama’n a kawmvah, Ahihleh nangun koi ka hi na hung chi viai? a chi a. Peter in a dawng a, Pathian Khrist chu, a chi a.

²¹ Huleh ama’n hu thu chu koimah hilh lou diingin amahuh a khapta hi,

Jesu’n a sih diing leh a thohkiitna diing a soilawhna

²² Mihing Tapa’n chu sil tampi a thuaah ngei diing ahi a; upate leh siampu lalte leh lehkhagialtute deih louhin a um diing a, thahin a um diing, huleh ni thum ni’n kaihthohin a um diing ahi, chi in.

²³ Huleh ama’n a bawnva kawmah, Mi koipouh in ahung juih nuam inchu amah le amah kimumangtop in, nichinin a kros pua in hung jui heh.

²⁴ Ajiahchu koipouh a hinna humbit ut in a taan diing a; hizongleh keimah jiaha a hinna taan in a humbit diing hi.

²⁵ Bang jiahin ahiai i chih leh mi’n khovel a pum in nei henla, amah kisumang in, ahihlouhleh paihmang in umta leh amah diingin bang a phatuam diai?

²⁶ Ajiahchu keimah leh ka thute zumpih chu mihing Tapa’n a loupina toh, a Pa loupina toh, angel siangthoute loupina a ahung chiangin amah chu a zumpih diing hi.

²⁷ Hizongleh thutah ka hung hilh ahi, hi a dingte khenkhat, Pathian gam a muh masiah uh sihna chiam lou diing a um uh, a chi hi.

Meelkihendangna

²⁸ Huleh hichi ahung hi a, hite a soi nung ni giat diing bangin ama’n Peter leh, John leh, Jakob a pui a, taang ah haamtei diingin a chiah a.

²⁹ Huleh a haamtei laiin a meel umdan chu ahung dangta a, a puansilhte chu a vaam a, a teselsulta a.

³⁰ Huleh ngai in, mi nih amah toh a kihou va, hute chu Mosi leh Elijah ahi uh.

³¹ Amah u’chu loupina a hung kilaahin Jerusalem khua a, a sihna suhkim diing thu a soi va.

³² Hizongleh Peter leh a kawma umte chu a ihmut uh a suaah mahmah a; huleh ahung halh tahun Jesu loupina leh a kawma diing mi nihte a muta uh.

³³ Huleh hichi ahung hi a, a kawma kipan a paikhiah un, Peter in Jesu kawmah, Houtupa, eiuh diingin hitah a um a hoih hi; bawh thum i lam diing a, nanga di’n khat, Mosi a di’n khat, huleh Elijah a di’n khat, a chi a; bang ahiai a soi zong he louin.

³⁴ Huchia a soi laiin meilum ahung kai a, amahuh ahung khuh a; huleh meilum laha, a luut phetun a lauta uh.

³⁵ Huleh meilum laha kipanin aw ahung suaah a, Hi ka Tapa deihtah ahi, A thu ngai un, chi'n.

³⁶ Huleh aw a daih tahin Jesu chauh a muta va. Huleh a sip vengveng va, hulaiin a sil muhte uh koimah a hilh sil uhi.

Naupang dawiniin mat suhdamna

³⁷ Huleh hichi ahung hi a, a jingni a taanga kipan a hungsuh un mipi nasatahin amah ana lamtuah va.

³⁸ Huleh, ngai in, mipi lah apat mi khat hung kikou in, Houtupa, ka hung ngen ahi, ka tapa en in; ka tapa neihsun ahi ngal a.

³⁹ Ngai in, hagau khat in a man a, thakhat khat in a kikoudoh a; huleh chilphuan bo khopin a bawl gimveu a, naahpihtaha susidup in a nuseveu hi.

⁴⁰ Na nungjuite kawmah delhdoh diingin ka ngen a; a delhdoh thei sih uhi, a chi a.

⁴¹ Jesu’n a dawng a, Ginna bei leh khang thah hilhlahte aw, na kawmva bangtan um a hung thuaahsiam diing ka hiai? Na tapa hi-ah hung pui in, a chi a.

⁴² Huleh amah chu ahung pailai dawiin a supuuh a, a bawlgim hi. Huin Jesu’n dawiniin chu a tai a, naupang chu a sudam a, a pa kawmah a peta hi.

Jesu’n a sih diing a soilawhna nihveina.

⁴³ Huleh a bawnun Pathian silbawltheihna loupi chu limdang a sa mahmah va. Hizongleh mi chinin Jesu silbawl zousiah limdang a sah laiun ama’n a nungjuite kawmah.

⁴⁴ Hi thu kisoite na bil sungvah luut heh; ajiahchu mihing Tapa chu mite khuta matsah a um diing ahi, a chi a.

⁴⁵ Hizongleh amahun hi a thusoi chu a hesiam sih va; a heet louh diing va iim ahihjiahin; huleh a thusoi chu amah a dong ngam sih uhi.

Kingaihngiam tungtaang thuhilhna

⁴⁶ Huin a lahva koi ahiai lianpen diing chi'n kinialna ahung neita va.

⁴⁷ Jesu’n a lungtang va a ngaihtuah uh a he a, naupang khat a pui a, a kawmah a umsah a,

⁴⁸ A kawmvah, Koipouh ka mina hi naupang kipaahpih chu kei hung kipaahpih ahi; huleh kei hung kipaahpih chu ahung sawlpa kipaahpih ahi; na bawnva laha neupen chu a lianpen diing hi, a chi a.

⁴⁹ Huleh John in a dawng a, Houtupa, mi khat na mina dawite nohdoh ka mu va; ka hung juihna vah a tel louh jiahin ka khapta uhi, a chi a.

⁵⁰ Jesu’n a kawmah, Amah chu khap sil un; ajiahchu ei hung dou lou phot chu ei lama pang ahi, a chi hi.

Jesu Jerusalem zuana a chiahtouhna leh Samaria mite siam louhna

⁵¹ Huleh hichi ahung hi a, puitouh a, a um diing hun a tunin Jerusalem khua a chiah diingin a maai a ngat tinten a,

⁵² A ma ah mi a sawl masa a, huchi'n amahuh chu na chiahin amah diing a guatsa diama na koih diingin Samaria mite khua khatah a luut va.

⁵³ Huleh amahun Jerusalem kholama chiah diing banga a meel a lat jiahin amah ana kipaahpih sih va;

⁵⁴ A nungjuite Jakob leh John in hi a heetun, Lalpa, Elijah bawl bangin amahuh kaang mang diingin vaan a kipanin mei koukhe lei hoih na sa diai? a chi va.

⁵⁵ Hizongleh amah chu a kihei a, amahuh a tai a, Bangchibang lungsim po mi na hih uh kihe lou na hi uh,

⁵⁶ Ajiahchu mihing Tapa hi mite hinna suse diing a hung hilouin, hundam diingin ahung ahi zaw, a chi a. Huin khodang ah a chiahta uhi.

Nungjui a panna diing etkhiahna

⁵⁷ Huleh hichi ahung hi a, lampi a, a chiah laiun mi khat in a kawmah, Lalpa na chiahna photah ka hung jui diing, a chi a.

⁵⁸ Jesu’n a kawmah, Sialte’n kua a nei a, tungleeng vate’n zong bu a nei uh; hizongleh mihing Tapa’n a lu ngahna diing zong a nei sih, a chi a.

⁵⁹ Huleh ama’n midang khat kawmah, Hung juiin, a chi a. Hizongleh ama’n, Lalpa, ka pa hung va vuisah masa photin, a chi a.

⁶⁰ Jesu’n a kawmah, Misi in a misi uh kivui u’heh; hizongleh nang chu chiah inla, Pathian gam thu va soi in, a chi a.

⁶¹ Huleh midang khat in zong, Lalpa, ka hung jui diing; hizongleh ka inn a mite kamphain hung va hasah masa photin, a chi a.

⁶² Jesu’n a kawmah, Mi koipouh laangkawn tujing a nunglam en chu Pathian gam mi hitaah ahi sih, a chi hi.