LUKE 3 - Thuhun Thah (BSI)

Baptistu John leh a thupuaah

¹ Tiberia Kaisar vaihawm kum sawmlengaa kum in Pontia Pilat chu Judia gamoptu ahi a, huleh Herod chu Galili gam kumpipa ahi a, a unaupa Philip chu Ituria leh Trakoniti gam kumpipa ahi a, huleh Lusania chu Abilene gam kumpipa ahi a,

² Ana leh Kaiapha chu siampu lalpente ahi va, hulaiin gamdai ah Zakaria tapa John kawmah Pathian thu ahung tung a.

³ Huleh amah chu Jordan lui kiim gam zousiah ah a hung a, sualte ngaihdamna diing a kisiihna baptisma thu a soi a;

⁴ Zawlnei Isaiah thu lehkhabua, Gamdaaia mi kikou awging in, Lalpa lamlian sial unla, a lampite sutang un,

⁵ Guam chin dipdim ahi diing a, huleh taang leh mual chin suhngiam ahi diing; huleh a kawite chu suhtang ahi diing a, lampi phonte suhnal ahi diing;

⁶ Huleh mi zousiah in Pathian hutdamna a mu diing uh chia kigelh bangin.

⁷ Huin ama’n a khut a baptisma tang diing a hung mipite kawmah, Guul haahte aw, lungthahna hung tung diing taisan diingin kua’n ahiai hung vauhilh?

⁸ Hujiahin kisiih min potaahin gah un, huleh Abraham ka pu uh ahi chi'n na lungsim un ngaihtuah sih un; Ajiahchu Pathian in hi suang te Abraham haahtein a dingsah thei hi chih ka hung hilh ahi.

⁹ Huleh tuin zong sing bul ah heita koih ahita; sing chin gah hoih a gah lou phot chu a phuuh va, meiah a paailuut veu uh, a chi a.

¹⁰ Huin mipite’n a kawmah, Ahihleh kei un bang ka bawlta diing viai? chih a dong va.

¹¹ Ama’n a dawng a, a kawmvah, Koipouh puannaah nih nei in a nei lou hawm heh; huleh neeh diing nei in zong huchibang mahin bawl heh, a chi a.

¹² Huin siahdongtute zong baptisma tang diingin a hung va, a kawmah, Houtupa, kei un bang ka bawl diing viai? a chi va.

¹³ Huleh ama’n a kawmvah, Ahung chiamsah val uh phuut sih un, a chi a.

¹⁴ Huleh sepaihte’n zong huchimahbangin a kawmah, Kei un bang ka bawl diing viai? Huchi'n a dong va Ama’n a kawmvah, Koima pawngbawl sih unla, dihloutahin zong heeh sih un; huleh na loh vah lungkim un, a chi a.

¹⁵ Huleh mipite a kinep va, mi zousiah in John chu Khrist houh ahi de aw chia a lungtang va a ngaihtuah laiun;

¹⁶ John in a dawng a, a kawmvah, Ke'n chu tui in ka hung baptis ngei a; hizongleh kei sanga loupizaw, a keengtophah khau zong suut taah ka hih louh mi khat ahung diing; ama’n chu Hagau Siangthou leh mei in nanguh ahung baptis diing;

¹⁷ A khut in a pasiseep a tawi a, a phual a jap siang tinten diing a, a buhte a buhpangah a sungkhawm diing hi; hizongleh a si chu mei mit thei louin a haaltum diing hi, chih.

¹⁸ Huleh mite kawmah hasotna thu dang tampi in tanchinpha a soi jel hi.

¹⁹ Hizongleh kumpipa Herod chu, a unaupa Philip ji Herodia jiah leh a silgilou bawl zousiah a John in a taihilh jiahin,

²⁰ A silsual bawl zousiah behlapna in John chu suangkul ah a khumta hi.

Jesu baptisma tanna

²¹ Huleh mipi zousiah in baptisma a tan zohin hichi ahung hia, Jesu’n zong baptisma a tang a, huleh a haamtei laiin vaan ahung kihong a,

²² Huleh Hagau Siangthou chu tahsa nei in vakhu bangin ahung kumsuh a, a tungah a tuta a; huleh vaan apatin aw ahung suaah a, Nang ka Tapa deihtah na hi; na tungah ka kipaah mahmah hi, a chi hi.

Jesu khanggui thu

²³ Huleh Jesu’n thuhilh apat chiil laiin amah chu kum sawmthum vel ahita a, mi ngaihdanin chu Joseph tapa ahi a, huchu Heli tapa ahi a,

²⁴ Huchu Matthat tapa ahi a, huchu Levi tapa ahi a, huchu Melki tapa ahi a, huchu Janna tapa ahi a, huchu Joseph tapa ahi a,

²⁵ Huchu Mattathia tapa ahi a, huchu Amos tapa ahi a, Huchu Naum tapa ahi a, huchu Esli tapa ahi a, huchu Nagge tapa ahi a,

²⁶ Huchu Maath tapa ahi a, huchu Mattathia tapa ahi a, huchu Semei tapa ahi a, huchu Joseph tapa ahi a, huchu Juda tapa ahi a,

²⁷ Huchu Joanna tapa ahi a, huchu Rhesa tapa ahi a, huchu Zerubbabel tapa ahi a, huchu Salathiel tapa ahi a, huchu Neri tapa ahi a,

²⁸ Huchu Melki tapa ahi a, huchu Addi tapa ahi a, huchu Kosam tapa ahi a, huchu Elmodam tapa ahi a, huchu Er tapa ahi a,

²⁹ Huchu Jose tapa ahi a, huchu Eliezer tapa ahi a, huchu Jorim tapa ahi a, huchu Matthat tapa ahi a, huchu Levi tapa ahi a,

³⁰ Huchu Simeon tapa ahi a, huchu Juda tapa ahi a, huchu Joseph tapa ahi a, huchu Jonan tapa ahi a, huchu Eliakim tapa ahi a,

³¹ Huchu Melia tapa ahi a, huchu Menan tapa ahi a, huchu Mattatha tapa ahi a, huchu Nathan tapa ahi a, huchu David tapa ahi a,

³² Huchu Jesse tapa ahi a, huchu Obed tapa ahi a, huchu Boaz tapa ahi a, huchu Salmon tapa ahi a, huchu Naasson tapa ahi a,

³³ Huchu Aminadab tapa ahi a, huchu Aram tapa ahi a, huchu Esrom tapa ahi a, huchu Phares tapa ahi a, huchu Juda tapa ahi a,

³⁴ Huchu Jakob tapa ahi a, huchu Isaak tapa ahi a, huchu Abraham tapa ahi a, huchu Terah tapa ahi a, huchu Nahor tapa ahi a,

³⁵ Huchu Saruk tapa ahi a, huchu Ragau tapa ahi a, huchu Phalek tapa ahi a, huchu Heber tapa ahi a, huchu Sala tapa ahi a,

³⁶ Huchu Kainan tapa ahi a, huchu Arpachsad tapa ahi a, huchu Sem tapa ahi a, huchu Noah tapa ahi a, huchu Lamek tapa ahi a,

³⁷ Huchu Mathusela tapa ahi a, huchu Enok tapa ahi a, huchu Jared tapa ahi a, huchu Mahalelil tapa ahi a, huchu Kainan tapa ahi a,

³⁸ Huchu Enos tapa ahi a, huchu Seth tapa ahi a, huchu Adam tapa ahi a, huchu Pathian tapa ahi.