LUKE 21 - Thuhun Thah (BSI)

Meithainu thohlawm khiah

¹ Huleh a daahdoh a, mi hausate’n sumkholna-a sum a khiah lai uh a mu a.

² Huleh ama’n meithainu zawngtah khat in paisa san nih a khiah lai zong a mu a.

³ Huin ama’n, Chihtahzetin ka hung hilh ahi, amahuh zousiah sangin hi meithai zawngnuin a khetam zaw hi.

⁴ Bang jiahin i chih leh hite zousiah in a neih tuang uh Pathian thohlawmah a khia va; hizongleh ama’n chu a hinna diing a a neihsun teng a khe veh hi, a chi a.

Jesu’n Jerusalem siat diing leh huntawp diing thu a soilawhna

⁵ Huleh koite ahain Pathian biahinn thu, suang hoihtahte leh silpiahte-a jep hoih a hihdan a soi uleh ama’n,

⁶ Hi na sil muhte uh ahihleh, suhchim louha suang khat tunga khat kichiang mawngmawng a um louh nite ahung tung diing hi, a chi a.

⁷ Amahun, Houtupa, hi silte bangchih chia’n ahung um diai? huleh hi silte ahung tun diing chiangin heetsahna bang ahung um diai? chi'n a dong va.

⁸ Huin ama’n, Heema na um louhna diingun pilvaang un; ajiahchu Khrist ka hi, huleh a hun tung diing ahita, chi'n mi tampite ka minin ahung diing uh; hujiahin amahuh jui sih un.

⁹ Amahvang kidou thu leh buai thute na jah chiangun lau sih un; ajiahchu hi silte hung tung masa diing mawng ahi; hizongleh a tawpna chu a tungpah nai sih diing hi, a chia.

¹⁰ Huzohin ama’n a kawmvah, Nam tuamin nam tuam, huleh gam tuamin gam tuam a dou diing;

¹¹ Mun tuam tuamah jil nasatahin a liing diing a, kialte hung tungin, hiite ahung leeng diing; huleh vaan apatin sil lauhuaite leh chiamchihna loupite ahung um diing hi.

¹² Hizongleh hi silte zousiah a tunma in nanguh ahung man diing va, kikhopna inn leh suangkul ahte hung puiin ahung bawlgenthei diing va, ka min jalin kumpipate leh vaihawmtute ma-ah ahung pui diing uh.

¹³ Huleh hichu nanguh diingin heetsahna ahi diing.

¹⁴ Hujiahin bangchi dawn diing chih ngaihtuah masa lou diingin na lungtang vah kisukip un;

¹⁵ Ajiahchu na meelma zousiahun ahung dou va, ahung soisel theih louh diinguh kam leh pilna ka hung pe diing hi.

¹⁶ Huleh na nulepate uh, na unaute uh, na behte uleh na lawmteun zong ahung mansah diing va; na lahva khenkhat chu ahung sulum diing uh.

¹⁷ Huleh ka min jiahin mi zousiah huat in na um diing uh.

¹⁸ Hizongleh na lu va samzang khat zong a mangthai sih diing hi.

¹⁹ Na kuhkalna vah na hinna uh na humbit diing uhi.

²⁰ Huleh sepaihte’n Jerusalem a umkhum uh na muh chiangun a manthaina diing a naita chih he un.

²¹ Hu hun chiangin Judia gam a umte taang ah taimang u’heh; a sunga umte zong pawtdoh u’heh; huleh gam a umte zong a sungah luut sih u’heh.

²² Ajiahchu thu kigial zousiah a taangtun na diing a hu nite chu phubalah ni ahi diing.

²³ Hizongleh hu ni chiangin gaaite leh naungeeh nawiteep neite a tunguh a gih hi! ajiahchu gam sungah hahsatna nasatah leh hi mite tungah lungthahna tung diing ahi.

²⁴ Huleh amahuh chu namsaau hia min a si diing va, nam chin kawmah suaaha puiin a um diing uh; huleh Jentelte hun a buchin masiah Jerusalem chu Jentelte totdeenin a um diing hi.

²⁵ Huleh ni leh, ha leh aahsite bangah chiamchihna a um diing a; leitung ah nam chin hahsatna leh mangbatna a um diing; tui khang lian kinawhin a mau vengvung diing.

²⁶ Mite chu launa jiah leh khovel a sil hung tung diingte ngaihtuahna jiahin a sibup diing uh; ajiahchu vaan silbawltheihnate kisuliing diing ahi.

²⁷ Hutah chiangin amahun mihing Tapa chu silbawltheihna leh loupina nasatah toh meipi laha hung a mu diing uh.

²⁸ Huleh hi silte ahung tun pat chiangin entou unla, daahdoh un; ajiahchu na tatna uh a naita hi, a chi a.

Lalpa hung kiitna diing a kiveen zing a poimohdan

²⁹ Huin ama’n a kawmvah, tehkhinthu khat a soi a; Theipi kung leh sing kung zousiah en un;

³⁰ A nah ahung sel tah chiangin nipi ahung naita chih na mu va na kiheet uhi.

³¹ Huchimahbangin hi silte hung tun na muhchian un Pathian gam ahung naita chih he un.

³² Chihtahzetin ka hung hilh ahi, Sil zousiah a taangtun veh masiah tulai khang thahte a mang sih diing uh.

³³ Vaan leh lei a bei diing a, hizongleh ka thu a bei sih diing hi.

³⁴ Pilvaang un; huchilou inchu neeh vah taahluat leh, zukham leh, damsung khosah ngaihtuahna in na lungtang uh a dim talokha diing a, huchi'n hu ni na heet louh kalun ahung tung guih kha diing hi.

³⁵ Ajiahchu thaang kipel banga leitung pumpia umte zousiah tunga tung chiat diing ahi.

³⁶ Hujiahin hi sil hung tung diing zousiahte peel taah leh, mihing Tapa ma-a diing taah diing a guat na hih theihna diingun bangchih laipouhin haamtei unla, ngaihsah zing un, a chi a.

³⁷ Huleh ama’n suun laiin Pathian biahinn ah thu a hilh a; jan chiangin a pawtdoha, Olive taang kichi ah ava giah veu hi.

³⁸ Huleh mipite zousiah chu jingkalin a kawmah biahinn ah a thu ngaikhe diingin ahung uhi.