LUKE 20 - Thuhun Thah (BSI)

Jesu thuneihna a dotna uh

¹ Huleh hichi ahung hi a, Pathian biahinn a mite thu a hilh a, tanchinpha a soi laiin, ni khat chu siampu lalte leh lehkhagialtute upa haw toh a kawmah ahung va.

² Huchi'n a kawmah, Bang thuneihna in ahiai hi silte na bawl? hung hilh in, a chi va.

³ Ama’n a dawng a, a kawmvah, Ken zong sil khat ka hung dong diing, hung dawng un;

⁴ John baptisma hi vaan a kipan ahiai, mihinga kipan? a chi a.

⁵ Huin amahuh chu a kingaihtuah va, Vaan apat ahi chi leilah, Ahihleh bang diinga gingta lou, ahung chi diing a,

⁶ Huleh, Mihinga kipan ahi chi leilah mipi zousiah in suang in ahung sep diing uh; ajiahchu John hi zawlnei ahi a chiveh ngal va, a chi va.

⁷ Huin amahun, Khoi apat ahih ka soi thei sih uh, chi'n a dawng va.

⁸ Jesu’n a kawmvah, Ken zong bang thuneihna-a hi silte bawl ka hiai chih ka hung hilh sih diing hi, a chi a.

Grep huan tehkhinthu

⁹ Huin mipite kawmah hi tehkhinthu a soi a; Mi koi ahakhat in grephuan a bawla; lou enkoltu kawmah hohloh diingin a pia a; huleh gam tuamah sawtpi taam diingin a chiahta hi.

¹⁰ Huleh a gahloh hunin grep huana gah chu ana piah diingun lou enkoltute kawmah suaah khat a sawl a; hizongleh lou enkoltute’n amah chu ana vua va, khutguaahin a sawlmangta uh.

¹¹ Huin ama’n suaah dang a sawl kiit a; amah zong ana vua va, zumhuai tahin a bawl va, khutguaahin a sawlmangta uh.

¹² Huin ama’n a thumna a sawl kiita; huleh amah zong ana suliam va, a delhdohta uhi.

¹³ Huin grep huan neitu in, Bang chi bawl diing ka diai? ka tapa deihtah ka sawl diing hi, amah beeh a muh chiangun ana zahtaatkha moh sih diing uh, a chi a.

¹⁴ Hizongleh lou enkoltute’n amah a muh tahun, Hipa gouluahtu diing chu ahi; a gou i tan theihna diingin i that diing uh, chi'n a kihou va.

¹⁵ Huchi'n grep huan apat a delhdoh va, a thatta uhi Ahihleh grep huan neitu in a tungvah bangchi’n a bawl diai le?

¹⁶ Ahung diing a, lou enkoltute chu a sumang diing a, huleh grep huan chu mi dangte kawmah a pe diing hi, a chi a. Amahun hi a jah tahun, Huchi lawm lawm zaw tundah heh, a chi va.

¹⁷ Huin ama’n amahuh a ena, Ahihleh hi thu kigial bang ahiai? Inn bawltute suang deih louh, hu pentah chu a ning a suang poimohpen ahung hita, chih hi.

¹⁸ Koipouh hi suang tunga puuh chu a kitatgawp diing a; huleh a kiahkhum photmahte chu a gawijan diing hi, a chi a.

Siahtawi thua dotna

¹⁹ Huleh hulai mahin siampu lalte leh lehkhagialtute’n amah mat a tum va; hizongleh mipite a lau uh; ajiahchu hu tehkhinthu amahuh demna-a a soi ahi chih a he uhi.

²⁰ Huin amah chu a taang va, gam optu vaihawmna leh thuneihna a, a tut theihna diingun a thusoi khial man diingin midih kipang enkhemi a sawlkheta uh.

²¹ Huleh amahun a kawmah, Houtupa, dihtahin na soia, na hilh veu, huleh koimah khentuam nei louin Pathian lampi dihtahin na hilh ahi chih ka he uh.

²² Kei uh diing a Kaisar kawm a siah tawi siang ahiai, sianglou? chi'n a dong va.

²³ Hizongleh ama’n a doha bawl uh a he a, a kawmvah, Bang diinga hung ze-et na hi viai?

²⁴ Makhai khat hung ensah un. Koi lim leh koi min ahiai tuang? a chi a. Amah un a dawng va, Kaisar-a, a chi va.

²⁵ Ama’n a kawmvah, Hujiahin Kaisar silte chu Kaisar kawmah pia unla, Pathian silte chu Pathian kawmah pia un, a chi a.

²⁶ Huin mipite ma-ah a thusoi khial mat diing a mu sih va; a dawnna chu limdang a sa mahmah va, a sipta uhi.

Thohkiitna thua dotna

²⁷ Huzohin misi thohkiitna a um sih chi Sadukaite laha mi hunkhop a kawmah a hung va; amah chu a dong va;

²⁸ Houtupa, Mosi’n, Koipouh a unaupa in ji nei a, ta bei a, a sihsan leh a naupa in a ji a luah diing a, a upa diingin chi a haahsah diing ahi, chi'n ahung gelhsah hi.

²⁹ Huchi'n unau pasal sagih a um a; a upa penin ji a neia, ta nei louin a si a.

³⁰ Huin a nihna in a luah a, ta nei louin a si a.

³¹ Huin a thumna in a luah a, huchimahbangin sagihin a nei va, ta nei louin a si chiatta uh.

³² A bawnva nungah numeinu zong a sita hi.

³³ Hujiahin thohkiit ni chiangin amahnu chu koipen ji ahita diai? sagihin ji in a nei chiat ngal va, a chi va,

³⁴ Jesu’n a dawng a kawmvah, Hi khovel tate chu a kiteeng va, huleh ji leh ta in a kipia uh;

³⁵ Hizongleh hu khovel luah taah diing leh misi lah apat thohkiitna-a tel taah diing a guatte chu a kiteeng sih va, ji leh ta in zong a kinei sih uh;

³⁶ Amah u’chu si zong a sithei nawn sih uh; ajiahchu angelte bang ahi va; huleh thohkiitna tate ahihjiahun Pathian tate ahi uh.

³⁷ Huchi'n misite kaihthohin a um chih Mosi’n zong loubawh munah, Lalpa chu Abraham Pathian, Isaak Pathian, huleh Jakob Pathian a chih laiin a hesah hi.

³⁸ Huchi'n amah chu misi Pathian ahi sih a, mihing Pathian ahi zaw hi; ajiahchu amah ngaihin mi zousiah a hing hi, a chi a.

Jesu’n lehkhagialtute a dotna

³⁹ Huin lehkhagialtu koite ahain a dawng va, Houtupa, na soi dih ngeel hi, a chi va.

⁴⁰ Hu nungin amahun thudang mawngmawng a dong ngam nawn ta sih uhi.

⁴¹ Huleh ama’n a kawmvah, Khrist chu David tapa ahi bangchidana a chih uh ahiai?

⁴² Amah David ngei in Psalm bu ah, Lalpa’n ka Lalpa kawmah, Ka jiat lamah touin,

⁴³ Na meelmate na keeng ngahna a ka bawl masiah, a chi a.

⁴⁴ Hujiahin David in amah chu Lalpa a chihleh bangchidana a tapa hi ahiai? a chi a.

⁴⁵ Huzohin mipi kikhawmte zousiah jahin a nungjuite kawmah,

⁴⁶ Puannaah tual silha vaah uh, dawlmunte-a chibai buuh bang, kikhopna inn a touna hoihpente leh gual vaahna a mun hoihpente tan ngaina lehkhagialtute lahah kiveeng un.

⁴⁷ Meithaite innsung a negam va, mi heemna in sawtpipi a haamtei uh; huchibang mite’n chu siamlouh a hahtan sem diing uhi, a chi a.