LUKE 11 - Thuhun Thah (BSI)

Lalpa haamteina

¹ Huleh hichi ahung hi a, mun khata a haamtei laiin, a haamtei zohin a nungjuite khat in a kawmah, Lalpa, John in a nungjuite a hilh bangin haamtei daan hung hilh in, a chi a.

² Ama’n a kawmvah, Na haamtei chiangun, Ka Pa uh vaan a um, Na min kizahtaat heh. Na gam hung tung heh. Na deihzawng vaan a, a kibawl bangin, lei ah zong kibawl heh.

³ Ka nikhat neehkhop uh an ni chinin hungpia in.

⁴ Ka sualnate uh hung ngaidam in; kei un zong ka leibate uh photmah ka ngaihdam jiahun; Heemna ah hung puiluut sinla, gilou lah apat hung hunkhe zaw in, chi un, a chi hi.

Haamtei kuhkal diing thu a tehkhinna

⁵ Huleh ama’n a kawmvah, Na lahva koiaha in lawm khat nei henla, jan khang laiin a kawma va chiahin, Lawm, tanghou beu thum hung thunglaahsah in;

⁶ Ajiahchu ka lawm khat khualzin ka kawmah a hung a, a ma a lui diing bangmah ka nei sih, chi henla;

⁷ Huleh ama’n innsung patin dawngin, Hung subuai sin; kot khaah ahita a, huleh ka tate zong ka kawmah lupna ah a ihmuta uh; hung thouin ka hung pe thei sih, ana chi leh,

⁸ Ka hung hilh ahi, a lawm ahihjiaha va thouin va pe sih mah zongleh a nget teitei jiahin thouin a deih jahjah a va pe diing hi.

⁹ Ka hung hilh ahi, Ngen un, ahung kipe diing; hawl un, na mu diing uh; huleh kiu un, ahung kihonsah diing hi.

¹⁰ Ajiahchu a ngen photin a tang va; a hawl photin a mu va; huleh a kiu phot chu a kihonsah diing hi.

¹¹ Na lahva pa hite koi aha a tapa in tanghou ngen leh kuan suang a pe diai? ahihlouhleh nga ngen leh nga luang in guul a pe diai mah?

¹² Ahihlouhleh aahtui ngen leh mom-ai a pe diai mah?

¹³ Huchia nanguh migilou in bawn na tate uh sil hoih piah na taang na heet uleh, na Pa uh vaan a umin a ngentute kawmah Hagau Siangthou naah piah mahmah lou diing ahiai mah? a chi hi.

Beelzebul jala dawite nohdoh a Jesu kingohna

¹⁴ Huleh ama’n dawi haamthei lou khat a nohdoh a; Huleh hichi ahi a, dawi a pawt phetin haamthei lou chu ahung haamta a; huchi'n mipi’n limdang a sa mahmah uh.

¹⁵ Hizongleh a lahva khenkhat in, Dawi maangpa Beelzebul jala dawite a nohdoh ahi, a chi va.

¹⁶ A dangte’n lah amah ze-etna’n vaan apat a chiamchihna a ngen va.

¹⁷ Hizongleh ama’n a ngaihtuah uh he in a kawmvah, Gam amah leh amah kidou photmah a mangthai veu hi; huleh innsung khat zong a kidou leh a puuh veu hi.

¹⁸ Setan zong amah leh amah kidou taleh bangchi'n a gam a ding thei diai? Beelzebul jala dawite nohdoh ahi na hung chi ngal va.

¹⁹ Huleh ke’n Beelzebul jala dawite nohdoh ka hihleh na tapateun koi jala nohdoh ahi viai? hujiahin amahuh chu nanguh hung vaihawmsah diingte ahi uh.

²⁰ Hizongleh ke’n Pathian khut zung vanga dawite ka nohdoh leh Pathian gam na kawmvah ahung tung tahzetta ahi.

²¹ Mi haatin hiam leh thal tawi a, a inn a veen chiangin a thuampuate a bit hi.

²² Hizongleh amah sanga haatzaw khat a hung a, ahung zoh chiangin a kimuanna gaalthuam zousiah a laahsah a, huleh a thuampo laahsahte chu a hawmjah veu hi.

²³ Koipouh ka lama panglou chu ahung dou ahi a; huleh koipouh ahung laahkhawmpih lou chu a thehjah ahi.

Polam kisiamhoih phattuam louh jia

²⁴ Dawi niin chu mi sunga kipan a pawtkhiahin khawlna diing hawlin gam gaw mun bangah a vaah lehleh a; huleh a mu sih a; Ka pawtna inn mah ah ka chiah kiit mai diing, a chi a.

²⁵ Huleh hutah ahung tun leh phiat sianga jep hoihin a muta a.

²⁶ Huin a chiah a, amah sanga gilou zaw dawi dang sagih ahung pui a, a sungah a luut va, a teengta uh; huleh hupa umdan nunung chu ama a sangin ahung se zosemta hi, a chi a.

²⁷ Huleh hichi ahung hi a, hi thute a soi laiin mipi lah apat numei koi ahakhat ahung kikoudoh a, a kawmah, Nang hung kipaaina gil a hampha hi, huleh na nawi teepte toh, a chi a.

²⁸ Hizongleh ama’n chu, Ahi, himahleh Pathian thu ja a juite a hampha zaw uh, a chi a.

Jona chiamchihna

²⁹ Huleh mipi ahung kikhop khawm laiun, ama’n a kawmvah, Tulai khang thahte chu khang giloutah ahi uh; chiamchihna a hawl va; hizongleh zawlnei Jona chiamchihna loungal chiamchihna dang piah ahi sih diing uh.

³⁰ Ajiahchu Jona Ninevi khua a mite diing a chiamchihna ahih bangin mihing tapa zong tulai khang thahte diingin chiamchihna ahi diing.

³¹ Simlam kumpinu chu vaihawmni chiangin tulai khang thahte toh ahung thou diing a, siamlouh a tangsah diing hi; ajiahchu Solomon pilna ngaikhe diingin kawlmonga kipan ahung hi; ngai un, Solomon sanga loupizaw hi-ah a um hi.

³² Nineveh khua a mite chu vaihawmni chiangin tulai khang thahte toh a thou diing va, siamlouh a tangsah diing uh; ajiahchu Jona thusoi jiahin amahun a sual a kisiih uh; ngai un, Jona sanga loupizaw hi-ah a um hi.

Thaumei apata thuhilhna

³³ Mi koimah in thaumei a vaah chiangin beemkawm kalah a koih ngei sih, huleh loh nuaiah zong a koih ngei sih; ahung luutte’n a vaah a muhtheihna na diingin thaumei koihna ah a koih zaw hi.

³⁴ Tahsa vaahna chu mit ahi, hujiahin na mit a chiim chiangin na tahsa zong a bawnin a vaah suaah hi, hizongleh na mit a hoih louh chian na tahsa zong a mial veu hi.

³⁵ Hujiahin na sunga vaah um chu mial ahih louhna diingin pilvaangin.

³⁶ Hujiahin na tahsa a pumpia a vaah a, a mialna mun a um louhleh thaumei vaahtahin ahung taanvaah bangin a vaahsuaah veu diing, a chi hi.

Jesu’n Pharisaite leh Lehkhagialte a demna

³⁷ Huleh a thusoi laiin Pharisai koi ahakhat in a kawma an ne diingin amah a chial a; huin a luut a, an ne diingin a touta a.

³⁸ Hu Pharisaipa’n an neeh ma a khut a sil louh a muh in limdang a sa mahmah a.

³⁹ Lalpa’n a kawmah, Nanguh Pharisaite’n nou leh kuang polam na silsiang ngei va; hizongleh na sunglam u’chu leepguuhna leh giitlouhna in a dim hi.

⁴⁰ Nanguh mingol haw, a polam siamtu’n a sunglam zong siam lou ahiai mah?

⁴¹ Hizongleh na sil neihte uh migentheite kawmah pezaw un; huleh ngai un, sil zousiah nanguh diingin a siang hi.

⁴² Hizongleh Pharisaite, na tunguh a gih hi! ajiahchu nangun pudinate, pardite, huleh haichi zousiah sawma khat na pia va, vaihawmna dih leh Pathian lungsiatna na thudon sih uh; hite ahi na bawl diing uh, a dangte bawllou tuan louin.

⁴³ Nanguh Pharisaite, na tunguh a gih hi! ajiahchu nangun kikhopna inn ah touna hoihpen pente leh dawlmuna mi’n chibai ahung buuh diing na deih uh.

⁴⁴ Nanguh lehkhagialtu leh Pharisai lepchiahte haw, na tunguh a gih hi! ajiahchu nangun hi haankhuuh, mi’n haan ahihlam he loua a tung a a va pai veunate bang na hi uh, a chi a.

⁴⁵ Huin daanhe mite laha khat in a dawng a, a kawmah, Houtupa, hichibanga na thusoi in kei u’zong hung tai na hi, a chi a.

⁴⁶ Ama’n, Nanguh daanhe mite zong na tunguh a gih hi! ajiahchu nangun vangih puaah hah tahtah mi na pat va, nangun lah hu vangihte na khut zung khat un zong na khoih nuam sih uh.

⁴⁷ Na tunguh a gih hi! ajiahchu nangun zawlneite haan na lam va, amah u’lah na pulepate uh thah ahi.

⁴⁸ Na pulepate uh silbawl a hoih hi chi'n na heetpih tahzet uhi; ajiahchu amahun amahuh a na that va, nangun a haan uh na lamsah uhi.

⁴⁹ Hujiahin Pathian pilna in zong, A kawmvah zawlneite leh sawllehte ka sawl diing a, a lahva khenkhat a na that diing va, khenkhat a suduhdah diing uh;

⁵⁰ Khovel siam chiila kipana kisuah zawlnei zousiah sisan phu chu tulai khang thahte tungah a kila thei diing hi,

⁵¹ Abel sisan kisuah apat maitaam leh Pathian biahinn kikala si Zakaria sisan tanin; a chi hi chihtahzetin ka hung hilh ahi, hi Phuba chu tulai khang thahte tungah a kila diing hi.

⁵² Nanguh daan he mite na tunguh a gih hi! ajiahchu nangun pilna chabi na lamang va, nang u’lah na luut sih va, mi a luut diingte lah na khaam veu uhi, a chi a.

⁵³ Huleh ama’n hi thute a soi laiin lehkhagialtute leh Pharisaite’n amah chu thu tampi soisah tum in hahphinin a phin panta va;

⁵⁴ Siamlouh a tansah theihna diingun a haamkhialna mat tum in a taang zing uhi.