LUKE 10 - Thuhun Thah (BSI)

Nungjui sawmsagihte sawlna leh a kinunglehna uh

¹ Hi silte nungin Lalpa’n midang sawmsagih zong a guat a, amah ngei hungna diing kho chin leh mun chin ah a ma ah nih nihin a sawl a.

² Hujiahin ama’n a kawmvah, Buh laah diing a tam mahmah a, hizongleh a tongtute a tawm uhi; hujiahin, a buh la diing a natongtute hung sawl doh diingin buh neitu kawmah ngen un.

³ Chiahta unla, ngai un, ngeihon laha belaamnoute bangin ka hung sawl hi.

⁴ Dangka ip aha, sakhau aha, keengtophah aha keng sih un; huleh lampi ah koimah chibai buuh sih un.

⁵ Huleh inn na luutna phot vah, a masapenin hi inn ah hamuanna tung heh, chi un.

⁶ Huleh hu a hamuanna taah a um leh na hamuanna u’chu a tungah a um diing; a um louhleh na kawmvah ahung kihkiit diing.

⁷ Huleh hu inn ah um zing unla, ahung piah phot uh nein dawn un; ajiahchu natongtu chu loh mutaah ahi. Inn khat apat inn khat ah tuan lehleh sih un.

⁸ Khua na luutna phot vah ahung na kipaahpih uleh na ma va a lui photmah uh ne un.

⁹ Hu a damlou umte chu sudam unla, a kawmvah, Pathian gam na kawmvah ahung tungta, chi jel un.

¹⁰ Hizongleh khua na luutna phot vah ahung na kipaahpih louh uleh a kho kotzingah chiah unla,

¹¹ Na kho leivui uh ka keengpeeh va baang nasan na tungvah ka taatsiang uh; ahihvangin Pathian gam na kawmvah ahung tungta chih he un, chi un.

¹² Hizongleh ka hung hilh ahi, hu ni chiangin hu khuate thuaah diing sangin Sodom kho thuaah chu a dan a um zaw diing.

Jesu’n a thumanglou khopite a taina

¹³ Korazin, na tung gih e! Bethsaida, na tung gih e! Bang jiahin ahiai i chih leh na sung va sil loupi kibawlte Tura leh Sidon khua a kibawl hileh saiip puan silhin, vut laha touin sawtpiin a kisiih zouta diing uh.

¹⁴ Hizongleh vaihawmni chiangin nanguh thuaah sangin Tura leh Sidon thuaah chu adan a um zaw diing hi.

¹⁵ Huleh nang Kapernaum, vaan tan a paahtawi a um diing kisapa, gawtmun tana sawnkhiah a um diing na hi zaw hi.

¹⁶ Koipouh na thusoi uh ngai chu kei thu ngai ahi uh; huleh koipouh nanguh hung nual chu kei hung nual ahi uh; huleh kei hung nual chu ahung sawlpa nual ahi uh, a chi a.

¹⁷ Huleh sawmsagihte chu kipaahtahin ahung tungkiit va, Lalpa, na min jalin dawite nasan ka thu un a um uh, a chi va.

¹⁸ Ama’n a kawmvah, Setan vaan a kipana kawlphe banga hungkia ka mu hi.

¹⁹ Ngai un, guulte leh momaite totdeen theihna leh melma silbawltheihna zousiah tunga thuneihna ka hung pia hi; huchi'n bangmahin ahung suna het sih diing,

²⁰ Himahleh dawite na thuthu va a um jiahin kipaah sih unla, vaan a na min uh gelh ahihjiahin kipaah zaw un, a chi a.

²¹ Hu hun laitahin Jesu chu Hagau in a kipaah a, Aw Pa, vaan leh lei Lalpa, nangma’n mipil leh misiamte kawmah hi thute na iim a, naungeehte kawma na phuan jiahin ka hung paahtawi hi; ahi, Pa, huchih chu na kipaahna zawng ahi.

²² Sil zousiah ka Pa’n kei ahung pekheta hi; Tapa koi ahih chih Pa loungal koima’n a he sih; huleh Pa koi ahih Tapa leh a kawmva Tapa’n a phuan nuamnate loungal koima’n a he sih, a chi a.

²³ Huin a nungjuite lam a ngat a, a guuh in, Na sil muhte uh muhna mitte a hampha hi;

²⁴ Ajiahchu ka hung hilh ahi, zawlnei tampi leh kumpi tampite’n na sil muhte uh muh ana ut va, hizongleh a mu sih uh, huleh na jahte u’zong jah ana ut va, hizongleh a ja sih uh, a chi hi.

Daantheimi khat in kumtuang hinna muhdan diing a dotna

²⁵ Huleh ngai in, daantheimi khat a dingdoh a, amah ze-etna in, Houtupa, kumtuang hinna ka neih theihna diingin bang ahiai ka bawl diing? a chi a.

²⁶ Ama’n a kawmah, Daan lehkhabu ah bang a kigial ei? Bang na chi sim ei? a chi a.

²⁷ Ama’n a dawng a, Lalpa na Pathian chu na lungtang zousiah a, na hagau zousiah a, na haatna zousiah a huleh na lungsim zousiah a na lungsiat diing ahi; huleh nangmah na kilungsiat bangin na innveengte zong na lungsiat diing ahi, chi'n, a chi a.

²⁸ Huin Jesu’n a kawmah, Na dawng dih zet mai; hichi'n bawl in, na hing diing hi, a chi a.

²⁹ Hizongleh ama’n amah siamkitan utin Jesu kawmah, Ka innveeng koi ahiai? a chi hi.

Samarimi hoihpa tehkhinthu

³⁰ Jesu’n a dawng a, Mi koi ahakhat Jerusalem apatin Jeriko ah a chiahsuh a, suammangte a tuaahkha a, hute’n a puansilh a phelsah veh va, a voliam va, silou phetin a nusia uh.

³¹ Huin siampu khat hu lampi ah a hungsuh jenjen a; amah a muh tahin lampi gei langkhat ah a peelta a,

³² Huleh huchimahbangin Levimi khat hu mun ahung tunin a en a, lampi gei langkhat ah a peelta hi.

³³ Hizongleh Samarimi khat khualzin lai chu hupa umna mun ahung tunga, amah a muh tahin a lungsiat mahmah a.

³⁴ A kawmah a chiah a, a liamnate thau leh uain sunkhum in a tuam a, amah gan tunga tuangsah in zinbuuh ah a chiahpih a, a enkolta hi.

³⁵ Huleh a jingni a, a chiah diingin makhai nih a ladoh a, jinbuuh neitu kawmah a pia a Amah na enkolin la, hibana na seen jahjah chu ka hung kiit chiangin ka hung pekiit diing, a chi a.

³⁶ Tuin hi mi thumte lahah a koipen chu gutate tuaahpa innveeng hi diingin na ngaihtuah ei? a chi a.

³⁷ Ama’n, A tunga khotuahna neipa, a chi a. Huin Jesu’n a kawmah, Chiah inla, nang zong huchibangin va bawl in, a chi hi.

Martha leh Mari kitehkaahna

³⁸ Huleh hichi ahung hi a, a chiah laiun khua khatah a luut a; numei khat a min Martha in a inn ah a tungsah a.

³⁹ Huleh amahnu’n Mari kichi sanggamnu khat a neia, amah chu Jesu keeng bulaha tou a, a thusoi a ngai hi.

⁴⁰ Hizongleh Martha chu neehbawl in a buai mahmah a, Jesu kawmah a hung a, Lalpa, ka sanggamnu’n kei chauh neehbawl a ahung set khawhsa lou na hiaimah? hung huh diingin sawlin, a chi a.

⁴¹ Jesu’n a dawng a, a kawmah, Martha, Martha, sil tampi na ngaihtuaha buai na hi;

⁴² Hizongleh sil khat chauh a poimoh hi. Mari in tan hoih a teelta a, huchu laahsah louh diing ahi, a chi hi.