LUKE 1 - Thuhun Thah (BSI)

Thumapui

¹ I lahva chiantaha gintaat a um hu silte, mi tampite’n a phuanjahna diing ngaihtuah a gelh ana tup uh;

² A chiil apat a mita mutute leh thu natongtute’n ahung na hilh bangun,

³ Zahumpen Theophil, a bul a kipan sil zousiah heetkimna nei in, kizom jel a na kawm a gelh hoih ka sa hi.

⁴ Tuma a nang hungna kihilh thute a dih ngeel hi chih na heetna diingin.

Baptistu John pian diing soilawhna

⁵ Juda gam kumpipa Herod damlai in, a min Zakaria kichi, Abia pawla mi siampu natong khat a um a; huleh a ji chu Aaron tanute khat ahi a, a min Elizabeth ahi.

⁶ Huleh amahuh geel chu soisel beiin Lalpa thupiah leh a daan zousiah juiin Pathian mitmuh in dihtattahin a um uhi.

⁷ Huleh Elizabeth a chi'n jiahin ta a nei sih va, a nih un a upa tuaah mahmahta uhi.

⁸ Huleh hichi ahung hi a, Ama’n a hun tan dungjui a Pathian ma a siampu nna a toh laiin,

⁹ Siampu tawndan dungjuiin Lalpa biahinn a luut chiang a gimnamtui haal chu a tan ahi a.

¹⁰ Huleh gimnamtui kihaal laiin mipite chu a bawnun innpua ah ana haamtei uhi.

¹¹ Huleh Lalpa angel khat gimnamtui haalna maitaam jiatlam a dingin a kawmah ahung kilaah a.

¹² Huleh Zakaria in amah a muh tahin a mangbang a, lau zong a lau a.

¹³ Hizongleh angel in a kawmah, Zakaria, lau sin; ajiahchu na haamteina jah ahita hi; na ji Elizabeth in tapa ahung neihsah diing a, a min John nasah diing ahi.

¹⁴ Huleh nang chu nuamin na kipaah diing a; huleh mi tampite amah pianin a kipaah diing uhi.

¹⁵ Ajiahchu Lalpa ngaih in amah mi lian ahi diing a, uain aha, ahihlouhleh khamtheih zu mawngmawng a dawn sih diing; huleh a nu sunga kipan ngei in Hagau Siangthou in a dim diing hi.

¹⁶ Huleh Israel tate tampi Lalpa a Pathian uh lam a kihei kiitsah diing hi.

¹⁷ Huleh pate lungtang tate lam a ngasah diing leh, thumang loute midihtat pilna lam a ngasah diing leh, Lalpa diing a mi honkhat kipeihsa a um diing a na bawllawh diingin Elijah lungsim leh silbawltheihna toh Lalpa ma ah a pai diing hi, a chi a.

¹⁸ Huin Zakaria in angel kawmah, Hikhu bangchi'n ka hethei diai? keilah teehsia hita ing a, ka ji zong a teeh mahmahta a, a chi a.

¹⁹ Huin angel in a dawng a, a kawmah, Kei Gabriel, Pathian ma a diing chu ka hi; huleh na kawm a thu soi diing leh hi thu kipaah huaite hilh diing a sawl ka hi.

²⁰ Huleh ngai in, a hun banga hung tung diing hi thu ka soite na gintaat louh jiahin hi silte ahung tun masiah haamthei louin na um diing hi, a chi a.

²¹ Huleh mipite’n Zakaria chu a nangaah va, Pathian biahinn sunga a sawt um beeh jiahin limdang a sa mahmah uhi.

²² Huleh ahung pawt in a kawmvah thu a soi theita sih a; huin biahinn sungah kilaahna a mu ahi chih a heta va; ajiahchu a kawmvah heetsahna a bawl a, huleh haam thei louin a um zingta hi.

²³ Huleh hichi ahung hi a, a natohna a ni a chin tahin a inn ah a chiahta hi.

²⁴ Huleh hu nite nungin a ji Elizabeth chu ahung gaaita a, ha ngaa sunga kibu a,

²⁵ Mite laha ka minse seel diingin, Lalpa’n ahung muh in hichibangin ka tungah a bawlta hi, chi'n.

Jesu pian diing soilawhna

²⁶ Huleh aha guupna ah Pathian in angel Gabriel chu Galili gam a khua khat, a min Nazareth kichi ah,

²⁷ Nungaah siangthou khat, David suan a mi, a min Joseph kichipa ji diing a hual kawmah a sawl a; hu nungaah siangthou min chu Mari ahi.

²⁸ Huleh angel chu a kawmah a luut a, Chibai, nasatah a deihsahnu, Lalpa na kawmah a um hi; numei lahah hamphanu na hi, a chi a.

²⁹ Huleh amahnu’n amah a muh in a thusoite ah a lunghimoh mahmah a, hikhu hi bangtobang chibai buuhna hita diing a de aw, chi'n a ngaihtuah a.

³⁰ Huin angel in a kawmah, Mari, lau sin; ajiahchu Pathian lahah deihsahna na tang hi.

³¹ Huleh ngai in, na gaai diing a, tapa na nei diing a, a min Jesu na sa diing hi.

³² Amah chu mi lian ahi diing a, Tungnungpen Tapa a kichi diing; huleh Lalpa Pathian in a kawmah a pa David laltouphah a pe diing a;

³³ Huleh Jakob haahte tungah kumtuang in a lal diing a, a gam in beini a nei sih diing hi, a chi a.

³⁴ Huin Mari in angel kawmah, hi bangchi'n ahi diai? pasal lah nei lou ing a, a chi a.

³⁵ Huleh angel in a dawng a, a kawmah, Hagau Siangthou na tungah ahung tung diing a, Tungnungpen silbawltheihna in ahung liahkhuh diing; hujiahin mi siangthou nang a hung piang diing zong Pathian Tapa chih ahi diing hi.

³⁶ Huleh ngai in, na sanggamnu Elizabeth in zong a teeh nungin tapa khat a paaita hi; a chiing a chihnu ah, tu aha guupna a hita hi.

³⁷ Ajiahchu Pathian diingin ahi thei lou bangmah a um sih diing hi, a chi a.

³⁸ Huleh Mari in, En in, Lalpa suaahnu chu; na soi bang ngei in ka tungah hung tung heh, a chi a. Huin angel in a chiahsanta hi.

Mari in Elizabeth a va veh: Paahtawina la

³⁹ Hulaiin Mari chu a thou a, singtaang gam ah, Juda khopi khatah kintahin a chiah a;

⁴⁰ Huleh Zakaria inn ah a luut a, Elizabeth chibai a buuh a.

⁴¹ Huleh hichi ahung hia, Elizabeth in Mari chibai buuh a jah tahin a sunga naungeeh chu a tawm a; huleh Elizabeth chu Hagau Siangthou in ahung dimta a.

⁴² Huleh aw ngaihtahin ahung haamdoh a, Numei lahah hamphanu na hi, na gil a gah zong a hampha hi.

⁴³ Ka Lalpa nu ka kawma na hung bangchidan a hitai?

⁴⁴ Ngai in, na chibai hung buuh gin ka bila a luut tahin ka gilsunga naungeeh chu nuamin a kitawm hi.

⁴⁵ Huleh a gingtanu zong a hampha hi; Lalpa’n a kawma a thusoite chu taangtung diing ahih jiahin, a chi a.

⁴⁶ Huin Mari in, Ka hinna in Lalpa a paahtawi a,

⁴⁷ Huleh ka hagau chu ka Hundampa Pathian tungah a nuam hi.

⁴⁸ Ajiahchu ama’n a suaahnu namngiam dan a ngaihsah a; huchi'n, ngai in, tu a kipanin khang thah zousiah in hampha ahung chi diing uhi.

⁴⁹ Ajiahchu amah mihaat in ka tungah sil loupitahte a bawlta a; huleh a min zong siangthou ahi.

⁵⁰ Huleh amah laudan siamte tungah a hehpihna a khang a khang in a um peh hi.

⁵¹ A baantha in a haatdan a ensah a; mi kiliansahte chu a lungtang suangtuahna uh a suhdalhsahta hi.

⁵² Mi haatte chu a laltouna va kipan a lakhia a, mi ngiamte chu a tawisangta hi.

⁵³ Gilkialte chu silhoih in a sutai a; huleh mi hausate chu khutguaah in a sawlmangta hi.

⁵⁴ A hehpihna heet zingna in a suaah Israel a panpihta a;

⁵⁵ Kumtuanga diing a i pulepate, Abraham, huleh a haahte kawma ana soi bang ngei in, a chi a.

⁵⁶ Huleh Mari chu a kawmah ha thum vel a taam a, huin a inn ah a pai kiitta hi.

Baptistu John pianna: Vangngetna

⁵⁷ Huleh Elizabeth chu a nausuah hun ahung tungta a; huchi'n tapa ahung neita a.

⁵⁸ Huleh a innveengte leh a sanggamte’n, Lalpa’n hehpihna loupitah a tungah a sulang chih ana ja va, a kipaahpih uhi.

⁵⁹ Huleh hichi ahung hi a, a ni giatni in naungeeh zehtan diingin a hung va; a min diingin a pa min la in Zakaria a sah tum va.

⁶⁰ Huin a nu in a dawng a, Huchi hi sinte, John chih zawh diing ahi, a chi a.

⁶¹ Huleh amah un a kawmah, Na beh na phung lahah hi mina kikou koimah um loupi, a chi va.

⁶² Huleh amah un a pa kawmah, A min bang na hisah nuam ei chi'n heetsahna a bawl va.

⁶³ Huin ama’n lehkhagelhna dohkaan a ngen a, A min chu John ahi, chi'n a gial a. Huleh a bawnun thumah a sa mahmah uh.

⁶⁴ Huin a kam ahung kihongpah a, a lei ahung kiphel a, ahung haam a, Pathian a paahtawita hi.

⁶⁵ Huleh a kawmva teeng zousiahte chu ahung lauta va; huleh hi thute chu Judia gam singtaang zousiah ah a thangsuahta hi.

⁶⁶ Huleh a jakha zousiah in a lungtang vah a geel chiat va, Hi naungeeh bangchibang ahung hitaphet de aw, chi'n! Huleh Lalpa khut in amah a umpih hi.

⁶⁷ Huleh a pa Zakaria chu Hagau Siangthou in ahung dim a, huleh thu ahung soidohta a,

⁶⁸ Israel Lalpa Pathian chu paahtawi in um heh; ajiahchu ama’n a mite ahung kana, ahung tanta hi,

⁶⁹ Huleh a suaah David innkuante lahah hutdamna kii ahung siamsahta hi.

⁷⁰ Leilung pian chiil apat a zawlnei siangthoute kama ana soi bangin;

⁷¹ I meelmate lah leh ahung mudah zousiahte khuta kipan hutdam i hi a;

⁷² I pulepate kawma khotuahna a chiam chu bawl diing leh, a thuhun siangthou he zing diingin;

⁷³ I pu uh Abraham kawma a kihaahsialna chu,

⁷⁴ I meelmate lah apat a hung hunkhia a, lau loua a nna i toh theihna diing,

⁷⁵ I damsung teng a mitmuh a siangthou leh dihtattaha um diingin.

⁷⁶ Huleh nang, naungeeh, Tungnungpen zawlnei ahung kichi diing hi; ajiahchu a lampite bawl diingin Lalpa ma ah na pai diing hi.

⁷⁷ A sualnate uh ngaihdamna a, a mite kawma hutdamna heetna pe diingin.

⁷⁸ I Pathian uh hehpihna nemtah jalin; hujiahin tunglama kipana nisuaah in ahung khohta hi.

⁷⁹ Mial lah leh sihna liim nuaia pute taan vaah diing leh, hamuanna lampi a i keengte hung puisah diingin, a chi a.

⁸⁰ Huleh naungeeh chu ahung khang lian a, a lungsim lam ahung haat deuhdeuh a, Israelte kawma a kilaah masiah gamdai ah a um zing hi.