KORINTHTE II 6 - Thuhun Thah (BSI)

Pathian hehpihna phattuampih diing a ngetna

¹ Huleh keiuh amah toh tongkhawmte hi in, Pathian hehpihna chu phattuamna bei a na muh louhna diingun ka hung ngen uhi.

² (Ajiahchu ama’n, Hun kipaahhuai ah ka hung ngaikhia a, hutdamna ni ah ka hung panpih hi, a chi hi; ngai un, tu hun kipaahhuai ahi a; ngai un, tu hutdamna ni ahi).

³ Ka thunatohna uh dem a a um louhna diingin sil bangmah ah puuhna diing ka bawl sih uhi;

⁴ Himahleh Pathian thunatongtute ka hi uh chih sil zousiah ah ka suchian va, kuhkalna mahmah ah bang, hahsatna ah bang, taahsapna ah bang, lungkhamna ah bang;

⁵ Jepna ah bang, suangkul taanna ah bang, buaina ah bang, tohgimna ah bang, ihmut louhna ah bang, an ngawlna ah bang;

⁶ Sianthouna in, heetna in, thuaahtheihna in, chitna in, Hagau Siangthou in, lungsiatna dihtahin,

⁷ Thutah thu in, Pathian silbawltheihna in, jiatlevei a dihtatna gaalvan in,

⁸ Zahbawlna leh zahbawl louhna in, soisiatna leh soiphatna in; mi heemtute bangin, midihtah hi ngal in;

⁹ Heetphaah louh bangin, minthangtah hi ngal in; si diing bangin, ngai un, ka hing uhi; vuaahthop bangin, thah chu hilouin;

¹⁰ Lungkhamtah bangin, kipaah zing ngal in; genthei bangin, mi tampi hausah ngal in; bangmah nei lou bangin, sil zousiah nei ngal in.

Kikoihtuam diing leh kisusiangthou diing a ngetna

¹¹ Aw nanguh Korinthte, na kawmvah ka kam uh ka kaah va, ka lungtang uh ka hong lian uhi.

¹² Keiuh nehgawpa um na hi sih va, na lungsim va nanguh kinehgawp na hi uhi.

¹³ Huleh ka hung piah bang na hung piah theihna diingun (tate kawma soi bangin ka soi ahi), nanguh zong kihong lian un.

¹⁴ Ginglou mite toh kituaah louin ngawngkol pokhawm in um sih un: ajiahchu dihtatna leh dihtat louhna in bang kikopna a nei ei? huleh vaah leh mial in bang kithuahna a nei viai?

¹⁵ Huleh Khrist leh Belial in bang kituaahna a nei viai? ahihlouhleh gingtu leh ginglou mi’n bang tankhawm a nei viai?

¹⁶ Huleh Pathian biahinn leh milemte’n bang kizopna a nei viai? Ajiahchu nang u’chu Pathian hing biahinn na hi uhi; Pathian in, Amah u’ah ka teeng diing a, amahuh ah ka vaahleh diing a; huleh a Pathian uh ka hi diing a, amah u’zong ka mite ahi diing uh, a chih bangin.

¹⁷ Hujiahin a lahva kipan hung pawtdoh unla, a tuam in um un, Lalpa’n a chi, huleh sil sianglou khoih sih un; huchi'n ka hung pom thei diing a.

¹⁸ Huleh nanguh diingin na Pa uh ka hi diing a, nanguh chu ka tapate ka tanute na hi diing uh, Lalpa silbangkim bawlthei in a chi hi.