KORINTHTE II 4 - Thuhun Thah (BSI)

Thunatongtu thudihna leh haansanna

¹ Hujiahin khotuahna ka muh bang va, hi natohna ka tan jiahun, ka chau sih uhi.

² Hizongleh sil zumhuai kiphualte ka paampaihta va, doh a lungsim po louin, Pathian thu mi heemna a zang louin; hizongleh thutah suhlatna a zang zaw in, Pathian mitmuh ah mi chin sialepha heetna mit ka sutung zaw uhi.

³ Hizongleh ka tanchinpha uh phual a a um leh, mangthaite kawmah ahi phual a, a um,

⁴ Pathian lim batpih, Khrist tanchinpha loupina vaahin amahuh a salhvaah theih louhna diingin, hute ah hi khovel Pathian in a gingta loute lungsim a suhmialsahta hi.

⁵ Bang jiahin ahiai i chih leh keiuh leh keiuh ka kisoithang sih va, Khrist Jesu chu Lalpa ahi chih leh, keiuh chu Jesu ziahin na suaahte uh ka hi uh chih ka soi zaw uhi.

⁶ Ajiahchu, Jesu Khrist meel a Pathian loupina heetna vaah hung pe diingin, mial laha kipana vaah hung vaahdoh diing a thupetu Pathian in ka lungtang uh a salhvaahta hi.

⁷ Hizongleh silbawltheihna loupina chu keiuh apat hilou a, Pathian apat ahih zawh theihna diingin hu gou chu lei beel ah ka kem uhi.

⁸ Lehlamlehlam ah nehthop in ka um va, hizongleh ka chimoh nai sih uh; lungdong in ka um va, hizongleh ka lungke tuan sih uh;

⁹ Sawih in ka um va, hizongleh taisan in ka um sih uh; paihkhiah in ka um va, hizongleh suhmang in ka um nai sih uhi.

¹⁰ Jesu hinna ka sapum va suhlata a um theihna diingin, bangchih laipouh in Lalpa Jesu sihna ka sapum vah ka po lehleh uhi.

¹¹ Ajiahchu Jesu hinna zong ka tahsa uh si thei a suhlat a a um theihna diingin, kei uh a hing nalaite chu bangchih laipouhin Jesu jiaha si diing a piahkhiah in ka um uhi.

¹² Huchi'n keiuh ah sihna in a tong a, hizong leh nanguh ah chu hinna in a tong hi.

¹³ Ka gingta a, hujiahin ka soita hi, chih gelh bangin, hu ginna hagau mah chu nei in, kei un, zong ka gingta va, hujiahin ka soi uh ahi.

¹⁴ Ajiahchu Lalpa Jesu kaithou kiit pa in kei u’zong Jesu toh ahung kaithou diing a, nang u’toh a maaima ah ahung tut diing hi, chih ka he uhi.

¹⁵ Bang jiahin ahiai i chih leh Pathian loupina diing a mi tampite kipaahthu soina jala hehpihna a punsem theihna diingin sil zousiah nanguh diing jiaha um veh ahi.

Tulai a thuaahna leh kumtuang loupina

¹⁶ Hukhu jiahin ka chau sih uh; hizongleh ka polam mihing uh kiam hiaihiai zongleh, ka sunglam mihing u’chu ni china siamthah in a um zing hi.

¹⁷ Bang jiahin ahiai i chih leh miphetkal sung chauh ka gimthuaahna uh jangtakhat in kumtuang loupina gihtah mai na sa zawsem ahung bawlsah zing hi.

¹⁸ Sil muhtheihte en louin, sil muhtheih louhte ka en zaw uhi; ajiahchu sil muhtheihte chu tomtakhat sunga diing ahi a; hizongleh sil muhtheihlouhte chu kumtuang a diing ahi zaw hi.