KORINTHTE II 2 - Thuhun Thah (BSI)

¹ Hizongleh tukal lungkham kawma na kawmva hung kiitta lou diing chih keimah thu in kana tum hi.

² Ajiahchu ke’n nanguh hung sulungkham leng, ka suhlungkhamte mah chih louh koi in ahiai kei hung kipaahsah diing?

³ Huleh na kawmvah hi thu mah ahi ka hung gelh, huchilou inchu, ka hung chiangin ka kipaahna diingte lahah lungkhamna ka mu zaw kha diing hi; ka kipaahna chu na bawnva kipaahna hi diingin ka hung gingta ngal a.

⁴ Ajiahchu lunggimna leh lungkhamna nasatah apat, mittui tampi toh ka hung gelh ahi; suhlungkhama na um louh va, na tungva lungsiatna nasatah ka nei hi chih na heet zawhna diingun ka gelh zaw hi.

Silbawlsualpa kisiih laahluut kiitna diing a hilhna

⁵ Hizongleh mi koipouh in lungkhamna a siam leh, kei chauh ahung sulungkham ahi sih a, ka hihtaatluat louhna diingin na bawnun ahung sulungkham chiat phet ahi zaw hi.

⁶ Huchibang mi a diingin chu mi tampiin a piah uh hi gawtna a huntawh hi.

⁷ Huchi'n na ngaihdam diing va, na hamuan zawh diing uh ahi, huchilou inchu, huchibang mi chu a lungkham taahluatna in a valhzoukha diing hi.

⁸ Huchi ahihjiahin amah lama na lungsiatna uh sukip diingin ka hung ngen hi.

⁹ Hikhu jiah mahin zong ka gial ahi, sil zousiah a thu na man uleh na man louh uh ka heetchetna diingin.

¹⁰ Bangma pouh a mi na ngaihdam u’chu ke’n zong ka ngaidam hi; ajiahchu sil bangpouh ka ngaihdam leh, hi ka ngaihdamna mi chu nanguh jiahin Khrist ah ka ngaidamta hi.

¹¹ Huchilou inchu Setan in eiuh ah hun lemtaang a mukha diing; ajiahchu a lungtup i haih sih uhi.

Tanchinpha jiaha thuaahna leh gualzohna

¹² Huleh Khrist tanchinpha soi diing a Troas khua a ka hungin Lalpa’n kei diingin kot khat ahung honsah a,

¹³ Ka unaupa Tita ka muh louh jiahin kaha a muang thei sih a; huchi'n amahuh kampha a ha in, hu apatin Makedonia gam ah ka chiahta hi.

¹⁴ Himahleh Khrist a gualzohna hung pe zingtu leh, keiuh zang a mun chin a amah heetna gimnamtui phuangdohtu Pathian kawmah kipaahthu um heh.

¹⁵ Bang jiahin ahiai i chih leh hutdama umte leh mangthaite ah Pathian a diingin Khrist gimnamtui ka hi uhi.

¹⁶ Lawi khat kawmah sihna diing a sihna gimnam ka hi va; huleh lawi dang kawmah hinna diing a hinna gimnam ka hi uhi. Huleh hi silte diing a chingzou koi ahiai?

¹⁷ Bang jiahin ahiai i chih leh mi tampiin Pathian thu mite heem a sumkawlveina a, a zat bangun kei un chu ka zang sih uh; hizongleh chihtahzetin Pathian a bang zawin, Khrist ah Pathian mitmuh ah thu ka soi uh ahi.