KORINTHTE II 10 - Thuhun Thah (BSI)

Paul in a sawlleh hihna a taahlatna

¹ Huleh na lahva thunuaigolhtaha um a, na umlouhna va nanguh lama hahkat, kei Paul in, Khrist jaidamna leh nunnemna in ka hung ngen ahi;

² Hizongleh tahsalama um hia keiuh hung ngaihtuah khenkhatte tunga hahkat diing ahi chia ka ngaihtuah chu, na kawmva ka um chianga huchia ka hahkat louhna diingin ka hung ngen hi.

³ Bang jiahin ahiai i chih leh tahsa in um mahleh ung, tahsa dou in ka dou sih uhi;

⁴ (Ajiahchu ka gaaldou na gaalvan u’chu tahsa ahi sih a, kulhpi dettah suhchimna diing a Pathian jala silbawltheitah ahi zaw hi).

⁵ Suangtuahnate leh Pathian heetna doudaal a loupitah a kibawl sil saang chintengte paaikhia in, ngaihtuahna chinteng Khrist thumanna suaah a pui in;

⁶ Huleh na thumanna uh suhbukim ahih chianga, thumanglou zousiah phuba la diing a kipeihsa a um in.

⁷ Nangun sil a polama kilatdan a en na hi viai mah? Mi koipouh in Khrist a hi a amah leh amah a kiheet a ahihleh, hichu ama’n ngaihtuah kiit heh, amah Khrist a ahih bangin, keiuh zong Khrist a ka hi uhi.

⁸ Ajiahchu nanguh suhsiatna diing hilou a, bawlhoihna diing zaw a Pathian hung piah ka thuneihna uh hahtahin suang zong le’ung ka zahta sih diing hi.

⁹ Lehkhathot a nanguh hung suhlau tum banga ka lat louhna diingin.

¹⁰ Ajiahchu amahun, A lehkhathotte zaw a gih in, a haat a; hizongleh a mun ah a sapum a zawngkhal a, a thusoi zong a hawmthoh huai hi, a chi uhi.

¹¹ Huchibang mi'n hikhu ngaihtuah heh, na kawmva ka um louh lai va, lehkha a, thu a ka um bangun, na kawmva ka um chiangun zong silbawl in ka um diing uhi.

¹² Ajiahchu kei u’chu amah leh amah kiphatte lahah ka kisimtel ngam sih va, amahuh toh teh zong ka kitehkaah ngam sih uhi; hizongleh amahuh chu amah uleh amahuh kitehtuah in, amah uleh amahuh kitehkaah in, lungsim nei louin a um uhi.

¹³ Hizongleh kei u’chu ka tehna hun val un ka uang sih diing uhi, hizongleh Pathian hung hawmsah, nanguh zong huap diing a tehna, hu bang jelin ka uang zaw diing uhi.

¹⁴ Bang jiahin ahiai i chih leh kei un nanguh hung baanpha lou bangin, ka tehna kal val un ka kizankhe sih uhi; ajiahchu Khrist tanchinpha soi in nanguh kawm tanphain ka hung uhi.

¹⁵ Ka tehna val uh sil, chih chu, midangte tohsa a ki suang ka hi sih va, hizongleh na ginna uh a khan chiangleh ka huap chiang bang jelun nanguh jiahin naahtah a suhlet in ka um diing uh chih ka kinem zaw uhi;

¹⁶ Na gam kal lam uh tanpha a tanchinpha soi diingin, huleh ka khut va ka bawlsa silte thu a midang bial sunga ki suang lou diingin.

¹⁷ Hizongleh a ki suang taphot, Lalpa ah ki suang heh.

¹⁸ Ajiahchu amah kiphat chu phatin a um sih a, Lalpa’n a phat chu mipha ahi zaw hi.