KORINTHTE II 1 - Thuhun Thah (BSI)

Chibaibuuhna leh kipaahthu soina

¹ Paul, Pathian deihlama Jesu Khrist sawlleh leh, i naupa uh Timothi in, Korinth khua a um Pathian kouhtuamte leh, Akaia gam pumpi a misiangthoute zousiah kawmah;

² Pathian i Pa uleh, Lalpa Jesu Khrist kawma kipan hehpihna leh hamuanna na kawmvah um hen.

³ Pathian, i Lalpa uh Jesu Khrist Pa ngei, khotuahna Pa leh lungmuanna zousiah Pathian chu paahtawi in um hen.

⁴ Pathian in keiuh ahung lungmuanna ngei khu a kei un zong hahsatna photmah a umte ka lungmuan theihna diingun, ama’n ka gimthuaahna zousiah vah ahung lungmuan veu hi.

⁵ Ajiahchu Khrist thuaahgimnate ka tungva a dimlet bangin, Khrist jiahin ka kihehnepna uh zong a dimlet hi.

⁶ Huleh gimthuaah a ka um un aha, ahihlouhleh lungmuan a ka um un aha zong, hichu nanguh hehnepna diing leh hutdama na umna diing uh ahi a; huin chu gimthuaahna ka thuaah banguh kuhkaltaha thuaahzohna a siamdoh hi.

⁷ Huleh nanguh gimthuaahna tangtute na hih bangun, hehnepna tangtute zong na hi uh chih he in ka hung kineppihna uh a det hi.

⁸ Bang jiahin ahiai i chih leh unaute, Asia gam a ka tungva gimthuaahna hung tung chu na heet louh uh ka ut sih uh, hin zong kinem zou nawn lou khopin huchilawma nasataha thuaahzoh guallouh a bawlsiat in ka um uhi.

⁹ Hizongleh kei uleh keiuh kimuang loua, misi kaithou thei Pathian ka muan zawhna diingun, si diing a thupuuhsa chu keiuh ah ka kineih uhi.

¹⁰ Ama’n chu huchituha sihna nasatah lah apat ahung hundohta a, huleh ahung hundoh zinga; huleh ahung hundoh nalai diing chi'n amah ah ka kinem uhi.

¹¹ Mi tampite apata ka silpiah muh jiah va mi tampi in keiuh diing a kipaahthu a soi theihna diingun, nangun zong keiuh diing a na hung haamteisahna un na hung panpih uhi.

¹² Bang jiahin ahiai i chih leh ka suan u’chu hikhu ahi, ka sialepha heetna uh hung heetpih, sianthouna leh Pathian dihna nei in, tahsa pilna a hilouin, Pathian hehpihna a hi zaw in, khovel ah, huleh a diahkhol inchu nangu lamah ka khohei uhi.

¹³ Ajiahchu na sim va, pom zong na pom uh, hukhu loungal na kawmvah thu dang bangmah ka gial sih uhi; huleh a tawp dong a na pom zing uh ka kinem hi;

¹⁴ Lalpa Jesu ni chianga nanguh ka suante uh na hih diing bang va, kei u’zong na suante uh ka hih diing uh chih heetna chiang na hung neih bang un.

A zin diing a tawp kiitna

¹⁵ Huleh hi gintaatna tah nei in, phattuamna nihveina na neih theihna diingun, na kawmva hung masat ka tum hi.

¹⁶ Huleh nanguh hung tawn malam a Makedonia gam a chiahsuaah in; huleh Makedonia gam apat na kawmva hung kiit in, huleh nangun Judia gam lama ka chiahna diing ah hung thah leuchin ka chi hi.

¹⁷ Hujiahin huchibang ka ngaihtuah laiin, ka lungsim det louhdan sulang ka hiai mah? Ahihlouhleh, ka lungsim a ka silguatte chu tahsa thu bang a, ahihleh hi, ahihlouhleh hilou, chi ka hiai mah?

¹⁸ Hizongleh Pathian a thutah bangin, nanguh lama ka thu uchu, ahi, chih leh, hilou, chih ahi sih hi.

¹⁹ Bang jiahin ahiai i chih leh na lahva keiuh, keimah ngei leh, Silvana leh Timothi in a thu ka soi uh Pathian Tapa Jesu Khrist chu, ahi leh hilou, chih ahi sih a, amah ah chu ahi chih ahi zaw hi.

²⁰ Ajiahchu Pathian thuchiam zousiah chu amah ah ahi chih ahi a, huleh keiuh jiaha Pathian loupina diingin amah ah Amen ahi hi.

²¹ Huleh Khrist a nang u’toh hung sukiptu leh, keiuh thau hung nuhtu chu Pathian ahi.

²² Ama’n chu chiam zong ahung chiamchihta a, huleh i lungtang vah khaamna Hagau ahung peta hi.

²³ Himahleh ka hinna tunga heetpihtu diingin Pathian ka kou ahi; nanguh hung hawi diing a Korinth khua a tutana ka hung louh ahi.

²⁴ Na ginna tungva thu hung neihkhum hilou in, na kipaahna uh panpihtu ka hizaw uhi; ajiahchu ginna in na dingdet uh ahi.