KORINTHTE I 6 - Thuhun Thah (BSI)

Khristiante diing a kiheeh awi louh

¹ Na lahva koipouh in midang tungah thubuai nei taleh uchin misiangthoute ma a tut louin, mi dihtatloute ma ah na tut ngam diviai mah?

² Misiangthoute’n khovel vaihawm diing ahi uh chih na he sih viai mah? huleh khovel vaihawm diing na hih uleh, sil neupente vaihawm diing a taahlou na hi u'maw?

³ Angelte vaihawm diing i hi chih na he sih viai mah? huchi a hih inchu hi damsung silte giap i vaihawm talo mahmah diing uhi.

⁴ Huchi ahihleh hi damsung silte vaihawm diing na neih un, kouhtuam laha mi simmohhuaipente vaihawm diingin tousah un.

⁵ Na zumna diingun ka soi ahi. Na lahvah mipil khatbeeh um lou ahiai mah? khat beeh a unaute kikala vaihawm thei um lou ahiai mah?

⁶ Hizongleh unau in unau na heeh va, huzong gingloumi ma ah ahi nalai hi.

⁷ Huchi ahihjiahin khat leh khat na kiheehtuah uh hi na khelhna lianpi uh ahi. Bang diinga kimohsah zaw mei lou na hi viai? bang diinga a heem a bawlna thuaah zaw mei lou na hi viai?

⁸ Hilou, nanguh mahin na bawlsual va, na heem uh, huleh huzong na unaute uh tungah ahi na bawl uh.

⁹ Mi dihtatloute’n Pathian gam a luah sih diing uh chih na he sih viai mah? Heem in um sih un; kingaihhaatte aha, milem bete aha, aangkawmte aha, mihuuhte aha, tohuuhte aha,

¹⁰ Gutate aha, huaihamte aha, zukhamhaatte aha, mi salhhaatte aha, ahihlouhleh leepgute aha in Pathian gam a luah sih diing uhi.

¹¹ Huleh na lahva khenkhat huchibang nana hi uh; hizongleh Lalpa Jesu Khrist min leh, i Pathian uh Hagaua silsiang na hita uh, suhsiangthou na hita uh, siamtansah na hita uhi.

Sil sianglou bawl leh Khristian hindan kituaahlouhna

¹² Sil zousiah kei diingin bawl a sianga, hizongleh sil zousiah bawl a hoih kim sih; sil zousiah bawl kei diingin a sianga, hizongleh bangmah silbawltheihna nuaiah ka um sih diing hi.

¹³ Ante chu gilpi a diing ahi a, huleh gilpi zong an a diing ahi; hizongleh a nihin Pathian in a sumang diing hi. Huleh sapum chu kingaihna diing ahi sih a, Lalpa a diing ahi zaw hi; huleh Lalpa chu sapum a diing ahi.

¹⁴ Pathian in Lalpa chu a kaithou a, huleh eiuh zong a silbawltheihna in ahung kaithou diing hi.

¹⁵ Na sapum uh Khrist hiangte ahi chih na he sih viai mah? Ahihleh Khrist hiangte chu la in nohchizuahte hiangin ka bawl diing ahiai mah? Bawl lou hial diing.

¹⁶ Ahihleh, nohchizuah toh kizop photmah chu pumkhat ahi uh chih he lou na hi viaimah? ajiahchu ama’n, A nih un pumkhat ahita diing uh, a chi hi.

¹⁷ Hizongleh Lalpa toh kizop chu hagaua amah toh pumkhat ahi uhi.

¹⁸ Kingaih taisan un. Mihing sualna zousiah chu sapum polam ahi; hizongleh kingaihna sual bawl in chu amah sapum tungah sil a bawl sual ahi.

¹⁹ Ahihleh, na sapum u’chu, na sung va um, Pathian a kuan a na muh uh, Hagau Siangthou inn ahi a, nanguh a zong na hi sih uh chih na he sih viai mah?

²⁰ Ajiahchu mana lei na hi uhi: hujiahin na sapum uleh, na hagau vah, Pathian paahtawi un, huchu Pathian a ahi.