KORINTHTE I 4 - Thuhun Thah (BSI)

Pathian lama sawllehte mohpuahna

¹ Huchi'n mi’n kei u’chu Khrist thunatongtute leh Pathian thuguuh enkoltute bangin hung he u’heh.

² Hi-ah enkoltu hihna a’chu mi ginum hih a poimoh hi.

³ Hizongleh nangun na hung etkhiah va, mihing ngaihtuahna a na hung etkhiah uh chu kei diingin sil neutakhat ahi; ahi, kei leh kei zong ka kienkhe sih hi.

⁴ Ajiahchu keimah in bangmah ka he sih hi; ahi’nla huin siam ka kitangsah ahi tuan sih; hizongleh ahung enkhetu chu Lalpa ahi hi.

⁵ Hujiahin a hun ma in, Lalpa hung masiahin, bangmah enkhe sih un, ama’n chu mial a sil kiphualte vaah ah ahung podoh diing a, huleh lungtang a ngaihtuahte zong ahung sulang diing hi; hu hun chiangin michin in Pathian phatna a tang chiat diing uhi.

⁶ Huleh unaute, a kigial bang val a koimah ngaihtuah louh diing chih keiuh apat na zil theihna diing uleh, na lahva kuamah in khat suang a khat na uahsah louhna diingun, hi thute chu nanguh vangin Kei leh Apollo etsahna in ka kipia hi.

⁷ Ajiahchu kua’n ahiai nang midang apat hung tuamsah? huleh ahung kipe lou bang ahiai na neih? huchi'n mi piah a nei na hih leh, bang diinga a kipe lou banga kisathei na hiai?

⁸ Tuin na vahta va, tuin na hausata uh, keiuh louin lal bangin vai na hawmta uhi; kei un zong nang u’toh vai ka hawm ve theihna diingun tahtah a vaihawm hileh u’chin ka ut hi.

⁹ Pathian in keiuh sawllehte hi si diing a guatsa bangin a nunungpen a hung koih hiin ka ngaihtuah hi; hujiahin khovel leh, angelte leh, mihingte mitmuh a etnop silin ka um uhi.

¹⁰ Kei u’chu Khrist jiahin mingol ka hi va, nang u’chu Khrist ah mipil na hi uhi; Kei u’chu ka haat sih va, nanguh, chu na haat uhi; nang u’chu na zahum va, kei u’chu simmoh in ka um uhi.

¹¹ Tu daahkal dongin ka gilkial un ka dangtaah va, saguah in ka um va, mi khutthah nuulna ka hi uh, teenna mumal bei in ka um uhi;

¹² Huleh ka khut va nna tongin ka gim mahmah uh; housiat a ka um un ka vangpiah va; sawih a ka um un ka thuaah teitei uhi.

¹³ Soisiat a ka um un ka zawllungdam va; tuni tanin zong khovel niinnoh, sil zousiah bolhhoh bangin bawl in ka um uhi.

¹⁴ Na zahtaatna diingun hi thute ka gial ahi sih a, ka ta deihtahte bangin ka hung hilhkhawl ahi zaw hi.

¹⁵ Ajiahchu nangun Khrist ah hilhtu saang sawm nei zongleh u’chin, pa chu tampi na nei sih uhi; bang jiahin ahiai i chih leh tanchinpha jalin Khrist Jesu ah nanguh ka hung hingkhia hi.

¹⁶ Huchihjiahin ka umdan juitute hi diingin ka hung ngen hi.

¹⁷ Hikhu diing jiahin Lalpa a ka ta deihtah leh ginum. Timothi na kawmvah ka hung sawl hi; ama’n chu gam china kouhtuamte ka hilh veu bangin, Khrist a ka umdante nanguh ahung hedohsah kiit diing hi.

¹⁸ Na kawmva hung nawnlou diing banga hung na ngaihtuahin khenkhat nana kiuangsah uh.

¹⁹ Hizongleh Lalpa’n lem a chihleh na kawmvah ka hung baih diing hi, huchi'n kiuangsahte chu a thusoi uh hilou in, a silbawltheihna uh ka heta diing hi.

²⁰ Ajiahchu Pathian gam chu thu ah a um sih a, silbawltheihna ah a um zaw hi.

²¹ Bang ahiai na deih zawh uh? na kawmvah chiang tawiin ka hung diai, ahihlouhleh lungsiatna leh lungnemna hagau toh ka hung diai?