KORINTHTE I 3 - Thuhun Thah (BSI)

Kipawlkhenna thu a hilhna

¹ Huleh unaute, hagau mite kawma soi bangin na kawmvah thu ka soi thei sih a, tahsa mite kawma soi bangin, Khrist a naungeehte kawma soi bang giapin ka soi ahi.

² An gum hilou in, nawitui in ka hung vaah a; ajiahchu na neeh theih nailouh jiahun, tuin zong na ne thei nai sih uhi.

³ Ajiahchu nanguh na tahsami nalai uhi; bang jiahin ahiai i chih leh na lahva kithangsiatna leh, kinialna leh, kipawlkhenna a um zing jiahin tahsami hi nalaiin, mihing bang a um nalai hilou na hi u'maw?

⁴ Ajiahchu, khat in, Kei Paul lawi ka hi; huleh a dang in, Kei Apollo lawi ka hi, na chih laisiah uh tahsa mi hilou na hi viai mah?

⁵ Paul koi ahiai? huleh Apollo koi ahiai? amahuh chu nanguh hung gingta sah thunatongtute giap ahi uh, huzong Lalpa’n michin a piah bang jelin ahi.

⁶ Keima’n ka suan a, Apollo in tui a buah a; hizongleh Pathian in a khang sah hi.

⁷ Huchi'n a suantu zong bangmah ahi sih a, a tuibuahtu zong bangmah ahi sih; a khang sahtu Pathian loungal chu.

⁸ Huleh a suantu leh a tuibuahtu chu kibang ahi uh; huleh mi chinin a tohgim bang jel un kipaahman a kimuh chiat diing uhi.

⁹ Bang jiahin ahiai i chih leh kei u’chu Pathian toh natongkhawmte ka hi uh; nang u’chu Pathian louma na hi va, Pathian innlam na hi uhi.

Inn lamdan chi nihte

¹⁰ Pathian hehpihna kei hung kipia dungjuiin innlamtu piltah bangin ke’n innbulphuh chu ka lemta a, midangin a tungah inn a lam uhi. Hizongleh michin hu a tunga a innlamdan vah pilvaang chiat u’heh.

¹¹ Bang jiahin ahiai i chih leh innbulphuh lepsa loungal innbulphuh dang kuama’n a lem thei nawn sih uh, huchu Jesu Khrist ahi.

¹² Huleh hi innbulphuh tungah mi koipouh in sana in aha, dangka in aha, suang manta min aha, sing in aha, hampa in aha, buhpawl in aha lam taleh;

¹³ Michin natoh chu ahung kisulang diing hi; ajiahchu a ni in a phuangdoh diing hi, mei a sulat hi diing ahihjiahin; huleh mei in mi chin natoh chu bangchi bang ahiai chih a suchian diing hi.

¹⁴ Koi natoh zong hu a tunga a lam chu a um zing leh ama’n kipaahman a mu diing hi.

¹⁵ Koi natoh zong a kaah inchu manna a thuaah diing hi; hizongleh amah tah chu hutdam in a um diing; ahiinlah mei a paisuaah bangin.

¹⁶ Pathian inn na hi va, huleh na sungvah Pathian Hagau a teeng chih he lou na hi viai mah?

¹⁷ Mi koipouh in Pathian inn a suhbolhhoh inchu, amah Pathian in a suse diing hi; ajiahchu Pathian inn chu a siangthou a, hu inn chu nanguh na hi uhi.

¹⁸ Mi koimah amah leh amah kihem sih heh. Na lahva mi koiaha hi khovel a pil a kisah leh ahung pil theihna diingin mingol hung suaah heh.

¹⁹ Bang jiahin ahiai i chih leh hi khovel pilna chu Pathian ngaihin ngolna ahi. Ajiahchu, Ama’n mipilte a pil lepchiahna vah a man hi.

²⁰ Huleh Lalpa’n mipilte ngaihtuahna chu a thawn ahi, chih a he hi, chih gelh ahi.

²¹ Hujiahin mi koimah in mihing suang sih heh. Ajiahchu sil zousiah nanguh a ahi.

²² Paul hileh, Apollo hileh, Kipha hileh khovel hileh, hinna hileh, sihna hileh, sil um nalaite hileh, sil hung um diingte hileh; sil zousiah nanguh a ahi.

²³ Huleh nanguh chu Khrist a na hi va; huleh Khrist chu Pathian a ahi.