KORINTHTE I 15 - Thuhun Thah (BSI)

Gingtute thohkiitna diing thu a hilhna

¹ Huleh unaute, na kawmva ka tanchinpha soi, pom zong na pom va, huleh humaha na dinna uh chu ka hung hesah ahi.

² Na kawmva ka thusoi na pomdet uleh humah a hutdam zong na hi uhi, huchi ahih louh inchu a thawnin na gingta uh ahi.

³ Bang jiahin ahiai i chih leh a masapenin ke’n zong ka muh chu nanguh ka hung hilhsawn hi, chihchu, Pathian lehkhathu dungjuiin Khrist chu i sualnate jiahin a si a;

⁴ Huleh vui in a um a, Pathian lehkhathu dungjuiin ni thumni in a thou kiitta hi.

⁵ Huleh Kipha kawmah a kilaah a, huzohin sawmlenihte kawmah;

⁶ Hunungin unau ja ngaa sanga tamzaw kawmah khatvei thuin a kilaah a; a lahva tamzaw chu tutanin a dam nalai uh, hizongleh khenkhat chu a ihmuta uhi.

⁷ Hunungin Jakob kawmah a kilaah a; huin sawlleh zousiah kawmah.

⁸ Huleh a tawp pen ah, a hun lou banga piang kei kawmah zong a kilaah hi.

⁹ Ajiahchu sawllehte laha a neupen ka hi a, Pathian kouhtuam ka sawih jiahin sawlleh minvoh taah zong ka hi sih hi.

¹⁰ Hizongleh Pathian hehpihna jiahin ka hihhih diing ka hita; huleh a hehpihna hung piah chu a thawnin a um sih a; hizongleh amahuh haw zousiah sangin ka tonggim zaw hi; ahiinlah kei toh ahi sih a, Pathian hehpihna ka kawma um in a tong zaw ahi.

¹¹ Hujiahin kei hiin, amahuh hitaleh, huchi'n ka soi va, huchi'n nangun na gingta uhi.

¹² Ahihleh tuin Khrist chu misi lah apat a thou kiit chih a kisoi ngalleh, bang chidana na lahva mi khenkhat in misi thohkiitna a um sih na chih uh ahiai?

¹³ Hizongleh misi thohkiitna um lou ahih inchu Khrist zong kaihthoh in a um sih diing hi.

¹⁴ Huleh Khrist kaihthouh a um lou ahih inchu, ka thusoi uh a thawn ahi diing a, na ginna uh zong a thawn ahi diing hi.

¹⁵ Ahi, Pathian in Khrist a kai thou hi chi a, Pathian heetpihtu hi a thu ka soi jiahun, kei u’chu Pathian heetpihtu dihlou bangin ka kilangta uh; misite thou kiit lou ahih unchu amah zong a kai thou sih diing hi.

¹⁶ Ajiahchu misite a thohkiit louh inchu, Khrist zong kaihthoh in a um sih diing hi.

¹⁷ Huleh Khrist kaihthoh a, a um louh inchu, na ginna uh a thawn ahi diing a; na sualna vah na um nalai diing uh.

¹⁸ Huchiangleh Khrist a ihmutate a mangthai ahita diing uhi.

¹⁹ Tu damsung chauha Khrist a kinepna i neih inchu, mi zousiah laha mi lungsiathuaipen i hi diing hi.

²⁰ Hizongleh tu’n Khrist chu misi laha kipan kaihthoh in a umta a, ihmute laha gahmasapen ahung hita hi.

²¹ Bang jiahin ahiai i chih leh mihing jiaha sihna ahung um jiahin, mihing jiah mahin misi thohkiitna zong ahung umta hi.

²² Ajiahchu Adam a mi zousiah a sih mahbangun, Khrist ah mi zousiah suhhing in a um diing uhi.

²³ Hizongleh mi chin amah hun chiat ah; Khrist chu gah masapen ahi a; hunung chiangin ahung kiitna ah Khrist a te ahi diing uh.

²⁴ Huzohchiangin a tawp ahung tung diing, hu hun chiangin vaihawmna zousiah leh thuneihna leh silbawltheihna zousiah sumangin Pathian, Pa kawm ngeiah lalgam chu a peta diing hi.

²⁵ Ajiahchu a meelmate zousiah a keeng nuaia a koih masangsiah ama’n vai a hawm diing ahi.

²⁶ Meelma nunungpen suhmanga um diing chu sihna ahi.

²⁷ Ajiahchu ama’n sil zousiah a keeng nuaiah a koihta hi. Hizongleh sil zousiah a thunuaiah a koih a chihin, a thunuaia sil zousiah koihpa chu a huam sih chih a kilang hi.

²⁸ Huleh sil zousiah a thunuai a a um chiangin, Tapa ngei zong sil zousiah a thunuai a koihpa nuaiah a kituluutta diing a, Pathian chu bangkim a bangkim a hihtheihna diingin.

²⁹ Huchi ahihlouhleh misite a diing a baptisma a tansah uh bang diing a tadiai, misite thou kiit mawngmawng lou ahih uleh? bang diinga misite a diinga baptisma tansah ahi viai?

³⁰ Huleh bang diinga eite zong daahkal china lauthawng a um zing i hi viai?

³¹ Jesu Khrist i Lalpa u’a ka hung suanna sial in, Nitengin ka si, chih hahtahin ka soi ahi.

³² Mihing tatdan bang a Ephesa a gamsate kisualpih ka hihleh, kei diingin bang a phatuam diai misite thou kiit lou ahihleh? nein i dawn diing uh; ajiahchu jing chiang a si diing i hi.

³³ Heemin um sih un; lawm gilou in umdan hoih a suse veu hi.

³⁴ Dihtatna lamah halh unla, sual sih un; ajiahchu khenkhat in Pathian heetna a nei sih uhi; hichu na zahtaat na diing va ka soi ahi.

Thohkiitna tahsa umzia diing

³⁵ Hizongleh mi koiaha in, Misite bangchi'n kaihthoh ahi diing viai? bangchi bang sapum nei in ahung pawt diviai? a chi ahi diing.

³⁶ Nang mingol, na haichi tuh zong a sih louh a ahihleh a pou sih hi.

³⁷ Huleh na tuh in a kung hung um diing khu na tuh sih a, gehu hiin, haichi dangdang hitaleh a tang mah ahi na tuh.

³⁸ Hizongleh Pathian in pha a sah bang jelin a kung a pia hi, haichi chin kawmah amah kung chiat.

³⁹ Tahsa zousiah chu tahsa kibang ahi sih a, hizongleh mihing tahsa a tuam ahi a, gamsate tahsa a tuam a, ngate tahsa a tuam a, huleh vate tahsa a tuam hi.

⁴⁰ Vaanlam sapum a um a, leilam sapum zong a um hi; hizongleh vaanlam sapum loupina a tuam a, leilam sapum loupina a tuam hi.

⁴¹ Niin loupina tuam a nei a, ha in loupina tuam a nei, huleh aahsite’n zong loupina tuam a nei uhi; aahsi leh aahsi zong loupidan ah a kibang sih uhi.

⁴² Huchibang mahin misi thohkiitna zong ahi. Muatthei a tuh in a um a; muatthei lou a kaihthoh in a um hi;

⁴³ Simmohumtaha tuh in a um a; loupitaha kaihthoh in a um hi; haatloutaha tuh in a um a; silbawltheitaha kaihthoh in a um hi;

⁴⁴ Tahsalam sapum a tuh in a um a; hagaulam sapum nei a kaihthoh in a um hi. Tahsalam sapum a um a, hagaulam sapum zong a um hi.

⁴⁵ Huchi'n, Mi masa Adam chu hinna nei mi a siam ahi, chih gelh ahi; Adam nunung chu hinna petu Hagau ahi.

⁴⁶ Ahihvangin hagaulam chu a um masa sih a, tahsalam a um masa hi; hunungin hagaulam ahung um hi.

⁴⁷ Mihing masa chu lei a siam, leimi ahi a; mihing nihna chu vaan a kuan Lalpa ahi.

⁴⁸ Lei a siam mite chu lei a kisiampa bang ahi va; vaanlam mite chu vaan a mi bang ahi uhi.

⁴⁹ Huleh lei a kisiam meel i put bangin, vaan mi meel zong i paw diing uhi.

⁵⁰ Hizongleh unaute, hichu ka soi ahi, tahsa leh sisanin Pathian gam a luah thei sih a; muatthei in zong muattheihlouhna a luah thei sih hi, chih.

Misiangthoute laahmang chianga sil umdan diing

⁵¹ Ngai un, thuguuh ka hung hilh diing hi; i bawnun i ihmu veh sih diing va, hizongleh i bawnun suhlimdang in i um veh diing uhi.

⁵² Thakhatin, mitphetkallou in, pengkuul nunungpen gin chian; ajiahchu pengkuul ging diing ahi a, huleh misite chu muatthei lou a kaihthoh in a um diing va, eite zong suhlimdang in i umta diing uhi.

⁵³ Bang jiahin ahiai i chih leh hi muatthei in muattheihlouhna a silh diing ahi a, huleh hi si thei in sihtheihlouhna a silh diing ahi.

⁵⁴ Huchia, hi muatthei in muattheihlouhna a silh a, huleh hi sithei in sihtheihlouhna a silh hun tahchiangin, Zohna in sihna chu a valh zouta, chia kigial chu ahung taangtungta diing hi.

⁵⁵ Aw sihna, na guu khoiah a um tai? Aw haankhuuh, na gualzohna khoiah a um tai? chih.

⁵⁶ Sihna guu chu sual ahi a, huleh sual thaneihna chu daan ahi.

⁵⁷ Hizongleh i Lalpa uh Jesu Khrist jala gualzohna hung pepa Pathian kawmah kipaahthu um heh.

⁵⁸ Hujiahin, ka unau deihtahte, dettahin, suhliing guallouh in, Lalpa natoh phatuamngaitaha tong ngiitngeet in um un; na tohgimna uh chu Lalpa ah a thawn sih diing chih na he ngal va.