KORINTHTE I 14 - Thuhun Thah (BSI)

Thusoitheihna silpiah leh haam heetlouh silpiah tehkaahna

¹ Lungsiatna chu delh jel unla, huleh hagaulam silpiahte, a diahkholin thu na soi theihna diing uh lunggulh zaw un.

² Ajiahchu haam heetlouh a haam in chu mi kawma thusoi hilou in, Pathian kawmah a soi ahi zaw hi; koimah in a soi a heet louh jiahin; hizongleh hagau ah chu thuguuh a soi ahi.

³ Hizongleh thusoimi inchu mihing kawmah siamhoihna thute, hasotna thute, huleh hamuanna thute a soi ahi.

⁴ Haam heetlouh a thusoi inchu amah chauh a kisiam hoih a; hizongleh thusoimi inchu kouhtuam a siamhoih hi;

⁵ Na bawnva haam heetlouh a na haam uh chu ka hung deihsah a, hizongleh thu na soi theih uh ka hung deihsah sem hi; ajiahchu kouhtuam siamhoihna diing a a letdoh ngal louhleh, haam heetlouh a haam sangin thusoimi chu a hoihzaw hi.

⁶ Tuin, unaute, haam heetlouh a thusoi in na kawmvah hungta leng, kilaahna in aha, heetna in aha, thusoitheihna in aha, ahihlouhleh thuhilhna in aha na kawmvah soi sih leng bangin ka hung suphatuam diai?

⁷ Sil, hinna nei lou gingthei, theile aha, ahihlouhleh tingtang aha ngei zong umzia nei a a gin louhleh bang kimuut a, bang kitum chih bang a chi kiheet theih diai?

⁸ Bang jiahin ahiai i chih leh pengkuul mumal beiin kimuut leh koi ahiai gaal kuan diing a kisa diing?

⁹ Huchimahbangin nanguh zong haam heet baihlama na soi louh uleh, bang kisoi ahiai chih bang a chih kiheet diai? ajiahchu huihkhua a haam na hi giap diing uhi.

¹⁰ Khovel ah haam chi tuamtuam tampi a um ahi meithei, hizongleh umze nei lou khatmah a um sih hi.

¹¹ Hujiahin hu haamging in a soi ka heet louh inchu hu thusoipa diingin kei chu meelmah ka hi a, huleh kei diingin a soipa zong meelmah ahi diing hi.

¹² Huchimahbangin huchilawma hagaulam silpiahte a na phatuamngaih bangun kouhtuam siamhoihna diing a na hung khan theihna diing uh hawl un.

¹³ Huchihjiahin haam heetlouh a thusoi in a lehdoh theihna diingin ngen heh.

¹⁴ Bang jiahin ahiai i chih leh haam heetlouh in haamtei leng ka hagau chu a haamtei a, hizongleh ka heetna chu a suphatuam sih hi.

¹⁵ Ahihleh bangchi'n ahita diai? Hagau in ka haamtei diing a, heetna in zong ka haamtei diing hi; hagau in la ka sa diing a, heetna in zong ka sa diing hi.

¹⁶ Huchilouin chu hagau a na vangpiah chiangin bangmah heloute umna a umpa in na kipaahthu soi ah bangchi’n, Amen, a chi thei diai, na thusoi he loupi in?

¹⁷ Nang in chu kipaahthu na soi hoih ngeel a, hizongleh midang chu a siamhoih tuan sih hi.

¹⁸ Nanguh zousiah sanga haam heetlouh a thu ka soi tam zawh jiahin Pathian kawmah kipaahthu ka soi hi.

¹⁹ Ahiinlah kouhtuam lahah chu haam heetlouha thu saang sawm ka soi sangin, ka thu soi a midangte ka hilh theihna diingin ka heetna in thu teng ngaa ka soi zaw diing hi.

²⁰ Unaute, heetsiamna lamah naupang sih unla, hizongleh giitlouhna lamah chu naupang un; heetsiamna lamah piching un.

²¹ Daan lehkhabu ah, Haam dang mite leh gamtuam mite ka min hi mite kawmah thu ka soi diing a, huchi'n zong ka thu a ngaikhe tuan sih diing uhi, Lalpa’n a chi, chih gelh ahi.

²² Hujiahin haam heet louh chu gingtute diingin hilouin, gingloute diingin chiamchihna ahi; hizongleh thusoitheihna chu gingloute diingin ahi sih a, gingtute diingin ahi zaw hi.

²³ Hujiahin kouhtuam pumpi mun khata na kikhopna vah mi zousiah haam heetlouh in haam taleh u’chin, huleh hutah ah a he nailou leh gingloumi hung leh, nanguh chu mingol ahung chi sih diviai mah?

²⁴ Hizongleh mi zousiah in thu soi leh uchin, ginglou mi ahiai, ahihlouhleh heloumi khat huah hung leh, a giit louhdan na bawnva heetsah in a umta diing a, na bawnva awimoh ahung hita diing hi.

²⁵ Huchi'n a lungtang thuguuhte chu suhlat in a umta diing a; huleh khupboha puuhin Pathian a be diing a; na lahvah Pathian a um tahzet hi chi'n a soisawn diing hi.

²⁶ Bangchih diing ahita diai, unaute? na hung kikhop chiangun mi chinin phatna la bang, thukihilhna bang, haam heet louh bang kilaahna bang, haam letdohna bang na nei chiat uh. Sil zousiah chu siamhoihna diing a bawl hi heh.

²⁷ Mi koipouh in haam heetlouh a thu a soi leh, nih in aha, ahihlouhleh a tam tawpin thum in aha soi heh, huzong kikheel jelin hi heh; huleh mi khat in letdoh heh.

²⁸ A lettu diing a um louh inchu, kouhtuam kikhopna ah haam louin um mei heh; amah leh Pathian kawmah kisoi heh.

²⁹ Thusoitute chu nih aha, thum aha in soi u’henla, a dangte’n a soi uh ngaihtuah u’heh.

³⁰ Hizongleh a kawm a tou midang khat kawma bang aha ahung kilaahin chu a masapen sip heh.

³¹ Ajiahchu mi zousiah in a heet a, mi zousiah hamuang a, a um theihna diingin, na bawnun khatkhat in thu na soi thei uhi.

³² Huleh thusoitute hagau chu thusoitute thuthu in a um uhi.

³³ Pathian chu buaina Pathian ahi sih a, misiangthoute kouhtuam zousiah a ahih bangin hamuanna Pathian ahi zaw hi.

³⁴ Na numeite uh chu kouhtuam kikhopnate ah sip u’heh; ajiahchu amahuh diingin thusoi phal ahi sih hi; daan lehkhabu in zong a soi bangin thumanna nuaiah um zaw u’heh.

³⁵ Huleh bang aha heet nuam a neih unchu inn lamah a pasalte uh dong u’heh; ajiahchu kouhtuam kikhopna a numei thusoi chu a zumhuai ahi.

³⁶ Bang ahiai? Pathian thu nanguh apat hung suaah ahiai mah? ahihlouhleh nanguh kawm chauha hung tung ahiai mah?

³⁷ Mi koipouh in thusoitu ahiai mah, ahihlouhleh hagaumi ahiai mah a, a kingaihtuahleh na kawmva ka thugelhte chu Lalpa thupiah ahi chih he u’heh.

³⁸ Hizongleh mi koipouh a he lou a umleh, amah chu he lou in um mei heh.

³⁹ Hujiahin unaute, thusoi chu lunggulh unla, haam heetlouh a haam zong khap sih un.

⁴⁰ Sil zousiah hoihtah leh kituuptaha bawl hi hen.