KORINTHTE I 12 - Thuhun Thah (BSI)

Hagaulam silpiah tungtaang a thuhilhna

¹ Huleh unaute, hagaulam silpiah tungtaang zaw, he lou a na um uh ka deih sih hi.

² Jentelte na hih laiun, pui a na um bang jelun, hi milem haam theiloute lamah puimang in na um veu uh chih na he uhi.

³ Hujiahin kuama’n Pathian Hagau a thu soi in, Jesu chu haamsethuaah ahi, a chi ngei sih hi; huleh kuama’n Hagau Siangthou louin Jesu chu Lalpa ahi, a chih thei ngei sih hi, chih ka hung hesah hi.

⁴ Huchi'n silpiah tuamtuam a um a, hizongleh Hagau khat ahi.

⁵ Huleh thunatohna tuamtuam a um a, hizongleh Lalpa khat ahi.

⁶ Huleh natohdan tuamtuam a um a, hizongleh bangkim a bangkim bawltu Pathian khat ahi.

⁷ Hizongleh phattuampih chiatna diingin Hagau kilatna chu michin kawmah piah ahi.

⁸ Ajiahchu mi khat kawmah Hagau in pilna thu piah ahi a; midang kawmah hu Hagau mahin heetna thu piah ahi;

⁹ Midang kawmah hu Hagau mahin ginna piah ahi a; midang kawmah hu Hagau mahin suhdamtheihna silpiahte piah ahi;

¹⁰ Midang kawmah silmah bawltheihnate piah ahi a; midang kawmah thusoitheihna piah ahi; midang kawmah hagaute heetkhentheihna piah ahi a; midang kawmah haam tuamtuam a thusoitheihna piah ahi; midang kawmah haam tuamtuam lehdohtheihna piah ahi;

¹¹ Hizongleh hute zousiah chu Hagau khat mahin mi chin kawma a deih bangjel a hawm chiat in a tong hi.

Mihing sapum apat etsahna

¹² Bang jiahin ahiai i chih leh sapum chu khat ahi a, hiang tampi a nei hi, hiang zousiahte chu tam mahleh uh sapumkhat ahi uh; huchimahbangin Khrist zong ahi.

¹³ Ajiahchu eiuh Judate hiin, Jentelte hitalei, suaah hiin, suaahlou hilei, i bawnun sapumkhat a um diingin Hagau khat a baptis in i um uhi; huleh i bawnun Hagau khat mah dawnsah in i umta uhi.

¹⁴ Sapum chu hiang khat chauh ahi sih a, hiang tampi ahi zaw hi.

¹⁵ Keeng in, Khut ka hih louh jiahin sapum a pang ka hi sih, chileh; hi jiahin sapum a pang lou ahi diai mah?

¹⁶ Huleh bil in, Mit ka hih louh jiahin, sapum a pang ka hi sih, chileh; hi jiahin sapum a panglou ahi diai mah?

¹⁷ Sapum chu a pumpiin mit hitaleh, khojahna khoiah a umta diai? A pumpi in khojahna hitaleh gimnam heetna khoiah a umta diai?

¹⁸ Hizongleh Pathian in hiang chinteng chu pha a sah bangin sapum ah a koih hi.

¹⁹ Huleh a bawnun hiang khat chauh hitaleh uh, sapum khoiah a umta diai?

²⁰ Hizongleh tuin hiang tampi hizongleh uh, sapumkhat chauh ahi.

²¹ Huleh mit in khut kawmah, Bangmahin ka hung mamoh sih, a chi thei sih; lutang in zong keeng kawmah, Bangmahin ka hung mamoh sih, a chi thei tuan sih hi.

²² Chi thei lou, chihtaah sangin sapum hiang haat lou a kilangte a mamoh zaw mahmah hi.

²³ Huleh sapum hiang ngaihsah tham louh a i guatte naahtahin i zahbawl zaw a, huleh i hiang kilawmloute’n naahpitahin kilawmna a nei zaw uhi.

²⁴ I hiang kilawmte’n chu huchibang a kiphamoh sih uhi; hizongleh Pathian in poimoh thamlou hiangte chu zahbawl semin, sapum chu a lemkhawm hi.

²⁵ Huchia sapum a kikhenna a um louh a; hizongleh hiangte chu khat leh khat a kingaihsah chiat theih zawhna diingun.

²⁶ Huleh hiang khat in a thuaah in zong hiang zousiah in a thuaahpih jel a; huleh hiang khat paahtawi a, a um leh hiang dang zousiah in a kipaahpih jel uhi.

²⁷ Tuin nanguh chu Khrist sapum na hi va, a mimalmal in a hiangte na hi uhi.

²⁸ Huleh Pathian in khenkhat kouhtuam ah ahung koih a, a masapenin sawllehte, a nihna ah zawlneite, a thum na ah thuhilhtute, hubanah silmah bawltute, huzohin suhdamtheihna silpiahte, panpihtheihnate, vaihawmsiamnate, haam tuamtuam a haamtheihnate.

²⁹ A bawnun sawlleh ahi viai? a bawnun zawlnei ahi viai? a bawnun thuhilhtu ahi viai? a bawnun silmah bawltute ahi viai?

³⁰ A bawnun suhdamtheihna silpiahte a nei viai? a bawnun haam heet louhin thu a soi viai? a bawnun haam heet louh a let thei viai?

³¹ Hizongleh silpiah hoihpente chu lunggulh zaw un; huchi'n lampi hoihzaw ka hung musah diing hi.