KORINTHTE I 11 - Thuhun Thah (BSI)

Kouhtuam kikhopna a numeite umdan diing

¹ Kei Khrist umdan latu ka hih mahbangin, nanguh ka umdan latute hi un.

² Huleh unaute, sil zousiaha na hung heet zing va, thugousiah ka hung hilh bang jel a na kolzing jiahun ka hung paahta hi.

³ Hizongleh pasal photmah lutang chu Khrist ahi a, numei lutang chu pasal ahi; huleh Khrist lutang chu Pathian ahi chih na heet uh ka hung deih hi.

⁴ Pasal, a lu khuh pum a haamtei aha, ahihlouhleh thusoi aha photmah in a lu a zahbawl lou ahi.

⁵ Hizongleh numei, a lu khuh lou a haamtei aha, ahihlouhleh thusoi aha photmahin a lu a zahbawl lou ahi; bang jiahin ahiai chih leh huchibanga bawl chu a kimeet toh kibang giap ahi.

⁶ Ajiahchu numei in a lu a khuh louh ngal inchu meet mei heh; ahihvangin numei diing a sam meet ahiai mah, ahihlouhleh meetkiau ahiai a zumhuai inchu kikhuh heh.

⁷ Pasal vang chu Pathian lim bang leh a loupina ahihjiahin a lu a khuh louh diing mawng ahi; numei ahihleh pasal loupina ahi.

⁸ Bang jiahin ahiai i chih leh, pasal chu numei apat siam ahi sih a; numei ahihleh pasal apat siam ahi zaw hi.

⁹ Pasal chu numei a diing a siam zong ahi sih a; numei chu pasal a diing a siam ahi zaw hi.

¹⁰ Hikhu jiahin numei in pasal thuneihna chiamchihna angelte jiahin a khuh diing ahi.

¹¹ Hizongleh Lalpa ah chu pasal lou in numei a um sih a; numei lou in pasal a um sih hi.

¹² Ajiahchu numei hi pasal apat siam ahihbang mahin pasal zong numei jiah a piang ahi; hizongleh sil zousiah Pathian a kuan veh ahi.

¹³ Nangun kingaihtuah un; numei in a lu khuhlou a Pathian kawma a haamtei a kilawm eimah?

¹⁴ Pasal in sam saau a neih leh amah diingin a zumhuai hi, chih ngeina dan inzong ahung hesah sih eimah?

¹⁵ Hizongleh numei in sam saau a neih inchu amah diingin loupina ahi zaw hi; ajiahchu a sam chu khuhna diing a piah ahi.

¹⁶ Hizongleh mi koiaha in a nial nuam inchu huchibang tawndan i nei sih uh, Pathian kouhtuam pawlte’n zong a nei sih uhi.

Lalpa nitaah an neeh thu a hilhna

¹⁷ Ahihvangin, nanguh hi thu ka hung hilhna ah ka hung phatthei sih hi, hoihzawhna sem diing a kikhawm lou in, siatzawh semna diingin na kikhawm veu uhi.

¹⁸ Bang jiahin ahiai i chih leh a masapenin, kouhtuam a na kikhop chiangun na lahvah kilangkhenna a um veu chih ka ja hi; huleh gin zong ka gingta hi.

¹⁹ Ajiahchu a taha kipomte a kilat theihna diingin na lahvah gindan tuamtuam zong a um diing mawng ahi.

²⁰ Hujiahin mun khat a na kikhop chiangun Lalpa nitaah an neehna gual ahi sih hi.

²¹ Ajiahchu na neeh chiangun mi chinin midangte ma in nanguh nitaah an na kineeh chiat uh; huchi'n khat a gilkial a, a dangin a kham hi.

²² Bangchidan ahiai? Neehna diing leh dawnna diingin kineih lou na hi viai mah? ahihlouhleh Pathian kouhtuam na musit un, bangmah neiloute na selphou uh ahiai mah? Na kawmvah bang ahiai ka soi diing? Hi thu ah ka hung paahta diing adiai? Ka hung paahta hial sih hi.

²³ Bang jiahin ahiai i chih leh Lalpa kawm apat ka muh chu nanguh ka hung hilhsawn ahi, huchia Lalpa Jesu’n matsaha a um jan a, tanghou a laah a;

²⁴ Huleh kipaahthu a soi zoha a balkeeh a, La unla, ne un; hichu ka tahsa, nanguh diing a kipia chu ahi; na hung heet zing na diingun hichu bawl jel un, a chih.

²⁵ Huchimahbanga an a neeh zoha nou zong a laah a, Hi nou chu ka sisana thuhun thah ahi; na dawn teng va na hung heetzingna diingun hichu bawl jel un, a chih.

²⁶ Ajiahchu hi tanghou na neeh va, hi nou na dawn tengun a hung kiit masiah Lalpa sihna na ensah jel uh ahi.

²⁷ Hujiahin mi koipouh taah loupia Lalpa tanghou ne leh nou dawn chu, Lalpa tahsa leh sisan tungah siamlouh a tang diing hi.

²⁸ Hizongleh mi amah kienchian zaw heh, huchi'n tanghou chu ne henla, nou chu dawn heh.

²⁹ Bang jiahin ahiai i chih leh Lalpa tahsa ngaihtuah lou a, ne taah lou leh dawn taah loupia ne leh dawn inchu, amah siamlouh kitanna diingin a ne in a dawn ahi.

³⁰ Hikhu jiahin na lahva mi tampi na zawngkhal va, na china uh; huleh tampi na ihmuta uhi.

³¹ Ajiahchu eimah le eimah ki vaihawm lei chu, vaihawmsaha um lou diing i hi.

³² Ahihvangin vaihawmsah a i um in zong khovel toh siamlouh tang a i um louhna diingin Lalpa taihilh in i um veu uhi.

³³ Hujiahin ka unaute, ne diing a na kikhop chiangun khat leh khat kingaah chiat un.

³⁴ Huleh na kikhop uh vaihawmna na thuaahloh louhna diingun mi koipouh a gil a kial leh a inn lamah ne heh. Huleh thu dangte chu ka hung chiangin ka lem veh na diing hi.