KOLOSSITE 3 - Thuhun Thah (BSI)

Khrist toh kaihthohkhawm hitate umdan diing

¹ Huchi'n Khrist toh kaihthoh khawm na hih taah uleh, tunglam a Pathian jiatlama tou Khrist umna a sil umte chu hawl un.

² Tunglam a sil umte ah na lungsim uh nga un, lei a sil umte a nga louin.

³ Ajiahchu, na sita va, na hinna uh Khrist toh Pathian ah phual ahita hi.

⁴ Khrist, i hinna uh ahung kilat chiangin nanguh zong amah toh loupiin na kilang diing uhi.

⁵ Hujiahin na tahsa hiang uh lei a umte sulum un; kingaihnate, bolhhohnate, kietlahna hoihloute, utna giloute, huleh duhaamnate, (duhaamna chu milembiahna ahi),

⁶ Ajiahchu hu silte jiahin Pathian lungthahna chu thumang lou tate tungah a tung veu hi;

⁷ Nanguh zong tumalam a hu silte a na hin laiun, hute ah na na um uhi.

⁸ Hizongleh tuin chu nangun zong lungthahnate, thangtawmnate, huatnate, soisiatnate, houlimna thanghuaite, hihaw zousiah na kam vapat koihmang un.

⁹ Mihing lui chu a silbawlte toh na hawhkheta uh chih he in, khat leh khat kihemtuah sih un.

¹⁰ Mihing thahin na kithuamta va, huchu heetsiamna neia a siamtu batpiha siamthah in a um ahi.

¹¹ Huah chu Grik mi leh Judami, zehtan leh zehtan louh, Meelmahmi leh Skithiami, huleh saltaang leh taanglou zong a um tuan sih hi; Himahleh Khrist chu bangkim ahi a, bangkim ah a um hi.

¹² Hujiahin, Pathian miteel, mi siangthou leh deihtahte bangin lainatna lungtangte, chitnate, kingaihngiamna lungsimte, jaidamnate, huleh thuaahtheihnate in kithuam un;

¹³ Khat leh khat kithuahtheituah unla, kingaidamtuah un; khat in khat tunga thubuai bang na neih uleh, Khrist in nanguh ahung ngaihdam bangin nanguh zong kingaidam un.

¹⁴ Huleh hi silte zousiah tungah lungsiatna silhthuaah un, huchu bukimna kaangawmna ahi.

¹⁵ Huleh Pathian hamuanna na lungtang vah vaihawmsah un, huchibang hi diingin tahsa khat a kouhna hi uhi; huleh kipaahna taang zong he un.

¹⁶ Khrist thu chu pilna zousiah in nanguh ah tampiin umsah un; phatna la bang, Pathian la bang, huleh hagaulam la bang kizilsah in, kihilhtuah unla, na lungtang va hehpihna nei in Lalpa chu la sahsah un.

¹⁷ Huleh na bawl photmah uh, thusoi in hileh natohin hileh, a bawnin Lalpa Jesu minin, amah jiaha Pa Pathian kawma kipaahthu soi kawmin bawl veh un.

Khristian innkuan umdan

¹⁸ Jite, Lalpa a, a kilawm hun bangin na pasalte uh kawmah kituluut un.

¹⁹ Pasalte, na jite uh lungsiat unla, a tungvah gilou sih un.

²⁰ Tate, sil zousiah ah na nulepate uh thu mang un; huchu Lalpa ah kipaahhuai ahi ngal a.

²¹ Pate, na tate uh sunuaah in lungthahsah sih un, huchilou inchu a lungkekha diing uhi.

²² Suaahte, sil zousiah ah, tahsa a na houtute uh thu mang un; mit natong a mihing kipaahsah diing giap hilou in; himahleh lungsim siangthoutahin leh Pathian laukawm zaw in.

²³ Huleh na bawl photmah uh mihingte diing a bawl bang hilou in, Lalpa a diing bangin lungluuttahin bawl un.

²⁴ Lalpa kawm apatin kipaahman diing gou chu na mu diing uh chih he in; ajiahchu Lalpa natohsah na hi uh.

²⁵ Hizongleh sil dihlou bawltu in chu a sil dihlou bawlman a mu kiit diing hi; kideihsahtuamna bangmah a um sih hi.