KOLOSSITE 1 - Thuhun Thah (BSI)

Chibaibuuhna

¹ Paul, Pathian lungguata Jesu Khrist sawlleh leh, i unaupa uh Timothi in,

² Kolossi khua a um, Khrist a misiangthoute leh unau ginumte kawmah; I Pa uh Pathian leh Lalpa Jesu Khrist a kipan hehpihna leh hamuanna na kawmvah um hen.

Kipaahthu soi na leh haamtei na

³ Nanguh diinga haamtei ngiitngeet in Pathian, i Lalpa uh Jesu Khrist Pa kawmah kipaahthu ka soi uhi,

⁴ Khrist Jesu a na ginna uleh, misiangthoute zousiah tung a lungsiatna na neihdan uh ka jah nungsiah un,

⁵ Vaan a nanguh diinga kinepna hung kikoihsah jiahin, hu kinepna thu chu tanchinpha thutah thu ah tumalaiin na zata uhi;

⁶ Hu tanchinpha chu khovel pumpi a gah a, a khan jel mahbangin, na jah va, thutah a Pathian hehpihna na hung heet ni vapat in na lahvah gah a pung jelin na kawmvah ahung tungta hi.

⁷ Epaphra, ka suaah tanpih uh ngaihtah, nanguh diinga Khrist natongtu ginumtah apat zong na heet taah mahbangun.

⁸ Ama’n chu Hagau a na hung lungsiatdan uh zong ka kawmvah a phuangdoh hi.

⁹ Hikhu jiahin keiuh zong, hi ka jah ni vapatin, nanguh diing a haamteisah leh, pilna leh hagaulam heetchi ana zousiah a amah deihzawng heetna a na hung dimna diing uh ngetsah ka tawp sih uhi.

¹⁰ Huchia Lalpa diinga kilawmtawh leh sil zousiah a deihhuai a na gamtat va, natoh hoih chintenga hung gah a, huleh Pathian heetsiamna lama na hung khantouhna diing uleh;

¹¹ A silbawltheihna loupitah dungjui a kipaahna toh kuhkalna leh thuaahhaatna lama haatna zousiah a suhhaat a um in.

¹² Vaah a misiangthoute gou tankhawmpih diinga hung bawltu Pa kawma kipaahthu soi in.

¹³ Ama’n chu mial silbawltheihna a kipanin ahung hundoh a, a Tapa deihtah gam ah ahung luutsahta hi.

¹⁴ Amah ah a sisan jalin tatdohna i mu hi, i sualna uh ngaihdamna ngei chu.

Khrist mizia leh a natoh

¹⁵ Amah chu muhtheihlouh Pathian meelpua, silsiam zousiah laha piang masapen ahi;

¹⁶ Ajiahchu amah mang a sil zousiah siam ahi a; vaan a umte leh lei a umte, muhtheih leh muhtheihlouh, laltouphah hiin, lalgam hitaleh, vaihawmnate leh thuneihnate hizongleh; sil zousiah amah siam ahi a, amah diinga siam ahi.

¹⁷ Huleh amah chu sil zousiah umma in a um a, amah ah sil zousiah a umkhawm hi.

¹⁸ Amah chu tahsa, chihchu, kouhtuam lutang ahi; sil bangkim a masapen hihna mun a tan theihna diingin, bulpipen, misi laha kipana piang masapen ahi.

¹⁹ Ajiahchu amah a taangchinna zousiah a um chu Pa deihzawng ahi.

²⁰ Huleh a kros sisan jala lemna bawl zou in, amah in sil zousiah amah toh a kilemsah hi; amah in, ka chi ahi, lei a sil umte hiin, vaan a sil umte hitaleh.

²¹ Huleh nanguh, nidanglaia na natoh uh giloute a amah apat khen a um a, na lungsim va meelma na hi va, hizongleh tuin ama’n,

²² A tahsa pumpi ah a sihna jalin ahung kilemsahta hi, a mitmuh a siangthou leh, soisel bei leh, taina diing bei a ahung dinsah theihna diingin;

²³ Ginna a na um zing va, kingahna nei a na kip va, huleh tanchinpha na jah uh kinepna apat na kitawlmang louh uleh; hu tanchinpha chu vaan nuai a silsiam zousiah kawma taangkoupih ahi a; kei Paul hu thunatongtu diing a siam ka hi.

²⁴ Nanguh diinga ka gimthuaah ah tuin ka kipaah hi, huleh Khrist gimthuaah baan chu a tahsa jiahin ka sa ah ka sunzom jel hi, hu tahsa chu kouhtuam ahi.

²⁵ Pathian thu subuching diingin, nanguh diing a ka kawma hung kipia Pathian hunbi khenna dungjuiin thunatongtu diinga siam ka hi.

²⁶ Hu Pathian thu chu kumtuang a a khang a khang a thuguuh kiphual ana hi a, hizongleh tuin chu a misiangthoute kawmah suhlat in a umta hi.

²⁷ Hute kawmah Pathian in Jentelte laha hu thuguuh loupina hauhdan a hesah nuam mawng ahi; huchu, nanguh a Khrist um, loupina kinepna chu ahi.

²⁸ Mi chin Khrist Jesu a hoih bukima ka piah theihna diing va mi chin kiveeng diing a hilh a, pilna chinteng a zilsah a, a tanchin ka soi pa uh ahi.

²⁹ Huchibang diingin ke’n zong, keimah a nasataha tong, hu a tohna dungjuiin hahpana pangin ka tonggim ahi.