JUDE 1 - Thuhun Thah (BSI)

¹ Jude, Jesu Khrist suaah leh Jakob unau in, Pa Pathian koihtuam, Jesu Khrist a veenbit leh kouhte kawmah;

² Khotuahna leh, hamuanna leh, lungsiatna na tungvah suhpung in um hen.

³ Deihtahte, i hutdamna thu taangpi na kawmva gelh diing ka ngaihtuah nasat laiin, misiangthoute kawma diing ginna khatvei kipia khu diinga phatuamngaitaha na pan na diingun hung gelh leh, hung hasot kei diingin a poimoh hi.

⁴ Ajiahchu ma laipeh a hih siamlouhna tang diing a guatsa, Pathian ngaihsah lou leh, i Pathian uh hehpihna chu huuhna suaahsah a, huleh Lalpa Pathian khat chauh um leh, i Lalpa uh Jesu Khrist gingta lou, a guuh a hung luut mi koite aha a um uhi.

⁵ Hujiahin hikhu khatvei hetamah zongleh u’chin, ka hung hedohsah kiit diing hi, Bangchia Lalpa’n a mite Aigupta gam apat a hutdoh zou nunga a gingta loute a suhmangthai ahiai, chih.

⁶ Huleh angelte, a tanvou masa uh kem zing lou a, a umna mun uh nusete chu kumtuanga gaahna siihkhau a kaanin, mial nuaiah, ni loupi vaihawmna a diingin a siitta hi.

⁷ Sodom leh Gommorrah, huleh a kimvel a khuate, huchibang maha kingaihna a kipumpiah leh, tahsa tuamdang na delhte chu kumtuang a mei a gawtna thuaah a, etton diing a taahlat a, a um bangun.

⁸ Huchibang mahin, hi mang kihdahhuai mante’n zong tahsa a suthanghuai va, thuneihna a musit va, lalnate a soise veu uhi.

⁹ Ahi’nla, Mikael, angel tungnungpen in chu, Mosi luang thu a diabol toh kihau a, a kinial laiun, soisia in a mohpaih ngam sih a, Lalpa’n hung tai heh, a chi zaw hi.

¹⁰ Hizongleh hite’n chu sil a heet louhte uh a soisia va; ngaihtuahna nei lou gamsate banga pianken heettheihna a a heet uh hu silte ah amah uleh amahuh a kisusesuaah uhi.

¹¹ A tung uh a gih hi! ajiahchu Kaina lampi a juita va, loh deihgohna’n Balaam suhkhelhna ah lawptahin a tai va; huleh Kora helna ah a mangthaita uhi.

¹² Hite chu na lungsiatna gual vaahna va nang u’toh an a neeh chiang va tuitup suang mong hiam, launa taang he lou a amahuh ki vaahte ahi uh; amahuh chu tui polou meilum huih muutleeng lehlehte, sing a gah vuaita, gah nei lou, nihvei sita, a zung a kiphungkalhte;

¹³ Amahuh mah zumna kiphotuoh tawm, tui khang lian kinawh von von, aahsi leeng lehleh, kumtuanga mialna vombehboh a diing a siitte ahi uhi.

¹⁴ Huleh Enok, Adam apata sagihna pa in zong hite tungthu ana soilawh hi, Ngai un, Lalpa chu a misiangthou saang sawm toh ahung hi.

¹⁵ Mi zousiah tunga vaihawm diing leh, a lahva Pathian ngaihsah loua a toh uh Pathian ngaihsah louhna nna zousiah leh, Pathian ngaihsah lou mi sualte’n a tunga a haamsiatna zousiah jiaha Pathian ngaihsahloute zousiah siamlouh tangsah diingin, chi in.

¹⁶ Hihaw chu phunhaatte, nialhaatte, amahuh ut zawngzawng a gamtaangte ahi uh; a kam un kiuahsahna thu loupi tahtah a soi va, lawhna deih man a mi paahtawi chiingmi ahi uhi.

¹⁷ Hizongleh deihtahte, nangun chu i Lalpa uh Jesu Khrist sawllehte manga malaia thu kisoite he zing un.

¹⁸ Hun nunung chiangin Pathian ngaihsah louhna lama amahuh utna banga um, simmoh haatte ahung um diing uh, a chih haw uh bang.

¹⁹ Hitobang mite chu kituambawl haatte, tahsa mi, Hagau neiloute ahi uhi.

²⁰ Hizongleh deihtahte, nang u’chu na ginna siangthou pen uh tunga kilamtou in, Hagau siangthou a haamtei in,

²¹ Kumtuang hinna neihsahna khop i Lalpa uh Jesu Khrist hehpihna chu ngaah zing in Pathian lungsiatna ah kikoldet un.

²² Khenkhat ginglel a umte chu hehpih unla;

²³ Khenkhatte mei kuang apat kaidoh in, a tahsa thanghuai uh ba ana puansilh tanpha kihdahin, lau kawmin hundam un.

²⁴ Huchi'n na puuh louhna diing va nangu hung veengbit thei leh, a loupina ma a nasataha nuamsa a soiselbei a nanguh hung koih theipa,

²⁵ I Hundampa uh Pathian pil chauh kawmah, loupinate, paahtawinate, vaihawmnate leh silbawltheihnate tu leh kumtuang in um zingta hen. Amen.